Hiobe 29 - Labrador Inuttitut Heritage Bible

Hiobib illiornerilauktane ânanâk, pilloringnerilauktanelo oᴋautigivak.

¹ Hiobiblo ama oᴋâlanine pigiarpait, oᴋarlunelo:

² ᴋanoktôk, înajaruma takᴋit sivurlinginêtut, uvlunetut Gûdib sapputsivigijanginnê uvamnik.

³ ᴋaumautinga ᴋaumalauktillugo niaᴋorma ᴋollâne, uvangalo tâpsoma ᴋaumaningane agvertartilûnga tâktome!

⁴ Ilaungniptut inosungnima nalliuningane, Gûdib nallonarninga igluma ᴋollânêlauktillugo;

⁵ Ajugaᴋangitok uvamnêlauktillugo sulle, ᴋittorngakkalo avatimnêtillugit.

⁶ Tumikka ubvarlugit pilauktilûnga imub orksuanut, ᴋairtullo kôktitsilauktillugit uvamnut kôngnik orksulingnik;

⁷ Annilaurama iglugasaksuit upᴋoaksoanginut, iksivautaralo âkiksortaukolaurapᴋo apᴋosinerme iglut akkorngane;

⁸ Inosuktut takkolauramga ijertillutiglo ingminik, inutoᴋaujullo nikkovijuteᴋalauktillutik uvamnik;

⁹ Angajoᴋaunerôjut nippangerlauktillugit aggangniglo illijitillugit ᴋaniub ᴋânganut;

¹⁰ Atannît nippingit ergotilauktillutik, oᴋangillo nippingatillugit ᴋilanginne.

¹¹ Siutit nalliata tussalauktima pilloringneralaungmanga; ijillo nalliata takkolauktima nertulaukpânga.

¹² Ajulertok avâlajok piulilaurapᴋo, illiârsuglo Ikajorteᴋalaungitok.

¹³ Asserortuksaulauktub saimartitsiningata tupvigilaukpânga; uigarnerublo ômattinga ᴋuviasuktilaukpara.

¹⁴ Idluarnek annorârilaukpara, attilauktara; idluarneralo ulligilaukpara, nessâlugilugolo attannersiutigilugo.

¹⁵ Ijiolaukpunga tautungitomut, tussiatublo ittiggarilaukpânga.

¹⁶ Atâtaulaukpunga aklujunut; sunalo ᴋaujimalaungitara, tamanna nautsertorasualaukpara.

¹⁷ Idluitullijub erᴋlerpângit serᴋomilaukpakka, aksârnigaujullo aksorotilaukpakka kigutinginnit.

¹⁸ Isumalaukpungna: Uvlorijamne toᴋojomavunga uvlukkalo unuktôtitsomavakka siorᴋatitut.

¹⁹ Amârijara immermut tikkitaujungnalaukpok, misuksoarlo nokᴋangalaukpok akkerᴋumne.

²⁰ Ananaunera nutângolilaukpok uvamne; pittikseᴋotigalo idluarnersaupallialaukpok aggamnêdlune.

²¹ Tussanârtaulaukpunga (angutinnut), tâpkoalo nippangerput, uttakkilutiglo attanertuinimnik.

²² Oᴋautsimalo kingorngane oᴋartoᴋarungnailaukpok; oᴋâlanimalo kusservigivait.

²³ Utakᴋilaukpânga sillaluktut, ᴋannitiglo aitalaukpait (kêmitingnermut) sillalungmut unuksiumut sôrlo.

²⁴ Kungajarailaurupkit, iktoriktailuarutigilaungilât tamanna; kênamalo ᴋaumaningata mikkinersautilaungilânga.

²⁵ Piniaraksanginnut ᴋaijomalaurangama, tagva isukliovlunga iksivajariaᴋalaukpunga; nunakalauklungalo attannertut sorsuktuksat ᴋattimgajut akkornganêtotut, mannigoijotut kiksartunik.