Hiobe 16 - Labrador Inuttitut Heritage Bible

Hiobib Elifas ârusutigivâ annersaumilunelo Gûdemut.

¹ Hiobe kiovok oᴋarlunelo:

² Taimaitomik tussarᴋattarlaukpunga. Ilûnnase mannigoijôvose piungitut pagvinartut.

³ Oᴋautsit oᴋausetuinaujut naggateᴋarniangilât? Sunamullonêt kajungersartauvît kiojariaᴋaravit?

⁴ Oᴋarungnarajaralloarivunga illipsetut, tarnisse tarnima inninganênajarpatta; oᴋautsinut opagomanajarpapsetauk, illekettamarutigiluselo taimâk.

⁵ Nekkoksijomanajarpapse ᴋanermut, kangasinângmalo mannigoiningata nikkaginajaraksarivâse.

⁶ Oᴋaralloarumale, âniab tagva nikkagingilânga; nippangeruma, tagva nûlungilak uvamnit.

⁷ Mânnale merngortortipânga; inera tamât asserorpet.

⁸ Imulloᴋartilaukparma, tamannalo kigligiutsivok akkerartorlunga; uvinerôtinerma makkitavigivânga passivângalo kênamnut.

⁹ ᴋaningaumajarningata aksorotivânga, ômigilungalo; kigutiminik kêtitsivigivânga; akkerartortima ijingne takpiksitipak pivlunga.

¹⁰ ᴋanitik aitarpait akkerartorlunga; kangunartomik erᴋsalaukpânga, ilûnatik kattutivânga.

¹¹ Gûdib unertûtigilaukpânga Gûdeᴋangitut agganginnut.

¹² Pillorilaukpunga, tâpsomale serᴋalitilaukpânga, kongesipkut tigulaukpânga, toggarlungalo serᴋomilaukpânga; nappautimalungalo torârviksautilunga ingminut:

¹³ Illujautilaukpânga pittiksertoᴋotiminut; taktûka koppilaukpak annajagilaungilaglo; sungara kovilaukpâ nunamut.

¹⁴ Ikkilênangortilaukpânga; oppalulaukpânga angutausertotut.

¹⁵ Pôksaijak mersorsimavara amimnut, naksugalo illimavara sanningnut.

¹⁶ Kênara puvimavok ᴋêanermut; ijingmalo atânêtoᴋarpok toᴋûb tachanganik.

¹⁷ Aggamnêtoᴋangigalloartillugo piniarlungnermik, tuksiarneralo ivsornaipok.

¹⁸ ᴋanoktôk nuna auga ullingniarnago! Nipliadlarneralo inniksarsiniarane!

¹⁹ Mânnatauk sulle, ahâk, kigligiutsijigijara ᴋilangmêpok; illitarijimalo kotsiktomêpok.

²⁰ Ilannârijakka mittauteᴋartôvut uvamnik; ijigale kugviorpok Gûdemut.

²¹ ᴋanoktôk angutib Gûde akkiorvigijungnarliuk, sôrlo inub ᴋittorngangata ilannârijane piniarvigingmago!

²² Jârille nellonairsimajut tikkiput, uvangalo aivunga tagvunga apᴋosinekut, utterviginiangitapkut.