Hiobe 22 - Labrador Inuttitut Heritage Bible

Elifase pingajuanik oᴋâlavok.

¹ Tagva Elifas. Têmanemiok kiovok oᴋarlunelo:

² ᴋanok angut Gûdemut attornaralloarᴋâ, ingminut attornarune sillatojotut?

³ Isumavît ajugaᴋangitok ajungitulliviongmat, idluaruvit? Piksarsinarmallônêt tâpsomunga, apᴋosinitit nangarnarnak attorungne?

⁴ Sivuranermut illingnik pitlarniarᴋâtît? Itterᴋattiginiarᴋâtit erᴋartuivingmut?

⁵ Kassênît angiluarlungilâk, idluitullinitillo Naggateᴋangilât?

⁶ Immaᴋâ ᴋattangutingnit pitjuteᴋarnak sattoraksak tigulaukpet, ussingajut anoraijalaukpâttit.

⁷ Merngortortut imertilaungilettit immermik, kâktorlo kippilulaukpet ᴋakᴋôjamik.

⁸ Talleᴋalauktok, tâmna nunamik peᴋalaukpok, opinalauktorlo, tâmna iksivatsialaukpok tâpsomane.

⁹ Uigarnerit sunaᴋaratik aularᴋolaukpâttit, illiarsuillo tallingit nappijaulaukput.

¹⁰ Tamana pivlugo aklunâtjanut nappersimavotit, erᴋsinerublo tagvainak ᴋoaksârtilaukpâtit;

¹¹ Târmullonêt, illujaumavotit takkojungnarᴋonnak; ingerganiublo ulligariaᴋarpâtit.

¹² Gûde kotsiktome ᴋilangmêlungilak takpâne? Ahâglo, uvloritjat takpâne, ᴋanok kotsiktigijôngmatta!

¹³ Igvillo oᴋarpotit: Sunamik Gûde ᴋaujivâ? Tâmna tâktub ungatâne erᴋartuijungnarajarᴋâ?

¹⁴ Nuvujat ulligivait takkonanelo, agvertarlunelo ᴋilaub angmalokitauningane.

¹⁵ Sillaksûb apᴋosininga idluitut agvertarvigilauktangit kamagijomaviûk?

¹⁶ Tigujauᴋalladlarluktut, nelliutilauᴋârtinago, ullitorniublo tungavingit ergulaukpâ.

¹⁷ Gûdemut oᴋalauktut: Aularit uvaptingnit; Ajugaᴋangitublo sunamik piniarvigijungnaralloarpagît?

¹⁸ Iglunginik tattatitsigalloarlune perᴋutinik. Gûdeᴋangitulle kajusimaningit ungasiklit uvamnit!

¹⁹ Idluartut takkoniarpât ᴋuviasungniarlutiglo, passijaksaungitublo, mittautiginiarpait.

²⁰ Sunaubva illinganingit nipangniarpok, amiakungillo ikkomab nerriniarpait?

²¹ Tagva mânna ullapᴋoseruk, ullapirsauteᴋarlutillo; tamattomangat ajungitomik piniarpotit.

²² Malligaksauᴋojaujut ᴋaninganit illaliorkit, oᴋâlaningalo ômamiutarilugo pît.

²³ Sâlerniaruvit ajugaᴋangitomut, tagva sanajauniarpotit; idluinerlo ungasiktiniarpet iglungnit.

²⁴ Tagva Golde ilinniarpet nunab iluanut, Golde Ofiremit kôgut ujaraktanginnut;

²⁵ Ajugaᴋangitorlo Goldeoniarpok illingnut, Silbereôlerniarlunelo illingnut ᴋallerêktitaumajut.

²⁶ Tagva ajugaᴋangitok ᴋuviasutiginiarpet, ârlorniarlutillo Gûdemut.

²⁷ ᴋenuviginiarpet, tâpsomalo tussarniarpâtit; angernerilauktatillo akkilerniarpattit.

²⁸ Piniaromajarne tamaine, sulidlarniarpotit, ᴋaumajublo apᴋoserijat ᴋaumarniarpâ.

²⁹ Tâpsoma nikkanarsârtut ingminik angijorortimmagit; ijîngminik ᴋattalungajok pijungnainiarpok.

³⁰ Ilâ passijaksaungitôlungitok piulijauniarpok; piulijauniarpok aggakpît ivsornaininginut.