Hiobe 20 - Labrador Inuttitut Heritage Bible

Zofarib kiupsârninga.

¹ Tagva Zofar Naêmamiok kiovok oᴋarlunelo:

² Isumama tamattominga kiojutigivânga, tamannalo pivlugo singomavunga illupkut.

³ Tussaromavunga, kia tamanna pivlugo pitlaraksaringmangângma, ᴋaᴋiarijaksarivlungalo; sillatunima annerningata kiguseᴋartitaksaringmanga.

⁴ ᴋaujimangilatit taimaitsainalaungmat Inuᴋatainarninganit nuname:

⁵ Gûdeᴋangitut opigijauningat akkunêrlungimat, takkomôrtublo ᴋuviasungninga ijib kabluᴋearlarningatut atautsetut sivitutigijôngmat?

⁶ Pôktoninga ᴋilaub illua tikkilugo pigalloarpat, Niaᴋungalo aktoralloarpat nuvujanut;

⁷ Sulle nungumaringniarpok anangatut, taipkoa takkolauktut tâpsominga oᴋarniarᴋovlugit: Nanêᴋâ?

⁸ Sinaktomanertut tingilerpok nachvârtaunanelo: takkotitjutitut unuarme nipakpok.

⁹ Ijib takkolauktub tâpsominga takkojungnainiarpâ, innigilauktangatalo tautugungnainiarpâ.

¹⁰ ᴋittorngangita aklujut ullapᴋoseromârpait, (ᴋittorngangitalo) aggangitalo tapsoma nâmangitullinine sattortautiniarpait.

¹¹ Sauningit nâmavut ajorninginnik angiarijaujunik, tapᴋoa tamna illagillugo nellaniarput nunab illuanut.

¹² Kassênek ᴋanermine mamarigalloarpago, ijerpagolo Oᴋame atâne;

¹³ Ivlerigalloarpago, ipperarnagolo, pigênarpagolo ᴋanermine:

¹⁴ Tagva nerᴋingit erchavinginne ablatsângorniarput, sungangorniarlutiglo kuglugiamit, Otteremik taijaujomit ilûngane.

¹⁵ Perᴋutit êlauktane, kesserariaᴋarivait Gûdiblo toggarniarpait nânganit.

¹⁶ Otterit toᴋonartungit millugiarniarpâ, kuglugiablo Natteremik atigub, oᴋangata toᴋoniarpâ.

¹⁷ Takkoniangilak kôngnik, kôksoarnik, kôktitsijunik igupsaujartut orksunginnik, imublo orksuanik.

¹⁸ Sananermut pinasualauktane uttertitsariaᴋarpait, attoraksaringilaillo, perᴋutitut ablatsângornek iniarivok, ᴋuviasutigilugit perᴋonago.

¹⁹ Aklujok oᴋumaiksartilaungmago, ᴋemalauklugolo; iglut aksorornermut nangmineliutilaukpait, sanalaungitane.

²⁰ Natjak nâmaksijungnalaungilak; tamanna pivlugo Pivianartoᴋotiminit sunamiglonêt piuliklerniangilak.

²¹ Nerᴋiksangit simnikoᴋaniatsengilet; tamanna pivlugo ᴋanoêngitsiarninga soᴋosijuiniangilak.

²² Pittaᴋalorigalloarune aksigalloarunelo, sulle kappiasulerniarpok; siorniornartut sunatuinait tikkiniarpât.

²³ Natjak atausiarlutik tatalerniarpûk; Gûdib ningarnime ilûngertudlarninga tilliniarpâ tâpsomunga, sillalugvioᴋoniarpa tamattomunga nerrimârtillugo.

²⁴ Sagvingmiutak kikkiangojok ᴋemâniarpâ, pittiksiublo ᴋannujaujub unnangminiarpâ.

²⁵ Saviksoak kênailitaᴋangitok tunnuagut anniniarpok, saviksûblo ᴋaumalangit sungangagôrniarput, ingergadlarᴋovlugo tagvunga, ᴋoaksârnerublo ᴋollangiarlugo.

²⁶ Târnek tamât komergutigijauvok tâpsomunga pivianartokotinginnut illingaᴋovlugo. Ikkomab nerriniarpâ supportaumalungitub; amiakojorlo iglungane illingalungniarpok.

²⁷ ᴋilaub idluitulliningit nallonairniarpait, nunalo makkitaniarpok akkerartorlugo.

²⁸ Iglungata ᴋematulliosimajungit ingerarniarput, siamartitauvlutik Gudib ningarningata uvlungane.

²⁹ Tamadsa inub piniarluktub akkilertauninga Gûdeme, oᴋâlaningatalo kingormgutijanga kotsingnerpâme.