Hiobe 34 - Labrador Inuttitut Heritage Bible

Elihub Hiobib opigosuktaililune oᴋauserilauktangit Gûdemut pitlarpait, sorsugutigivâlo tâpsoma idluarninga.

¹ Elihulo kiovok, oᴋarlunelo:

² Ilisimajose oᴋâlanera tussarsiuk, sillatôjoselo naipertosinga.

³ Siutib oᴋâlanek nautsertormago, ᴋanniublo, nerᴋiksak ikpigivâ.

⁴ Nâmagijaunek annerilavut, akkonaptingne illitarksiᴋovluta suna idluarmangât.

⁵ Hiobe oᴋâlaungmat: Idluarpunga, Gûdiblo idluarnimnik pêjaivigivânga;

⁶ Saglojariaᴋarpunga idluarneᴋaralloarlunga, kappiaktoadlartitauvungalo kartjumnut, sunamik passijaujutiksaliulaungigalloarama.

⁷ Angutit nelliat Hiobetut, mittauteᴋarnermik imertuksauvâ immektut?

⁸ Idluitullijullo pisuᴋattigivlugit, Gûdeᴋangitullo agvertarᴋattigivlugit?

⁹ Oᴋalaungmat: Angumut ikajortiksaungilak Gûdemik pilloriguteᴋaralloarune.

¹⁰ Tamanna pivlugo tussarnârsinga, inojose ilisimajose: Tamanna ungasigle, Gûde idluilune piniartuksaunajarmat, ajugaᴋangitorlo idluartaililune;

¹¹ Tâpsomale inuk akkiniarpâ, sôrlo pinialaungningatut, attunîllo nachvârᴋovait apᴋosinerijatik malliklugit.

¹² Âhamarik ilâ, Gûde idluitulliniangilak, ajugaᴋangitublo idluarnek mumilungilâ.

¹³ Kia nuna perᴋolauᴋauk tâpsomunga? Kialo nuna illûnât tunganektâlauᴋaûk?

¹⁴ Tâpsoma ômmatine torârtitsomanajaruniuk tâpsomunga, (inungmut) tagva inôsinga annerningalo kattersorajarpak ingminut;

¹⁵ Uviniggit ilûnatik anernêngerᴋattigênajarput, inuglo saningorajarivok.

¹⁶ Sillatuneᴋaruvit mânna, tagva tussarit tamattominga, oᴋâlanimalo nippinga naipertoruk.

¹⁷ Idluarnermik ômisuktok, attanniotijuksaugalloarᴋâ? Idluartorlo sôngojok passijaksauneraromaviûk?

¹⁸ Atannermut oᴋartoᴋartuksauvâ: Angutaujotit suksaungitok; angajoᴋâksoarnullo: Gûdeᴋangitôjose?

¹⁹ ᴋanok sungiluartomik tâpsomunga, atannît kinauninginnik kamalungitomut, ânanaudlartomiglo anginersautitsilungitomut aklujomit; aggangita ilûnaita sanajaringmagit.

²⁰ Tagvainak toᴋojuksauvut, unnuablo ketterarningane inuᴋattigêksuit nungulerput; sôngojullo tigujauvut aggangnûngitok.

²¹ Tâpsoma ijikita ilûnatik attunnît apᴋosiningit takkonârmagit, ablorningillo ilûnaita tautukpait.

²² Târneᴋangilak, tâksineᴋaranelônêt, idluitullijut ijerungnarajarvianik tagvane.

²³ Tâpsoma inuk kamagikitâjariaᴋangimago, tikkerᴋovlugo Gûdib sânganut, erᴋartortaunermut.

²⁴ Tâpsoma sôngojut kittiksaungitut serᴋalivait, pititsilunelo asianik tâpkoa inninginnut:

²⁵ Tamanna pivlugo piniarningit illitaringmagit, mumikpaillo unuakut, serᴋalititauᴋovlugit.

²⁶ Ochotipait Gûdeᴋangitut akkornganut sagvartome.

²⁷ Tamana pivlugo ᴋemâlaungmatta tâpsominga, apᴋosiningitalo nalliallonêt tukkisilaungimatsuk.

²⁸ Aklujut avâlaningit tikkijariakalaungmat tâpsoma sânganut; tâpsomalo aklujut avâlaningit tussarmagit.

²⁹ Tâmna ullapirsauteᴋartitsileraikpat, kina tagva Passiklerungnarᴋa? Tâpsomalo kênane ijerangago, kia Takkojûngnarᴋaûk? Inûᴋattigêksuit illuitut pivlugit pikpallônêt, inuglonêt atausek pivlugo.

³⁰ Inuk takkomôrtok attaniotijungnaiᴋovlugo, Nigangorᴋonagolônêt inugasaksoarnut.

³¹ Ilâ Gûde oᴋarviojariaᴋarpok: “Pitlartaunermik tukkisilaukpunga, asseroijomairpunga;

³² “Ipaksingitamnik, igvit ajuᴋertulaunga; idluitullilauruma, taimailioromairpunga.”

³³ “Illingnit pijuksauva, ᴋanok akkiniartuksaungmat? (oᴋarajarlune:) Tamanna nachogiviuk, attê tagva annerosulerit inimne? ᴋaujimaguvit sunamik tagva oᴋarit.

³⁴ “Inuit sillatôjut illiginiarpânga, angutiblo ilisimajub tussarniarpânga:

³⁵ “Hiobe oᴋarmat sillaidlune, oᴋausingillo sillatolungilet.

³⁶ “ᴋanoktôk Hiobe ôktortaule nâninga tikkidlugo! tamanna pivlugo, kiguseᴋarame inuktitut idluitutitut.

³⁷ “Ajornerminut illautitsivok idluitullinermik, aggane pattaktorpait akkonaptingne, oᴋautsinelo unuktôtipait Gûde akkerartorlugo.”