Hiobe 38 - Labrador Inuttitut Heritage Bible

Gûde nangminek oᴋâlavok ᴋallungnekut, unertutivâlo Hiobe ajugaᴋanginermik ilisimanermiglo.

¹ Nalekablo Hiobe kiovâ akkunaksoarmit oᴋarlunelo:

² “Kinauva tâmna kajusimanermik nallonartitsijok, oᴋartorlo taimâk, sillainermut?

³ “Makkitikik tapseruserᴋik angutetut; appertsoromavagit, ajuᴋertunga.

⁴ “Nanêlaukît nuna tunganektâlaurapᴋo? Oᴋautinga, taimâk sillatutigijôvît?

⁵ “ᴋaujimavît kia angininga âkilaungmangâgo? Ubvalo kia noᴋakservallilaungmangâgo?

⁶ “Ubvalo nanê ittigangit manguktitaumavât? Ubvalo kia terrekungata ujaranga illilauᴋaûk?

⁷ “Uvloritjat uvlâksiutit illagêklutik nertordlilauktillugit, Gûdiblo ᴋittorngangit ilûnatik igiaᴋomijarlauktillugit.

⁸ “Kia imarbik upkoanut pallangairutilauᴋaûk, annilauktillugo anânab timinganit sôrlo?

⁹ “Nuvujanut anorâlaurapᴋo, târmullo imuserlugo nanginnut sôrlo.

¹⁰ “Ingerganinga nokᴋartilaurapᴋo kipputekotimnut, saneroatâlaurapᴋo, upkoatârlugolo,

¹¹ “Oᴋarlungalo: Mânna tikkilugo tikkituksauvotit, ᴋaninginersamulloungitok; mâne malliksuatit, piojorijut nokᴋartuksauvut.

¹² “Igvit nalliunerne uvlâk perᴋolauᴋiûk, ᴋaublo aupallungninga inninganik unertutilauᴋiûk?

¹³ “Nunaksûb isungit tigulugit perᴋovlugo, idluitullijullo serᴋitijauvlutik nâvitaunajarᴋovlugit?

¹⁴ “Ablatsângorᴋovlugo machaktut nippinerᴋutiksatut, nangerᴋovlugillo tagvane annorâktut.

¹⁵ “Idluitullijullo ᴋaumanermingnik aksârtauᴋovlugit, pimariutertullo tallingit nappijauᴋovlugit.

¹⁶ “Igvit immarbiksûb erᴋanut tikkilauᴋît, ittinersûblo tuminginne agvertalauᴋît?

¹⁷ “Toᴋûb upᴋoaksoangit upkoêlauᴋât illingnut? Ubvalo tâktub upᴋoaksoangit takkolaukpigît?

¹⁸ “Timeroilauᴋît nuna ᴋanok silliktigijongmangât? Oᴋarit, tamakkoa tamaita ᴋaujimavigît?

¹⁹ “Nalliangovâ apᴋosinek ᴋaumajub innigijanganut, Nanêᴋalo târnerub inninga?

²⁰ “Kiglilervinginnik ᴋaujimatsiarajarᴋovlutit, nallojungnaiᴋovlutillo apᴋosinermik iglunganut?

²¹ “ᴋaujimalauᴋît nalliutome taipsomane erniangojuksaulauravit? Uvlutillo kapsiolerniarmangâtta?

²² “Tagvanêlaukît apputib aulatainarvigijangane? Nettarᴋonaillônêt ᴋematullivingit takkolauᴋiûk?

²³ “Komergutigijama kiksarnarnerub nalliuninganut, sorsungnerub unatadlarnerublo uvlungangnut.

²⁴ “Apᴋosinerit nalliagut ᴋaumajok avikâ? Unangârnerlo Aularᴋa nuname?

²⁵ “Kia suarutak kôgvilliulaukaûk, ᴋaumalaglo, kalluglo apᴋosinelliulauᴋâk?

²⁶ “Sillaluᴋovlugo nunamut pitaᴋangitomut kinamik, Sunaᴋangitomut inuᴋajuitomut?

²⁷ “Inuᴋajuitok, sunaᴋajuitorlo nâmaksitilugik, iviksukallo nutaijoktungit perorsatilugit?

²⁸ “Sillalub atâtanga kinauvâ? Kialonêt mitsuksûb kuttingit ernetarilaukpagît?

²⁹ “Kia timinganit sikko anilauᴋâ? Kialo ᴋilaub ᴋaornanga erniarilauᴋaûk?

³⁰ “Imek ijertauᴋovlugo ujarᴋat atânut sôrlo, itinnerlo ᴋângane ᴋoaᴋovlugo.

³¹ “Igvit sakkiaitsiat ᴋellarutingat ᴋellaksorungnarᴋiûk? Udlaktullonêt kippijutât ᴋellarutjarungnarᴋiûk?

³² “Planêtit uvloritsat nuititsungnarpigît nalliuninginne? Tuktujuglonêt tessiorungnarᴋiûk ᴋilangme ᴋittorngangita ᴋollâtigut?

³³ “ᴋilaub illusinga ᴋaujimaviûk? Ubvalo Kakkearungnarᴋiuk nuname?

³⁴ “Igvit ᴋallungnît nuvujame tessiorlugo Kotsiktitsungnarᴋiûk? Imiksuillônêt unnurningita Ullingniarᴋâtît?

³⁵ “Igvit ᴋaumalait aulartitsungnarpigît tagvunga ingergasâdlarᴋovlugit, oᴋarᴋovlugillo illingnut: Mânêpogut?

³⁶ “Kia ilisimanek tunnivauk sagvangitomut? Kina isumanik sillatojunik tunnijivâ?

³⁷ “Kina taimâk ilisimatigijôva nuvujat kittitsungnarlugit? Kia ᴋilaub immiᴋautingit kovivagît?

³⁸ “Sannit koverijaugangatta, ᴋattilerᴋovlugit, ᴋattingajullo nippiutiᴋovlugit?

³⁹ “Igvit Loeve aksârnigaujoᴋartitsungnarᴋiûk, Loeviarᴋallonêt akkeartortitsungnarpigît?

⁴⁰ “Okᴋolerangatta iglomingne, merngoêrserlutiglo, sitimingne uttakkivlutik?

⁴¹ “Kia tullukat nerᴋiksalliorpagît, piarangit Gûdemut nipliarangata, sanguerlutiglo tingilutik nerᴋiksaᴋangipatta?