Hiobe 19 - Labrador Inuttitut Heritage Bible

Hiobib Gûdib ningausinga ârusutigivâ; nerriulerporle piulijaujomârnerminik tâpsomunga.

¹ Hiobe kiovok, oᴋarlunelo:

² Ilâ ᴋanok akkunertigijomik tarniga pagvisârᴋisiuk, serᴋalitilungalo oᴋautsinut?

³ Mânna tallimaujortoertorluse mittautigilaukpapsinga, kangusuktaililuselo avavâtinapsinga.

⁴ Tammaruma, tagva pivlunga tammarpunga.

⁵ Ilûngertorluse angijorortitsomavisse illipsingnik akkerartorlunga, suarlungalo kangusuktitaunera pivlugo?

⁶ Missiginiaritsetôk sukkutsiane Gûdib okᴋungatimanga, ômajoksiortimelo aklunânganut nappersimangmanga.

⁷ Ahâk, nipliagalloaruma aksorotijaunek pivlugo, tussartaulungilanga sulle, ᴋaigarsukpunga, idluarneᴋalungilarlo tagvane.

⁸ Tâpsoma apᴋosinera avaluliulaukpâ, ᴋângagôrungnarᴋonanga, târnermiglo pititsilaukpok apᴋotigijamnut.

⁹ Mattalaukpânga opigijaunimnik, niaᴋotelo tigulaukpâ Niaᴋumnit.

¹⁰ Nappilaukpânga illûnamaripkut, nungulerama, nerriungneralo nussulaukpâ nappârtotut.

¹¹ Ningarningata ilûngertorutigivânga, ômisukteônasugivângalo.

¹² Tâpsoma sorsuksoaᴋattigêktoᴋotingit illagêklutik tikkiput, apᴋosineliorlutiglo ingmingnut torârlunga, tangmârsimavlutiglo igluma avatâne.

¹³ ᴋattangutikka ungasiktilaukpait uvamnit, illakkalo takkorngartangorsimavut uvamnut.

¹⁴ Inuᴋattima kamagijungnairpânga, ilannârijamalo puigomavânga.

¹⁵ Iglomioᴋattima, kivgaᴋotimalo arnat tujormiangonasugivânga; illitarnarungnaimavunga ijinginnut.

¹⁶ Kivgara angut ᴋaikᴋolaukpara, tâpsomalo kiolaungilanga; ᴋenuvigijariaᴋalaukpara ᴋanimnut nangminimnut.

¹⁷ Annernera takkosungnaitomavok aipamnut; timima ᴋittorngangit ᴋenuvigijariaᴋarpakka.

¹⁸ Nukapitsettauk inôsuktut nachogivânga, makkitavigigangapkillo, tagva oᴋarnerlôtivânga.

¹⁹ Nertornartokotima ilûnatik makkojugivânga, nagligijamalo kiglornilerpânga.

²⁰ Saunikka nippingavut amimnut uvinimnullo, ᴋemâgarpungalo ikkika ameᴋartillugit.

²¹ Nâpkoarissinga, nâpkoarissinga illipse illânarijakka; Gûdib aggangita aktorsimangmanga.

²² Sôg unangmivissinga Gûdetut, nâmaksijungnaraselo uvinimnik?

²³ ᴋanoktôk oᴋâlanikka aglaktaunajarlit! ᴋanoktôk aglannut makpertanut adsiliortitaulit!

²⁴ Aglaumut kikiangôjomut (aglaktaulit) akᴋitomut, erᴋaumajaunermut issoᴋangitomut ᴋairtomut kepperortaulit!

²⁵ ᴋaujimavara piulijiga inôngmat, tâmnalo kingorliovlune nangeromârpok saningne;

²⁶ Kingornganelo amerma uvangaunera tamanna illumajomârpâ, uvinimnillo Gûde takkojomârpara.

²⁷ Tâmna takkojomârpara pivlunga, ijingmalo tautugomârpak takkorngârtubloungitok. Taktûka (ᴋilanârnermut tamattominga) nungutaumavuk sâmne.

²⁸ Oᴋarupse: Unangmijomavavut, patsitiksarsijomavluta tâpsomane:

²⁹ Saviksoak sivôragissiuk; saviksoak tâmna ningarniongmat idluitullinek pivlugo; ᴋaujimaᴋovluse erᴋartuiviᴋarmat.