Hiobe 33 - Labrador Inuttitut Heritage Bible

Elihub Hiobe kaiblarpâ Gûde opigilugo, nallojungnaitilâlo Gûdib inuk âniaᴋartimmago âkᴋiktaujutiksanganut.

¹ Ilâ Hiobe oᴋâlanera tussalauruk, oᴋautsikkalo ilûnaita naipertorkit.

² Ahâk, ᴋanera aitarpara, oᴋaralo oᴋarpok ᴋilamne.

³ Omattiga nallâgôrnermik oᴋâlajuksauvok, kangasinâkalo sillatunermik kisianik oᴋartuksauvûk.

⁴ Gûdib annerningata sanalaukpânga, ajugaᴋangitublo annerningata inôtsemik tunnitsivigilaukpânga.

⁵ Pijungnaruvit tagva kiunga; parngnailerit akkerartoromavlunga, nangilerlutillo.

⁶ Ahâk Gûdib pigivânga taimaluatsiak illiktut; macharmillo sanajaugivunga.

⁷ Ahâk, uvanga ᴋoaksârutigijariakangilarma; aggakkalo oᴋumailuartuksaungilet illingnut.

⁸ Kisianele oᴋalaukpotit siutîngma sângangne, oᴋâlanivîllo nippinga tussariaᴋalaukpara:

⁹ Ivsornaipunga, idluitullineᴋarnangalo, passijaksaungilungalo, ajorneᴋartaililarmalo;

¹⁰ Ahâk, pitjutiksarsilaukpok akkerartorlunga, ômisukteonasugivânga;

¹¹ Itigakka kejuksoarmut parngnanairsorsimavait, ablornikkalo tamaita udsertorpait.

¹² Ahâk, tammakkonangat isumatâlerpunga akkerartorlutit idluartôlunginavit; Gûde anginersaungmat inungmit.

¹³ Sôg aivaᴋattigijomaviûk, tamaita piniarnine akkiorutigilungimagit illingnut?

¹⁴ Gûde oᴋarpakalloarpok atausiarlune, aipanganiglo, kamagijauvangilarle.

¹⁵ Sinektomanikut takkotitjutikut unnuarme, siningnerub ittijub inuit tupvigilerangagit, sinnileraikpatta inangavingme:

¹⁶ Tagva inuit siutingit angmarpait, ᴋoaksârtilaitalo pitlarningnermut.

¹⁷ Inuk sangutilugo kajusimaninganit pijomavlune sapputilugolo piojorinermit;

¹⁸ Tarningalo ivlerilugo asserortaunermit, inôsingalo, saviksoarmut ochoᴋonago.

¹⁹ Anianullo pitlarivâ inangaviane, sauningillo tamaita angijomik;

²⁰ Inôsingata nerᴋiksat makkojugilugit perᴋovlugo, tarningatalo nerᴋiksatsiat.

²¹ Uvininga nipakpaliavok kênanganit, niugiglo annaulertauvlutik serᴋalijauvuk takkojaujungnaiᴋovlugit.

²² Tarninga kaglilerᴋovlugo asserortaunermut, inôsingalo toᴋotsijunatut.

²³ Engelit illangat tagva akkisartuijib, atautsib tausendinit illilertorpago, inuk tâmna nellojungnaitilugo, ᴋanok idluartullijuksaungmat:

²⁴ Tagva saimarviginiarpâ, oᴋarniarlunelo: Piuliuk, Unnungarᴋonnago asserornartomut; ullapᴋosênermik Sakᴋêvunga.

²⁵ Tagva uvininga tungojorsiluarniarpok inosungnerminit; utterniarpok inosungnime uvlunginnut.

²⁶ Gûdemut tuksiarniarpok; tâpsoma saimarviginiarpâ, kênanganik takkoniarᴋovlugo igiaᴋomijarlune, inuglo tâmna tunnitsiviginiarivâ idluarninganik.

²⁷ Inuit sânginne kigligiutsiniarpok, oᴋarniarlunelo: Idluitullilaukunga, idluarnerlo mumiktilaukpara, sulilautsengilangale.

²⁸ Tâpsoma tarniga piulilaukpâ ingerarᴋonanga asserornartomut, inôserale takkonajarᴋovlugo ᴋaumajomik.

²⁹ Ahâk, tamanna tamât Gûdib pinniarpâ maggoertorlune pingasoêrtorlunelônêt inungmut.

³⁰ Tarninga uttertilugo asserornartomit pijomavlune, ᴋaumaksarlugolo inôjut ᴋaumaninginut.

³¹ Naipertorit Hiobe, tussarnângalo nippangerlutillo, uvanga oᴋâlaᴋovlunga.

³² Oᴋausiksaᴋaruville tagva kiunga; oᴋarit, idluarsarnît tussaromadlarapᴋo.

³³ Oᴋausiksaᴋangikuville, tagva tussarnânga, nippangerlutillo, sillatunermik ajuᴋertoromavagit.