Hiobe 30 - Labrador Inuttitut Heritage Bible

Hiobib ajulernine mânna pigijane akkingêtipâ pilloringnerilauktaminut.

¹ Mânnale nuᴋardlerijama ijutigivânga, atâtaᴋalauktut nachoginajalauktamnik sulijaksaᴋartilugit saugakotima ᴋingminginne;

² Pitsartuneᴋalauktut sunaunasugijaulaungitomik uvamnut, inoksilauktut inutoᴋaunermik;

³ Kângmut isumajârnermullo inutôlutik ᴋemâlauktut inninut pannidlartunut, innuilangotsainalauktunut sunaᴋajuitôlunelo;

⁴ Perornerluktunnik nussuksilauktut okpit avatâne, kigutangernaujakullo amângit nerᴋigilaukpait.

⁵ Inuit akkorngannit aulartitaulaukput; nipliajutigijaulaukput tigliktok, pivlugo sôrlo.

⁶ Kôngne kappianartune nunaᴋalaukput, nunab ittersanginne kairosungnelo.

⁷ Okpit akkornganne ᴋallingoalaukput, Distelillo akkorngane ᴋattimalilaukput.

⁸ Inuit sukkôjut nachogijaujullo ᴋittorngangit, nunamit aijaliktaulauktut.

⁹ Mânna nipliajôgutiksangorpunga nakakseralingne oᴋangoarutiksaulungalo tâpkonunga.

¹⁰ Makkojugivânga allivarvigilungalo, nikkasulungilello kênama sângane kesserlutik.

¹¹ Aklunâkotiga siaktimavât, mannigotitipângalo, kingmiararlo pêjarpât sâmne.

¹² Tallerpimne innuosuktut uivêtut makkitavut; tâpkoa itigakka koitimavait, apᴋosineliorpullo akkerartorlunga, asseroromavlunga.

¹³ Apᴋosinera serᴋomipât; asserortaujutiksamnut ikajorput, tâpkoa ikajorteᴋangitut.

¹⁴ Tikkiput kingekut nerrotôjoᴋut sôrlo; asserortauneᴋartillugo aksakâtilaukput ovunga.

¹⁵ ᴋoaksârnerub sâvigilaukpânga, unangmilaukpâlo ânanaunera annoretut, nuvujatullo ingergaujotut illiornera pilloringnartok.

¹⁶ Mânnale tarniga kovilerpok (ârosungnermik) kollimnut, nelliunerublo kappianartub tigumavânga.

¹⁷ Unnuarme saunikka uvamne puttortauvut, mikkitikkalo innilalungilet.

¹⁸ Pitsartunerub sugaluluarninganut asianik annorârtauvunga; tapserusertauvunga ullingma pânganut sôrlo.

¹⁹ Ailupingmut tullertaumavunga, sannektitullo arsatitullo inasugijauvunga.

²⁰ Kaigarsugvigijarangapkit, tagva kiolungilarma; sângerjarangapkit, tagva kamagingilarma.

²¹ Ablatsângorsimavotit pivlunga nâpkigosujuitoâlungmut, sakᴋertitsivigivarma kingajarnernik aggakpît pitsartuningannut.

²² Igvit kivikparma, tiktautilungalo annoremut, serᴋomitilungalo sôngojomik.

²³ ᴋaujimagama toᴋomut unertutiginiaramga; tagvanêpok inôjut ilûnatik iglungat nallonairsimajok.

²⁴ Agganele issangniangigalloarpait illuviub katsiktanganut, avâlaniangilello asseroininga pivlugo.

²⁵ Uvangale tâmna uvloᴋalauktok oᴋumaidlartunik ᴋêagilauralloarpara, tarnimalo aklujok illapsugilaukpâ.

²⁶ Ajunginek uttakkilaukpara, idluitorlo tikkipok; ᴋaumajok nerriugilaupara, târnerlo tikkipok.

²⁷ Erchavikka tertiput, nokᴋaratiglo; nalliutub ᴋanoêtub opingalaukpânga.

²⁸ Palleksimavlunga agvertarpunga, sekᴋerngublo akkinârtilaungigalloartânga; nikkovipunga illagêt akkornganne avâlalungalo.

²⁹ Kuglugitsat ᴋattangutigivânga, tingmitjallo Straussit illagivânga.

³⁰ Amera sillatimne ᴋernertaumavok, saunikkalo pannersimavut ᴋiangmut.

³¹ Harfekotiga, ârusungningorpok, nipsauteᴋotigalo ᴋêangningorpok.