Hiobe 23 - Labrador Inuttitut Heritage Bible

Hiobib Gûdib erᴋartuininga sungertutigivâ.

¹ Hiobe kiovok, oᴋarlunelo:

² Oᴋâlanera kiksarnartuarpok sulle; kappiagijara oᴋumainersauvok annersauminimnit.

³ ᴋanoktôk ᴋaujinajarlanga, ᴋanok nachvârungnarmangâpko, tikkitsungnarlungalo iksivautanganut;

⁴ Idluarnerlo pitilugo sânganut; ᴋaneralo tattatilugo nellonailêjutiksannik;

⁵ ᴋaujititaulungalo oᴋâlanermik, kiguserinajartanganik uvamnut, timeroilarmalo oᴋauserinajartanganik uvamnut!

⁶ Pitsartunermut angijomut aivajarinajarpângâ? Aukak, kamaginajarpângale.

⁷ Tagvane nellâgôrtub akkiorungnarajaralloarpâ; uvangalo pitlartaunanga erᴋartortimnik annigoijomagajaralloartunga.

⁸ Mânnale tukkimuarmarigangama, tagva tâmna tagvanêngilak; utterumalo, tagva mallugingilara.

⁹ Pinniarviᴋarune saumiub tungâne, tagva tautungilara; ijerune tallerpiub tungâne, takkungilara.

¹⁰ Tâpsomale apᴋotigijara illitaritsiarpâ. Tapsoma ôktorlanga, tagva sakᴋeromavunga Goldetut.

¹¹ Itigakka pitigapkit tâpsoma tuminginnut, apᴋosiningalo attungênarpara, saniagôrnangalo.

¹² Kangasinâkitalo perᴋojangak tunulunginapᴋo ᴋaningatalo oᴋâlaninga torᴋornersarivara illusimnit.

¹³ Tamna inutôvok, kia sangutitsomavaûk? Piniarpâlo sôrlo pijomagametut.

¹⁴ Tunnijigune pijaksamnik, tagva taimaitoᴋarnersauvok sulle tâpsomane.

¹⁵ Tamanna pivlugo ᴋoaksârutigivara; isumaksarsiorutigigupkolo, tagva mungorpunga sângane.

¹⁶ Gûdib ômattiga iktortimavâ, ajugaᴋangitublo ᴋoaksârtilaukpânga.

¹⁷ Nungutaulaunginama târnek tikkilauᴋârtinago, tâksinerlo ullilaungimago sâmnit.