Hiobe 13 - Labrador Inuttitut Heritage Bible

Hiobe pigannerpok akkiorlune.

¹ Ahak, tamakkoa tamaita ijingma takkolaukpait, siutingmalo tussarlaukpait, ipaksilugillo.

² ᴋaujijasse ᴋaujigivakka, erᴋananginersaulungitungalo illipsingnit.

³ Uvangale ajugaᴋangitok oᴋarᴋattigijomadlarpara, Gûdelo akkiorvigilugo uvamnik tussugajarpunga.

⁴ Illipse taimângolungitomik tukkeᴋartigapsiuk, âniasiorteôlukluselo ilûnnase.

⁵ ᴋanoktôk nippangermarigajarupse! Tamanna ilisimanerinajarpasse tagva.

⁶ Tussaritsetôk akkiornimnik, kangasinângmalo sorsungningak kamagissiuk.

⁷ Gûde sorsugutigijomavissiuk idluinermut, pivlugolo oᴋaromavise pingitsertornermut?

⁸ Kinauninga kamagijomavissiûk? Gûde akkisartoromavissiûk?

⁹ Isumanârniaralloarkisse, tâpsoma erᴋartorniarpasse? Isumavise uivêriniarapsiuk, sôrlo inuk uivêrijaungmat?

¹⁰ Angijomik pitlarniarpâse, kinaunek kamagijomagupsiuk angigutsivluse.

¹¹ Opinartoksôninga ᴋoaksârtitaujutigijomangipissiûk? Sivôranarningatalo tupvigijomavâsê?

¹² Erᴋaumajase arisatuinauvut, sappulutase sappulutauvok machaujok.

¹³ Nippangervigissinga, uvanga oᴋâlaᴋovlunga; sunamullônêt kângagôrviogalloaruma.

¹⁴ Uviniga kigutimnut kingmiatsainaromavara, illijomavaralo tarniga aggamnut.

¹⁵ Ahâk toᴋoᴋalloarpânga, nerriungneᴋarungnairumalo: sullele apᴋosinerijakka akkiorutigijomavakka tâpsoma sângane.

¹⁶ Ilâ tâmna nangminek piulijaujutauniarpok uvamnut; takkomôrtok sânganut pingimat.

¹⁷ Oᴋâlanera tussatsiarsiuk, tukkeᴋartitsinerlo siutipse sânginêle.

¹⁸ Ahâk illiornera oppalungaijarsimavok, ᴋaujimavunga idluarnerartauniarama.

¹⁹ Kinauva akkerartoromajiga? Mânnale nippangeriaᴋarpunga anernengeriaᴋarlungalo.

²⁰ Maggûngnik piniarvigitaililaunga, tagva ijeromalungitunga sângnit.

²¹ Aggaktit ungasiglit uvamnit kappianarnivîllo ᴋoaksârtiniaraninga.

²² ᴋaigarsugviginga kiojomavagit; ubvalo uvanga oᴋaromavunga, igvit kiolaunga.

²³ ᴋapsiovât idluitullinikka, ajornikkalo? Tappanikkalo ajornikkalo nellonairlit uvamnut.

²⁴ Sôg kênait ijerᴋiûk ômisukteonasugilungalo illingnik?

²⁵ Millukatak ikkiaijok taimâk ᴋungatailijutigijomaviuk, nauligaujarlo pannertok unangmijomaviûk?

²⁶ Igvit aglagvigigamga ᴋassilingnartomik, inosungnimalo ajorninginnik kingormgujitiparma.

²⁷ Igvit ittigakka ᴋejuksoarmut parngnanairsorlaukpattit, apᴋoserijakkalo tamaita kamagivattit; ittikkamalo tumingit nellunaikuserpattit.

²⁸ Uvanga ailupiktut nungutaksaugalloartunga, annorâktut, kettulapingnut nerrijaumajotut.