Hiobe 26 - Labrador Inuttitut Heritage Bible

Hiobib Gûdib angininga oᴋautigivâ Bildademut.

¹ Hiobe kiovok oᴋarlunelo:

² Sunamik mânna ᴋaujimangertok ikajulaukiûk? ᴋanok tallek nukkingerotijok piulilaukiûk?

³ Sunamik atannertuinermik tunnijilauᴋît ilisimalungitomut? Sakᴋertitsilutillo kajusimanernik unuktunik?

⁴ Kina oᴋarᴋattigiviûk? Kialo anerninga anilerᴋa illingnit?

⁵ Inukpait kappiasukput immaksuit atânne, tâpkonanelo nunaᴋartut.

⁶ Kappianartovik ussingavok tâpsoma sângane, asserorsimanerlo ulleᴋangilak.

⁷ Tâpsoma unnuab ketterarninga issivipâ pittaᴋajuitub ᴋânganut, nunalo nivingatipâ sunaungitomut.

⁸ Imeksuit kattertipait nuvujaᴋotiminut, nuvujallo allilungilet tâpkoa atâne.

⁹ Iksivautaksoarme kênanga atsungertipâ, nuvujaᴋotinelo issivitipait sânganut.

¹⁰ Imaksuit avatâne kiglilerveᴋartitsilaukpok, ᴋaumajub târniublo nâningak tikkidlugo.

¹¹ ᴋilaub sukkangit sajukpilukput, kakkilâdlarlutiglo suarninga pivlugo.

¹² Pitsartunerminut imarbik uimajartipâ, sillatunerminullo ingiuliksoangit nokᴋartipait.

¹³ ᴋilangme ânanaulerpok annoringanut; aggangita kuglugiak naggojok sanavât.

¹⁴ Ahâk, tamadsa apᴋosiningita illangit; oᴋautsemiglo mikkijoârsutuinarmik tussalaukpogut tamattomangat ila! Kiale pitsartuningata kallungninga tukkisijungnarᴋaûk?