Hiobe 31 - Labrador Inuttitut Heritage Bible

Hiobib passijaungijutiksarsiorningata kingorlingit.

¹ Ijika angerᴋattigilaukpâka, uigasuit nelliallônêt kamagilugo perᴋonanga.

² Sunamigle Gûdib takpângat akkilerpângâ? ajugaᴋangitublo kôtsiktomit ᴋanoêtomik kingormgutijaᴋartipângâ?

³ Idluangitok taimaitomik ᴋanoêtoᴋangârtuksaungilâk, idluitullijorlo taimâk ajaktortaungârlunelo?

⁴ Apᴋosinikka takkungilait, kittilungilaillo ablornikka ilûnaita?

⁵ Agvertarlaukîk sunaunginerme? Itigakkalônêt tuavilaukat uivêriklernermut?

⁶ Tagva kiktitartaulanga kiktitautingnut idluartûngnut, tagva Gûdib idluitailinera tukkisiniarpâ.

⁷ Agvertarnera sangulaukpat apᴋosinermit, ômattimalo ijîka mallilaukpagik, aggamnelo nippingajoᴋarpat sunamik:

⁸ Tagva uvanga kângasuijuksaunajarpunga, assimalo nerrilerliuk; nutaijoktoᴋotikkalo amângejartaujuksauvut.

⁹ Omattiga kajungersartaukolaukpat arnamut, sillalimalo upkoangane uttakkilauruma:

¹⁰ Tagva aiparma asiga serᴋalitsivigiliuk, asimalo Okᴋungavigilitsuk.

¹¹ Tamanna (assiniarnek) pinniarlungniongmat, idluitulliniolunelo, pitlartaujariaᴋartok erᴋartuijomut.

¹² Tamanna ikkomaunajarmat nungutsijok asserorsimanek tikkidlugo, pigijakkalo tamaita amângejarlugit.

¹³ Kivgama angutib arnablônêt idluarninga, Sunaᴋalaurangatta akkerartorlunga, nachogilaukpigô?

¹⁴ Sunamik piniaromanajarkîk Gûde makkitanajarpat: Sumiglo kiojaksarinajarpigô, nellipsarajarpanga?

¹⁵ Tâpsoma sanalaungiᴋauktauk sanalauktima anânab timingane? Sanalaurivâlo timib illuane taimaluatsiamik?

¹⁶ Ajoksartut kajungernerijanginnik kippilugvigilaukpakkâ, uigarnerillo ijingit perlerᴋolaukpakkâ?

¹⁷ Kissiovlunga tamuara nerrilaukpigô, illiarsuglo nerrilaunginiva tamattomangat?

¹⁸ Inosungnimnit illuseᴋalaurama atâtatut, anânamalo timinganit manigoinek ᴋuviagilaukpara.

¹⁹ Kina takkolaukpigo asserorlune annorâkangimat? Aklujorlo agvertarᴋolaukpigo ulleᴋarane?

²⁰ Tâpsoma saneraᴋita saimartilaungipânga, Saugârsuᴋotima aminginnut okᴋoksartitaulaurame?

²¹ Aggakka aulalaukpakka illiarsuk akkerartorlugo, itterviksoarme illilertortaunasugilaurama?

²² Tagva tuiga ᴋattagle arriangmit, talleralo nappile aksakongmit.

²³ Asserortaunek Gûdemut sivôragigapᴋo, angijoksôningalo sapperajarapᴋo.

²⁴ Golde sungertutigilaukpigô, Goldemullo illaᴋangitomut Oᴋalauᴋîk: manigornerijara?

²⁵ ᴋuviasulauᴋîk, perᴋutevaksoaᴋalaurama, aggamalo unuktovaksuit pitsorlaungmagit?

²⁶ ᴋaumajok takkonârlaukpigo ᴋaumaidlalaurangat; takkerlo angmalokitaulaurangat?

²⁷ Omattiga angigutsivlune tilliortaukolauᴋâ, ᴋanerma aggakka kunniklugit perᴋovlugo?

²⁸ (Tamanna) idluitulliniojoktauk pitlartaujariaᴋartok erᴋartuijomut; tamattomunga Gûde takpanêtok missiarutiginajalaurapᴋo.

²⁹ ᴋuviasulauᴋîk ômigijiga idluitulliviolaurangat, makkitalungalo, ᴋanoêtomut tikkitaulaurangat?

³⁰ Kanera idluitullerᴋolaunginapᴋo, tussuᴋovlugo tâpsoma tarningata ôminarsijauninganik.

³¹ Inuit iglumne oᴋajariaᴋalaungilat: Kina Tussarajarᴋâ tapsoma nerᴋiksanginnut nâmaksititaunginapta!

³² Tujormijak sillatânetuartuksaulaungilak, upkoarale upkoêlaukpara ingergajomut.

³³ Nâmangitullinera inuktut ullilaukpigô, ikkiame idluitullinera ijerajarapᴋo?

³⁴ ᴋattimgajut unuktôtillugit kêongomigilaukpakkâ? nachogijaunerlônêt illamnut ᴋoaksârutigilaukpigô? nippangerama, anninangalo upkoagut?

³⁵ Kia kiglissiniartomik tunnitsivigivânga? Aglaᴋotikka mânêput. Ajugaᴋangitub kiolinga; aglannik makpertanik aglagle akkerartortiga.

³⁶ Âhamarik tuimnut illijomanajarpakka niaᴋutetullo ᴋellaksoromavakka uvamnut.

³⁷ Ablornima unnurningit taijomanajarpakka tâpsomunga, atannertullo najuleromanajarpara.

³⁸ Nunaᴋotima avâlajutiginiarpanga akkerartorlunga, ᴋôktitseᴋattigêklutiglo kugvinik pikpatta pivlunga;

³⁹ Perortungit akkilernagit nerrilaurupkit, peroraijullo inôsingit siorniornartilaurupkit:

⁴⁰ Tagva Distelit perorlit uvamnut Weizenit inninginne, perortoᴋulluillo toᴋonartut Gerstit inninganne. Hiobib oᴋausingit sorairput.