Hiobe 2 - Labrador Inuttitut Heritage Bible

Hiobib âniatitauninga timimigut, kiksartitauningalo aipaminut, nellipsartauningalo illanârijaminut pingasunut.

¹ Pijoᴋalaukporle uvlorme taipsomane, Gûdib ᴋittorngangit tikkimatta nangeriartorlutiglo Nâlekab sânganut, Sâtanasibtauk tikkiᴋattigivait, nangeriartorlunelo Nâlekab sânganut.

² Tagva Nâlegak Sâtanasemut oᴋarpok: Nakit pivît? Sâtanasib Nâlegak kiovâ oᴋarlunelo: Nuna ingergavigilaukpara.

³ Nâlegak Sâtanasemut oᴋarpok: Kivgara Hiobe Kamagilaungiᴋiûk? Nunamêtoᴋalungimat adsinganik, nellâgôrlune, idluartôlunelo, Gûdemik sivôralune idluitullitailivok, soᴋosijuiporlo sulle idluitailinermine; igville pitjuteᴋarnanga asseroitilaukparma tâpsominga.

⁴ Sâtanasib Nâlegak kiovâ oᴋarlunelo: Amek, ammermut pijauvok; tamaitalo angutib pigijane nippotivait inôtsine pivlugo.

⁵ Kisiane aggaktit issakit aktorlugillo sauningit uviningalo; sunaubva oᴋarnerlotiginiarpâtit kênarnut.

⁶ Nâlegak Sâtanasemut oᴋarpok: Ahâk aggangnêlerle; kisiane inôsinga ivleriuk.

⁷ Tagva Sâtanase aularpok Nâlekab kênangata sânganit, annauvâlo Hiobe ajoarâlungnut itikkat allunginnit kabjinga tikkidlugo.

⁸ Machavinerlo tiguvâ savigarlunelo ingminik tâpsomunga, iksivalunelo arksâne.

⁹ Nulliangatalo oᴋautivâ: Sulle idluitailinit ungagiviûk? Ilâ Gûde oᴋarnerlotigiuk, toᴋolutillo.

¹⁰ Tâpsomale oᴋautivâ: Oᴋarpotit sôrlo arnat sillaitut oᴋarmatta. Ajungitomik pilauktogut Gûdemit idluitoktauk illalioraksaringipittigô? Tamakkonane tamaine Hiobe idluitullilaungilak kangasinângminut.

¹¹ Hiobible ilannârijangit pingasut tusaramik ᴋanoêtunnik tamainik tikkitautigijanginik, tikkiput, attunnit nunagijamingnit, Elifas Têmanemit, Bildad Suamit, Zofar Naêmamit. Isumaᴋattigêlauramik tikkitsomavlutik oggurilugo mannigorlugolo.

¹² ᴋaningitomillo takkosaramik, illitaringilât, nippitiglo annipât ᴋêalutiglo; attunnillo annorâtik allikpait egitsilutiglo saningnik niaᴋomingnut ᴋongmuartilugit ᴋillangmut;

¹³ Iksivaᴋattigivâllo uvlunik 7 inik unnuaniglo 7 nik, oᴋarᴋattigingilâllo sunamik; takkogamik âniak angijoksôngmat.