Hiobe 17 - Labrador Inuttitut Heritage Bible

Hiobe ârusuganerpok, kappiasungnine passijaksaungininelo pivlugik.

¹ Anernera sangêpok, uvlukka kamisimavut, illuvek tagvanêpok.

² Sullelo mittautiksaᴋatsainarpok avatimne, ijigalo kappiagijamine sinniktariaᴋarpok.

³ Igvit sattoraksak nellonailiuk, akkisartorlungalo illingne! Kina pivlunga angeromavâ?

⁴ Tâpkoa ômattinginnit sillatunek ijertilaukpet: tamanna pivlugo angijorortiniangilettit.

⁵ Ilannârijiminik unertutjijub aksârnigaujungortilugit, tâpsoma ᴋittorngangita ijingit perlerniarput.

⁶ Tâpsoma oᴋausiongînartilaukpânga inuit akkorngane, makkojungnartoâlôjariaᴋarpungalo tâpkoa sângine.

⁷ Tautuga kernangajungorpok kiksarnermut, saunikkalo ilûnaita tachartut-iput.

⁸ Idluartut tamanna tattaminiarutiginiarpât, passijaksaungitullo makkitaniarput takkomôrtut akkerartorlugit.

⁹ Idluartuble sulle apᴋoserijane ungagitsainarniarpâ, ivsornaitunniglo aggalik sôngutsainarniarpok.

¹⁰ Attê, sâleritse ilûnasse tamaunga; ᴋailuselo; sillatojoksiniangilanga akkonapsingne.

¹¹ Uvlukka annigorsimavut, kajusimanikka ômattima pigilauktangit iguptersimavut.

¹² Unnuak uvlungortitauvok uvamnut, ᴋaumajorlo ᴋannipok tâksinermut.

¹³ Nerriugalloaruma, sulle kappianartovik iglogivara, tâktomelo inangaviga âkᴋiktaumavok.

¹⁴ Asserorsimanek atâtaunerarpara, ᴋoppergullo anânaunerarpara najaunerarlugolo.

¹⁵ Kina uttakkijaksarivigô? Kialo nerriungnera takkoniarpaûk?

¹⁶ Anernerit inningata, inuᴋajuininganut sittorniarpok, nerriungnera illagillunga nellaniarpok sanningne.