Hiobe 27 - Labrador Inuttitut Heritage Bible

Hiobib idluitullijok makkojugivâ.

¹ Hiobelo piganerpok, oᴋâlaninelo pigiarpait oᴋarlunelo:

² Sôrlo Gûde mikseᴋârtomik inôngmat, idluarnimnik Takkoᴋojilungitok uvamnik, ajugaᴋangitorlo kiksartitsijok tarnimnik;

³ Annernima uvamnêninga nâlugo, annerterinerlo Gûdemit pijok kingamnêtillugo:

⁴ Kangasinâᴋa oᴋartuksaungilak sunamik idluitomik, oᴋaralo uivêriklernermik oᴋauteᴋartuksaungilak.

⁵ Tamanna ungasigle uvamnit idluarneraraksarigapse; anernêngerᴋârnanga idluitailinera nûlerᴋojomangilara uvamnit.

⁶ Idluarnera tigumitoromavara, sapᴋojomalungilaralo; ômattima passilungilânga inôsera tamât pivlugo.

⁷ Omigijigale Gûdeᴋangitotun îlerniarpok, akkerartortigalo idluitullijotut îleromârpok.

⁸ Takkomôrtuble nerriungninga sunauvâ? illipaudlaralloarmat, Gûdib tarninga tigukalladlarpago?

⁹ Isumavît Gûdib avâlaninga tussarniarmago, kappianartub tikkiniarpago?

¹⁰ Ajugaᴋangitok ᴋuviasutigijungnarᴋaûk, Gûdelo nipliavigijungnarᴋauk nelliutune tamaine?

¹¹ Ajuᴋertoromavapse Gûdib agganginnik; ajugaᴋangitublo nâmagijangit angiarijomangilakka.

¹² Ahâk, ilûnase takkolaukpasse; sôg tagva taimaitunik sunaungitunik sakᴋêvisê?

¹³ Tagva inub Gûdeᴋangitub akkilertauninga Gûdemut, atanniâluillo kingormgutijangit ajugaᴋangitomit tigujomârtangit.

¹⁴ ᴋittorngaᴋarpat unuktunnik, tagva tâpkoa saviksoarmut illinganiarput; kinguvângillo nâmaktomik nerᴋiksaᴋarniangilet.

¹⁵ Amiakungit toᴋome illijartortauniarput, uigarningillo ᴋêaniangilet.

¹⁶ Kênaujanik illagêktitsigalloarune saniktitut, annorâniglo kattersigune machaktut:

¹⁷ Tagva sananiaralloarpâ, idluartuble atiniarpâ, passijaksaungitublo kênaujat aitortorniarpait.

¹⁸ Iglune sanavâ âsivaktut, sôrlolo udsertorte okkoalineliormat.

¹⁹ Akluitok nallalerune, sunamik tigusikallaklune neksarniangilak; uitaniarpok pitaᴋarniangilarlo tagvane sunamik.

²⁰ ᴋoaksârnerub opingarniarpâ immektut, unuarme sillarnerluksûb tiguniarpâ.

²¹ Unnangâb tiktautiniarpâ, tagvungarkalladlarᴋovlugo, akkonalidlarlunelo nûtiniarpâ inninganit.

²² Tâpsoma (Gûdib) uvigarniarpâ nikkaginiangilâlo; tagvainak ᴋemâjariaᴋarᴋovlugo tâpsoma agganginnit.

²³ Pattaktorutigijauniarpok, kôkoviarutigijauniarlunelo.