Hiobe 32 - Labrador Inuttitut Heritage Bible

Elihu nâmanersamik kiojomavok illanârijaminit.

¹ Tagva angutit pingasut tâpkoa nokᴋarput Hiobe kiolugo idluartônasugilaungmat.

² Elihule Baracheelib erninga Bûsemiok, Ramib kinguvânginnit pijok ningalerpok: Hiobe ningarivâ tarnine idluarnersaunasugingmago Gûdemit;

³ Ilannârijane pingasut ningarivait, kigusiksarsilungimatta, sullelo Hiobe passijaksaunerarmatsuk.

⁴ Elihu utakᴋilaungmat Hiobe oᴋarᴋattigilugo, tâpkoa angajukliongmatta tâpsomangat.

⁵ Tamanna pivlugo takkogame kigusiksakangimat angutit pingasut tâpkoa ᴋaningine ningarosulerpok.

⁶ Taimaglo Elihu Baracheelib erninga Bûsemiok kiovok oᴋarlunelo: Uvanga inosukpunga, illipsele inutoᴋauvose, tamanna pivlugo illerasulaukpunga, kijiklungalo illitarksinimnik nellojungnaitiluse.

⁷ Isumalaukpunga: Jârit oᴋarlit, inutoᴋaunerublo unnurningit ilisimanermik sakᴋerlit.

⁸ Annernerle inungmêtok tâmnauvok, ajugaᴋangitublo annerningata sillatutipait.

⁹ Angijut sillatunerpângotsainarlungilet, angajuklillo idluarnek ipaksilungilât.

¹⁰ Tamanna pivlugo uvangatauk oᴋâlajomavunga, tussarnârlaunga. Illitarksinera sakᴋertitsomagivara.

¹¹ Ahâk, uttakkilaukpunga oᴋausipsingnik; kamalaukpunga sillatunipsingnik, idluarnermik nallautsinajarᴋârtinase;

¹² Kamalaukpungalo illipsingnik; ahâgle, tagva akkonapsingnêtoᴋangilak pitlarnigajartomik Hiobemik, oᴋâlaningalônêt kiojutigilugo pijomik.

¹³ Immaᴋâ oᴋarᴋonasse: Ilisimanek nallaulaukpavut; Gûdib ajaktorpâ; ᴋialoungitok assiata.

¹⁴ Sâvigilunga oᴋâlalaungilak; oᴋâlaniselo attorlugit akkerartoromanginivara.

¹⁵ Mungorsimavut, kiojungnailutiglo, oᴋarnerub ᴋemakpait.

¹⁶ Utakᴋilauramale, tâpkoalo oᴋarungnarlungimatta (nokᴋangavulle kiojungnailutiglo).

¹⁷ Atsoila illangutivimnik kiojomagivunga, illitarksinimniglo sakᴋertitsijomagivunga.

¹⁸ Oᴋâlajutiksamik taimâk ullipkitigigama, annernerub nâmne kappiasuktimanga.

¹⁹ Ahâk, nâka Weinetut nutaujotut mattosimajotut ipûk, pôktitut kâromajutitut.

²⁰ Oᴋâlajariaᴋarpunga ipjangoêserᴋovlunga; kangasinâka aitariaᴋarpâka, kiojariaᴋarlungalo.

²¹ Kialo kinauninga kamagijomangilara, takkomôrlunga kina nertoromalungilara.

²² ᴋaujimalunginama taimailiorajaruma, pingortitima ᴋilamik tigukallangniarajangimangângma.