Hiobe 24 - Labrador Inuttitut Heritage Bible

Hiobib appertsorninga suna pivlugo Gûdib piniarlungnerit agviarlungimangâgit.

¹ Sog nelliunerit ajugaᴋangitomut torᴋortauvât? Sôglo (inuit) illitarijingit tâpsoma uvlunginik takkolungilat?

² Tâpkoa (Gûdeᴋangitut) kiglilervît nûtipait, nergjutit ᴋattimgajut arktautigivait mianerilugillo.

³ Illiarsuit siuteᴋoktojoᴋotingit ungorpait tagvangat, uigarnerillo tuktuvakotingit tiguvait sattoraksautilugit.

⁴ Aklujut allingitârijariaᴋarpait, sukkôjullo nuname ilûnnamasiatik ijeriaᴋarput.

⁵ Ahâk ômajutitut nujuartutitut sunaᴋajuitomêtutitut annivut sulijaksamingnut, aksârnigaujuksat kenâlugit; inuᴋajuitok ᴋakᴋôjauvok tâpkonunga nukapianginnullo.

⁶ Kattersivut perorsêvingme perortunginnik, perorsêvîllo Weineliksat, nâmangitullinermut pigijatik nunivarivait.

⁷ Ussingajut nellainartipait annorâᴋaratik, ᴋebbiᴋarungnaitilaitalo itseᴋarningane.

⁸ Kairtunut aijariaᴋarᴋovlugit, suarutab ᴋakᴋanit pilune koverijarangagit; assianik mannigorutiksaᴋanginamik.

⁹ Illiarsuk tigukallakpât iviangêngnit, sattoraksangortipaillo pattangajub pigijangit.

¹⁰ Ussingajok aularᴋovât annorâᴋarane, kâktullo tâpkoa ᴋippitajoᴋotingit ᴋakᴋojaksagit akjartorpait.

¹¹ ᴋarmangita akkorngane orkserijariaᴋarput sêmiksivlutik, iptêjaivik tullerpât immerudlarlutiglo.

¹² Inuit iglugasaksoarnêtut annersaumitipait, unatartaumajullo tarningit avalâtipait; Gûdiblo passilungilait idluitullinermik.

¹³ ᴋemailaukput ᴋaumajomik, apᴋosininganiglo illitarksingilet, tuminginnelo nokᴋangalungilet.

¹⁴ Uvlogatâlerangat inuartok makkipok, toᴋotsilunelo aklujomik pêtôjomiglo; unnuamelo tigliktotut ipok.

¹⁵ Nulliarêngnermik asseroijub ijingata allajalernek kamagivâ, oᴋarlunelo: Ijib atautsiblonêt takkolungilânga; kênânelo ullikpâ.

¹⁶ Tâmna tâktome ittârpok iglunut. Uvlôtillugolo pallangairutivut, ᴋaumanerlo illeragivât.

¹⁷ Uvlâk tâpkonunga toᴋub tachangatut îmat; tâktub erᴋsinarninginnik sungiusimagamik.

¹⁸ Imna koksalaidlarlune imarbiksoakut sôrlo ingerarsâdlarpok, illangiusianga nuname ôminarsijauvok, sâlungilak perorsêvît Weineliksaggit apᴋosininganut.

¹⁹ Kappianartoviub idluitullijut tiguvait, sôrlo kiab pannidlarnerublo imek apputaulauktok nerringmakko.

²⁰ Igliab puigorpâ, ᴋoppergut ᴋuviagivait; erᴋaumajaujungnaipok; piniarlungnernik pijok, nappijauniarpok nappârtotut.

²¹ Kiksartitsilauktok ᴋittorngisuitomik, ernisuitomik; uigarnermullo ajungitullilaungitok;

²² Sôngojuniglo aksorutjilauktok attiminut pitsartunerminut. Tâmna makkitalaurangame, tagva kialonêt inôsinga ussornarnarlaungilak.

²³ (Gûdib) tâmna ussornarnartoᴋartipâ, sungertutigijanganik, ijikitalo pinniarningit takkonârpait.

²⁴ Nelliutomik siviktomik kagvertisimavut, nipalerpullo, nungutaulerlutiglo, sôrlo ilûnaita tigukalladlartaungmatta, kippijauvlutik sullugainertut nauligaujamit.

²⁵ Taimaingilâk? Kia sagloneraromavânga nellonailêjomalunelo, oᴋâlanera suksaungimat?