Hiobe 21 - Labrador Inuttitut Heritage Bible

Hiobib akkerartortine akkiorpait.

¹ Hiobe kiovok oᴋarlunelo:

² Nalagitsetôk oᴋauserijamnik, taimailioritselo mannigoinipse inningane.

³ ᴋenuêrsarvigissinga, oᴋâlaᴋovlungatauk, kingornganelo mittautigissinga.

⁴ Atsoila inungnut ârusukîk? Sôglo annernera ᴋunujuksaulungilâk?

⁵ Savigissinga; tattaminiarniarpose, aggasselo illijariaᴋarniarpasse ᴋanermut.

⁶ Erᴋaumajarangapᴋo ᴋoaksârpunga, uvinigalo sajungnermut tikkitauvok.

⁷ Sôg Gûdeᴋangitut inôvât, inutoᴋaulerlutik, perᴋuteᴋarpallialutiglo?

⁸ Kinguvângit ussornarnarput avatinginne, nutaijoktungillo perorsavut ijingita sângine.

⁹ Iglungit ullapirsauteᴋarpok ᴋoaksârnermit, Gûdiblo issaᴋautingata ᴋollangiarlungilait.

¹⁰ Tuktuvakotingit angusalluit illautitauvut, Sulingitoᴋalungilarlo tâpsomunga; tuktuvaᴋotingalo arnak nochaᴋarpok alliktoranelo.

¹¹ ᴋittorngangit inûtsut annivut ᴋattimgajutitut, Nukapiaᴋotingillo kiggertarput.

¹² Igiaᴋomijarput, ᴋilautit Harfillo attorᴋassiutilugit, serridlarlutiglo nipsausijarnerme.

¹³ Inotoᴋaulerput uvlune ᴋanoêngitsiartune, serlerlo kappianartovik ᴋoaksârutigivât ijib kabluᴋealerningane atautseme.

¹⁴ Oᴋaralloarput Gûdemut: Aularit uvaptingnit; uvagut apᴋosinitit ᴋaujijomangilavut;

¹⁵ Ajugaᴋangitok kinauvâ kivgartoraksarigaptigo? Ubvalo sunamik âkᴋiktaunersauneᴋarᴋita nipliavigiguptigo?

¹⁶ Ahâgle, perᴋutingit agganginnêlungilet, tamanna pivlugo Gûdeᴋangitut isumangit ungasiktuksauvut uvamnit.

¹⁷ Ila Gûdeᴋangitut ᴋaumautingat kamileromârpok, ᴋanoêtoᴋotingatalo tikkiniarpait! Ningarnermine ômattib kappianarninganik aitortuiniarpok.

¹⁸ Ivit nakkangititut annoremut îniarput, sanniktitut, akkonaksûb tiktautitangititut.

¹⁹ Gûdib tâpsoma ᴋanoêninga komergutigivâ ᴋittornganginnut. Akkiniarniarpago, tagva tamna tukkisiniarpok tamattominga.

²⁰ Ijikita asserortauninga takkojomârpâk, Ajugaᴋangitublo ilûngertorninganit immeromârpok.

²¹ ᴋanoêtomigle ᴋuviasuteᴋarniarka iglune pivlugo kingornermine? Takkingitalo unnurningit ketterartaulerpatta?

²² Kia Gûde ajuᴋertorungnarᴋaûk, pôktojunniktauk erᴋartuijok?

²³ Tâmna toᴋovok nukkeᴋarlune, atsuilivlunelo, pittakaloringnerme merngoêrsernermelo.

²⁴ ᴋattat makiktervingit tattaput imungmik, sauningillo kuinititauvut pattermut;

²⁵ Imnale toᴋovok tarneᴋarlune kiksartomik, nerrilaungitsainarporlo ᴋuviasuklune;

²⁶ Adsigêklutiglo sennilerêklutik nallavuk nunab illuane, koppergullo ullikpakit.

²⁷ Ahâk, isumase illitarigalloarpakka, kajusimaniselo piungitut akkerartorlunga.

²⁸ Oᴋarapse; Ataniub iglunga nanêkâ? Tupperlo Gûdeᴋangitut innigilauktangit nanêᴋâ?

²⁹ Ingergajut apperilaungipissigîk, nellonaikutangillo illitaringipissigîk?

³⁰ Idluitok nikkagijaungmat asserornartub uvlunganut, kaningajarnerublo uvlungane ittertitaujomârpok.

³¹ Kia oᴋautijungnarkaûk kênanganut, sunamik piniarviojuksaugalloarmat? Kia piniarninginnik akᴋiniarungnaralloarᴋaûk?

³² Illuvermullo âtauvok, pigârlunelo katsiktome.

³³ Naksab ivjungit nerromikput tâpsomunga, sillaksoarmiullo ilûnaita unniarpait kingôrnermine, taipkoalo sivurlerilauktangit kittiksaungilet.

³⁴ Ila sulinase mannigorpapsinga, kiugusiselo naipitauvut idluangitôvlutik!