Hiobe 14 - Labrador Inuttitut Heritage Bible

Hiobib inuit ajulerningit ârusutigivâ.

¹ Inuk arnamit erniangomajok sivikitomik inôvok, nâmalunelo uimajâdlarnermik.

² Nuvugulâktut siggilerpok, ᴋattaklunelo; ᴋemâvok tachaktut, itsainaranelo.

³ Taimaitorlo pivlugo uitalerpotit, amuarlunga sângnut erᴋartoromavlunga?

⁴ Kia ivsornaitok atausek nachvârungnarᴋaûk, Ivsornaitoᴋangitunne?

⁵ Nelliuneᴋarpok nellonairsimajomik, takᴋingita unurningit illingnêput, kiglilerveᴋartilaukpet ᴋângertauniangitomik tâpsomunga.

⁶ Taimâk tagva takkonârungnairuk Merngoêrserneᴋaᴋovluga nâmakserᴋârtinago, uvlok nâlugo sanajuksatut uvlorminik.

⁷ Nappârtok nakᴋartaugalloarune nerriungneᴋarpok ama ablatsângormerᴋovlune; nutaijoktoᴋotingillo nokᴋarlungilet.

⁸ Mimmernangit nunab illuane nutaungitôleralloarpatta, nappârtungalo toᴋovlune saningoleralloarpat:

⁹ Tagva sulle nutaijupsarivok naimanermut immermik, perorsalunelo perorsijaksatut.

¹⁰ Angulle toᴋovok, tagva nallavok itsungnailune; inuk anernengerpok, naneᴋâlo?

¹¹ Sôrlo immek annilermat tetsermut, sôrlolo kôksoak ipterilingalermat.

¹² Taimailingavok inuk, nellalerune makkiniangilak, tuppagomângilarlo ᴋilaᴋartillugo, aulajomângilarlonêt siningnermit.

¹³ ᴋanoktôk kappianartovingme (annernerit inningine) ulligajarlaunga, ijerajarlungalo ningarnît kassungaᴋârtinago; kiglilerveᴋartinajarlaungalo erᴋaumavigijarnik uvamnik!

¹⁴ Inuk toᴋungajok inôniaralloarivâ? Tagva nerriugomanajarpunga sorsungnima uvlunginne tamaine ablatsângornera tikkerᴋârtinago.

¹⁵ ᴋaigarsugviginga, kiolutit perᴋovlunga; ᴋilanârittôk aggakpît piniarninganik.

¹⁶ Mânnale ablornikka kittipâttit, udsertorlugillo ajornikka.

¹⁷ Tappanikka kippitamut naitersimavâttit, idluitullinikkalo, ᴋattitilaukpâttit.

¹⁸ ᴋakᴋak imileralloarpok nungulerlunelo, ᴋairtorlo nûtitauvok inniminit.

¹⁹ Imiub ujarᴋat pêrlugit ergortorpait, kuttingitalo nuna pêjarpât; inublo nerriungninga asserorpet.

²⁰ Pingumarikpet tagvungarᴋovlugo; illinganingalo ablatsângortipet, tillivello tagvangat.

²¹ ᴋittorngane opigijaumangâtta, tamattominga ᴋaujimangilak, erᴋanangitômangâttalônêt, tamanna mallugilungilâ.

²² Uvineᴋarlunele, ânianeᴋariaᴋarpok; tarningalo tâpsomanêtillugo kiksariaᴋarpok.