Hiobe 28 - Labrador Inuttitut Heritage Bible

Inuit sunatuinarnik nachvâralloarput, nachvâratik sillatunermik Gûdemit pijomik.

¹ Silbere apᴋosineᴋarpok, Goldelo inneᴋarpok auksearijauvigijaminik.

² Kikkiak aijauvok nunab illuanit, ujarᴋanillo kannujak auksearijauvok.

³ Târnek naggateᴋartitauvok, illûnanelo nâmaksinerpângojut kennerasuartauvut, unnuablo tachaublo ujaraktangak.

⁴ Kôk suppivok tagvunga innemit takkorngartomit, puailavillo puigortaumajut ittersâlungmit; inub ᴋalluvait nungutilugit, ipterililerpok.

⁵ Nunaᴋarpok, tâpsomangat ᴋollâne nerᴋiksat perorsavut, illuanelo mumiktauvok ikkomatut.

⁶ Ujarangita illuanne Safir nachvârtauvok, ivjungillo ᴋattingajut Goldeᴋarput.

⁷ Apᴋosinek tâmna illitarijaulaungilak nektoralingmut atautsemullonêt, kiggaviublo ijingata takkolaungilâ.

⁸ Tullertaulaungilak piojorijub ᴋittornganginnut, Loeviblo atautsiblonêt pisugvigilaungilâ.

⁹ Aggait illijauvut ujarᴋanut alligojaujunut, ᴋakᴋallo aggarsortauvut amângit tikkidlugit.

¹⁰ Kôgut annititaulerput ᴋairtunit, ijiblo pivianartut tamaita takkovait.

¹¹ Kôgut kugvingit agviartauvut, sagvangitorlo ᴋaumajomut âtauvok.

¹² Nanele ilisimanek nachvârtaugalloarᴋâ? Sillatunerublo inninga nanêᴋâ?

¹³ ᴋaujijoᴋangilak nane nallamangât, nachvartaungilarlo inôjut nunangane.

¹⁴ Ittersâluk oᴋarpok: Uvamnêlungilak; immarbiglo oᴋarpok: uvamnêlungilak.

¹⁵ Golde illaᴋangitok tunijaujungnangilak tâmna ilisimanek pivlugo, Silberelônêt kiktitartaujungnangilak tâmna akkileromavlugo.

¹⁶ Golde Ofiremit nelligingilâ, pivianartut Onichelonêt Safirelolonêt (ujarᴋat).

¹⁷ Goldelo Diamantelo adsigijungnangilâk, pivianartoksoarmullonêt Goldeojomut taungniararijaujungnangilak.

¹⁸ Korallit alligorlo kamagijaungilet. Ilisimanek anginersautitaujariaᴋarpok sappanganit.

¹⁹ Topâse Etiopiamit nalligijaungilak tâpsomunga, Golde ivsornainerpâk nalligingilâ.

²⁰ Ilisimanerle nakingme pilerᴋâ? Sillatunerublo inninga naneᴋâ?

²¹ Inôjut tamaita ijinginnit ergusimavok, ijersimavorlotauk tingmitjanit ᴋilaub atânêtunit.

²² Asserorsimanek toᴋolo oᴋarpûk: Siutiptingnut tussaumajangat tussalaukpavut.

²³ Gûdib apᴋosinek tâpsomunga ᴋaujimavâ, illitarilâlo inninga.

²⁴ Tâpsoma nunab isungit takkungmagit, tamaitalo ᴋilait attânêtut tautukpait.

²⁵ Annore oᴋumaineᴋartilauramiuk immarlo âkêvigilauramiuk angininganik;

²⁶ Sillaluk kiglilervêᴋartilauramiuk, ᴋaumalaillo ᴋalluglo apkuteᴋartilauramigit:

²⁷ Tagva takkolaukpâ, nellonairpâlo, âkᴋilugolo, nachvârpâlo.

²⁸ Oᴋarlunelo inungnut: Ahâk, sivôranek Gûdemik, tamanna ilisimaniovok; attortailinerlo idluitomik, tamanna sillatuniovok.