Hiobe 18 - Labrador Inuttitut Heritage Bible

Bildadib ningarosuklune Hiobe Gûdeᴋangitunut kittikassiutivâ.

¹ Tagva Bildad Suamiok kiovok oᴋarlunelo:

² ᴋanga oᴋâlanerit sorairtitsomavissigîk? Kamatsialauritse, kingorngane oᴋaromavogut.

³ Sôg nergjutitut inasugijauvita ivsornarlutalo ijipse sânginne?

⁴ Nerᴋersudlartitotit illingnik annûnerne, isumavît pivlutit nuna ᴋemaktauniarmat, ᴋairtorlo inninganit nûtitauniarmat?

⁵ Gûdeᴋangitut ᴋaumaningit ᴋamminiaralloarpok, ikkomangatalo nutiktarninga keblerniangilak.

⁶ ᴋaumajok tâksilerniarpok iglungane, ᴋaumautingalo ᴋângane ᴋamminiarpok.

⁷ Apᴋosinerit perᴋutinginnut nerroᴋiniarput, kajusimaningatalo ochotiniarpâ.

⁸ Itigangita ochotimatsuk nullutjannut, agvertarporlo nullutjat ᴋângine.

⁹ Aklunâb kingminga tiguminiarpâ, nurlublo tigusârkallakpâ.

¹⁰ Aklunânga illijaumavok nunamut, mikkigiangalo apᴋosininganut.

¹¹ Avatâne illûnâne erᴋsinerub ᴋoaksârtiniarpâ tagvainak, allingisârniarpâlo ablornerne ilûnaine.

¹² Perᴋutigijangit kângniôniarput, pijaksaungitublo senneragik sillukpak.

¹³ Uviningata nukkingit nerriniarpait, ilâ taᴋangit Toᴋûb erneriᴋârtangata nerriniarpait.

¹⁴ Nerriungninga iglunganit pêjartauniarpok, ungorniarpâllo kappianarnerub attaninganut.

¹⁵ Iglunga iglugijauniarpok, amiakoᴋalungimat sunamik tâpsomangat; innigijangalo katterarvioniarpok orksorumik.

¹⁶ Attânit amângit pannilerput, ᴋollânillo perortungit kippijauvut.

¹⁷ Erᴋaumajauninga nunguniarpok nuname, atteᴋarniangilarlo apᴋosinerme.

¹⁸ ᴋaumajomit toᴋomut aulartitauniarpok, ajaktortauniarlunelo nunamit.

¹⁹ Erneᴋarniangilak, erngutaᴋarniaranelo Inugasaksoaᴋotime akkorngane; amiakojoᴋarniangilak iglugilauktamine.

²⁰ Kingurlingita uvlunga kakkilâdlarutigijomârpât; sivurlingillo kêongominiarput.

²¹ Tagva idluangitub iglugijanga; tamadsalo tâpsoma innigijanga Gûdemik nachojub.