Hiobe 15 - Labrador Inuttitut Heritage Bible

Elifasib kiopsârninga.

¹ Tagva Elifas Têmanemiok kiovok, oᴋarlunelo:

² Angutib illisimajub ajuᴋertûtsit annoregit oᴋauserijaksarivagit, nângnelo puveraksarivagik unnangârmut?

³ Pitlarniklune oᴋautsinut suksaungitunut, oᴋâlanernullo piutsengitunut?

⁴ Igvittauk sivuranek pêjaromaviûk, tuksiarnerlo Gûdib sângane mikkinersautilugo?

⁵ ᴋanerpit idluitullinitit ajuᴋertutigingmagit, annerosuklutillo oᴋamik nellangaitomik.

⁶ ᴋanerpit pitlarraksaunerarniarpâtit uvangaungitorlo; kangasinâkpît kiolutit akerartoraksarivâtit.

⁷ Igvit inungnit erniangomajunit sivurliôvît? Igvit ᴋakᴋârulait sivurngane pijaulauᴋît?

⁸ Igvit Gûdib kajusimaninga angigutsaumajok tussarlaukiûk? Igvit ilisimanek millulaukiuk illingnut?

⁹ ᴋaujimavît sunamik ᴋaujimangitaptingnik? Sunamik tukkisivît uvaptingnêlungitomik?

¹⁰ Kêrtojoᴋarivok inutoᴋaujoᴋârlunelo akkunaptingne, inôkitârnersaulauktunik atâtarnit.

¹¹ Gûdib mannigoiningit taimâk pijariakitônasugijaujuksauvât illingnut? Oᴋauserlo illanersarnermut oᴋautigijaujok illingnut?

¹² Namut ômattivit aksorotivâtit? Sunamiglo îjikik Kablukealaruteᴋarᴋâk?

¹³ ᴋanok maksoanît makkitava Gûde akkerartorlugo, oᴋâlanerit taimaitut annerᴋogangne ᴋanernit?

¹⁴ Inuk sunauva ivsornaituksaunajarmat, tamnalo idluartojuksaungmat arnamit erniangomajok?

¹⁵ Ahâk, ivsornaitokotine tettigijungnangilait, ᴋilaillo ivsornailungilet sângane.

¹⁶ ᴋanok angiluartomik inuk makkojungnarneôjok, mamaitoâllôjorlo, idluinermiglo immertok immektut?

¹⁷ Unertutitsomavagit tamattominga tussarnânga; unipᴋautitsomavagillo takkolauktamnik;

¹⁸ Ilisimajut oᴋautigilauktanginnik, atâtagilauktangitalo nellungitaililaungitanginnik;

¹⁹ Inutôlutik nunamik tunnitsiviolauktut, takkorngartomullo ingergaviomalaungitut.

²⁰ Gûdeᴋangitok sajukpok inôtsine nâlugo, atanniâlublo jârime unnurningit nallovait.

²¹ Tussarpaktane ᴋoaksârutigivâ; ullapirsauteᴋaralloartillugolo asseroijub tikkininga illimagivâ.

²² Okperlungilak ᴋanoêtomit ᴋemâniarame, tikkitaunasugitsainarlunelo saviksoarmut.

²³ Ingerarpok sivumut uttimullo nerᴋiksarsiorlune: ᴋaujimavok ᴋanoênime, nalliuninga nalliusimangmat.

²⁴ Kappiasungnerub siorniornerublo ᴋoaksârtipâk; anauvâglo unnunga, attanertut oppalungaersimajotut sorsungnermut.

²⁵ Agganne issalaungmagit Gûde akkerartorlugo, Ajugaᴋangitorlo kepêservigilaungmago.

²⁶ Akpangervigivâ ᴋongaselijarlune tessitersimajomik, sappulutaminik ᴋongmuartitsilune.

²⁷ Kênane ullikpâ ingnermut, nângne nimeᴋartipâ orksumik.

²⁸ Igloᴋarporle iglugasaksoarne asserorsimajune, iglune itsainarniangitune pijarêrsimajune serᴋomakungorᴋovlugit.

²⁹ Akluilerniangilak, perᴋutingillo soᴋosijuiniangilet, pilloringningalo pivallianiangilak nuname.

³⁰ ᴋanoênek nûniangilak tâpsomangat. Ikkomaub akkerungit ᴋunnulertiniarpait; nungulerniarpok ᴋaningata annerninganut.

³¹ Uivêrijaumajok sunautsengitomik tetteᴋarniarane; sunautsengitomik akkeᴋarniarame.

³² Nelliuteᴋârtinago naggateᴋarniarpok, akkerungalo tungojoksiniangilak.

³³ Katterainiarpok perortuminik nappârtotut Weineliksatut paungaminik piungitunik, nappârtotullo orksuliktut nuvugolârgminik.

³⁴ Takkomôrtut ᴋattimaniksangit inutilunginiarpok; ikkomaublo iglut nerriniarpait pilliusianik tigusijut.

³⁵ Singaivut pijaksaungitomik, ernilutiglo siorniornermik nângillo sakᴋêvut alliktuamik.