Hiobe 36 - Labrador Inuttitut Heritage Bible

Gûdib idluarninga pitsiarningalo tâpkonunga nakkornersaujomajunut. Tâpsoma ajugaᴋangininga sakkijârtok pingortitamine.

¹ Elihulo piganerpok oᴋarlunelo:

² “Utaᴋilaulârsunga sulle unertutigijomavara illingnut; Gûde pivlugo sulle oᴋausiksaᴋarama.

³ “Sillatunera ᴋaningitomit aijomavara, pingortitigalo idluarneraromavara.

⁴ “Oᴋâlanikka nellangaituksautsengilet ilâ, sillatunera nangarnartailijuksauvok sângne.

⁵ “Ahâk, Gûde songojoksôvok, sullele nacholungilak kinamik; ômattingata pitsartuninga songojoksôngmatauk.

⁶ “Gûdeᴋangitok piulilungilâ, pattangajulle ikajorpait idluarnermik perᴋovlugit.

⁷ “Ijîngne allartingilak idluartunit; attanîllo illaliudlugit iksivautaksoarmut ingitipait soraijuitomik pôktotsainarᴋovlugit.

⁸ “Parngnanairsortauvlutiglo nellagangatta ᴋellaksortauvlutik ᴋellarutinnut, kappianarnerublo aklunânginnut:

⁹ “Tagva nellojungnaitipait piniarlaungninginnik, illusilungninginniglo, ᴋanok angutauserasuarlaungmatta;

¹⁰ “Angmaivigivaillo siutinginnik nâlegomamanermut, oᴋautilugillo nâmanginermit sâlertuksaungmatta.

¹¹ “Nâlekunik, kivgartoruniuglo; tagva uvlutik naggaserniarpait ajungitome, Jâritiglo inarᴋonartome.

¹² “Nâlengikunik, tagva saviksoarmut ochoniarput, nungulerniarlutiglo mallugosuᴋâratik tamattominga.

¹³ “Takkomôrtulle ningarnermik ᴋallerêktitsivut, avâlalungilello, tâpsoma ᴋellaksorpagit.

¹⁴ “Tagvalo inosungnerme toᴋoniarput inôsingillo ajortullijut akkornganêniarput.

¹⁵ “Pattangajorle pattanganingane piuliniarpâ, angmaiviginiarlâlo siutinganik kiksarnerme.

¹⁶ “Igvittauk nûtiniarpâtit kappianarnerub torkluanit initoneᴋarᴋovlutit tetjartaunangitomik iningane; illijauniartullo nerrimavingnut orkserusersimaniarput.

¹⁷ “Gûdeᴋangituble idluarninga nallautsitigungne: tagva idluarnerub erᴋartuinerublo tigukalladlarniarpâtit.

¹⁸ “Kamatsiarit ningarnek nussukserᴋonago illingnik pattaktorlune agganik, sattutiksamullo angijomut piulijaujungnarajarᴋonak.

¹⁹ “Isumavît, akluinît kamagingmago? Goldeungitok, pitsartuneungitorlônêt nelliat, sappingineungitorlonêt.

²⁰ “ᴋilanârniarnak unuarmut, inuᴋattigêksoarnik nûtitsijomut innigijanginnit.

²¹ “Udsertorit sâlerniarnaglo idluanginermut: sôrlo pijomangâlauravit ânianermit.

²² “Ahâk, Gûde pôktovok pitsartunermine; nanê Ajuᴋertuijoᴋarᴋa topsôtunak?

²³ “Kia tamna perᴋojungnarᴋaûk apᴋotigijaksarianginik? Kialo oᴋautijungnarᴋaûk: Nâmangitullivotit?

²⁴ “Erᴋaumalerit tâpsoma piniarninga angijorortitaksarigangne, inuit imgerutigijangit.

²⁵ “Inuit ilûnatik takkovât, toᴋojuksab takkovâ ᴋaningitomit.

²⁶ “Ahâk, Gûde angijôvok, nallonarporlo uvaptingnut; jâringita unnurningit nautsertortaujungnangilet kinamullonêt.

²⁷ “Tâpsoma imiub kuttingit amuarlugit kongmuartilerangagit, tagva tâktungata sillalungat kovivât;

²⁸ “Nuvujat kôktitserᴋovlugit, ᴋusserᴋovlugillo inungnut unnuktunut.

²⁹ “Ilâ nuvujat issivijauningit tukkisijaujungnarᴋa kinamut? Tuppingata ivulungninga?

³⁰ “Ahâk, ᴋaumanine issivipâ avatiminut, ulligêrpaillo imarbiub amângit.

³¹ “Tamattomunga inuᴋattigêksuit erᴋartormagit, tunnijikasiutjilunelo nerᴋiksanik nâmaktomik.

³² “Aggane ullikpait ᴋaumajomut, tamannalo aulatipâ pijitsertortinnut.

³³ “Nallojungnaitipait ᴋuviagijaminik, nergjutit pivlugit, ilâ perortut pivlugit aglât.”