Hiobe 35 - Labrador Inuttitut Heritage Bible

Gûdib erᴋartuininga tikkitaililungilak.

¹ Elihulo kiovok oᴋarlunelo:

² “Tamanna idluartônasugiviuk oᴋaravit: Idluarnera anginersauvok Gûdib idluarninganit?

³ “Oᴋaravit, sunamik piksarsigalloarmangât illingnut? Sunamik ikajorkâ, ajortoêrutigalloaruma?

⁴ “Kiojomavagit oᴋautsenik ilannârijattillo illagilutit.

⁵ “ᴋilak takkonâruk, takkolutillo; nuvujat tautukit, inornadlarmatta illingnut.

⁶ “Idluitulliguvit sunamik piniarvigijungnarᴋiûk? Idluitullinitillo unuktôkpatta, sunamîk Piniarvigijungnarᴋiûk?

⁷ “Idluartônajaralloaruvillo, sunamik Tunnitsivigijungnarᴋiûk? Ubvalo sumik tigusiniarᴋa aggangnit?

⁸ “Inuk illiktut itok kassênivit sunamik piniarvigijungnaralloarpâ, inublo ᴋittornganga idluarnivît.

⁹ “Nênertaujut aksorutijaunek avâlajutigivât, angajoᴋâksuillo tallingit ᴋaigarsugutigivât;

¹⁰ “Oᴋartoᴋangilarle: Gûde pingortitiga nanêᴋâ, imgerneᴋartitsijok unuarme?

¹¹ “Ajuᴋertuinersaujok uvaptingnik nergjutinit nunamêtunit, ilisimanersautitsilunelo uvaptingnik tingmitjanit ᴋilaub atânêtunit.

¹² “Tagva idluitut piojoriningit avâlajutigilitsuk, tâmnalo kioniangilak.

¹³ “Gûdib sunaungitok tussarniangimago, ajugaᴋangitublo takkosarniangilâ.

¹⁴ “Oᴋaralloaruvit takkonianginangne; sullele erᴋartuiveᴋarpok sângane; nerriugituinaruk.

¹⁵ “Ningarningale tuavidlune nellipsailungimat, kamalungimallo piniarlungneᴋarmat taimâk unuktigijunik:

¹⁶ “Tamanna pivlugo Hiobib ᴋanine aitarpâ sullinane, sakᴋertitsilunelo oᴋautsinik piojorijunik, sillainermut.”