Hiobe 12 - Labrador Inuttitut Heritage Bible

Hiobe oᴋarpok Zofar ilannârijanelo pingasut ilûnnaita akkerartorlugit.

¹ Tagva Hiobe kiovok, oᴋarlunelo:

² Ilâ illipse inûvose tâpkoa, illipse illagilluse ilisimanek toᴋoniarpok.

³ Omatteᴋarpungatauk illipsetut, erᴋananginersaulungilanga illipsingnit! kinauvalo tamattominga ᴋaujimangitok?

⁴ Inûᴋattiminut ijutigijaujub uvaptut, Gûde nipliaviginiarpâ, tâpsoma tussarniarpâ. Idluartok idluitailijorlo ijutigijaujariaᴋarpok.

⁵ ᴋaumajoârsôvorlo nachonartok piojorijut isumangita sânginne, nangerporle sinaungajutiksanginnut.

⁶ Asserorterijut iglungit merngoêrserneᴋarput ussornarnarneᴋarlutiglo, kotsingnerpângojomik ningaksaijut, aggamingnik Gûdeᴋartut.

⁷ Ilâ nergjutit appertsorkit, tâpkoa ajuᴋertorniarpâtit tamattominga, tingmitjallo ᴋilaub atâne, tâpkoa oᴋautiniarpâtit tamattominga.

⁸ Ubvalo nuna oᴋarᴋattigiuk, tâpsoma ajuᴋertorniarpâtit tamattominga.

⁹ Kina illitarksingilak tamakkonangat tamainit, Nâlekab aggangita tamakkoa sanalaungmagit?

¹⁰ Aggangminêtoliub inôjut tamaita tarninginnik, uviniggillo tamaita attunit annerninginnik?

¹¹ Siutib oᴋâlanek nautsertorlungiᴋaûk? ᴋilaublo nerᴋiksat ikpigingilagît.

¹² Ilâ atâtatsiarne ilisimaneᴋarpok, sillatuneᴋarlunelo inutoᴋaujune.

¹³ Tâpsomane (Gûdeme) ilisimaneᴋarpok, sôngoneᴋarlunelo; tâpsoma atanertuinek, sillatunerlo pigivak.

¹⁴ Ahâk tâmna serᴋomitsilerangat, tagva sananasuarnek sulitsengilak; tâpsoma kina pallangairutijarangago, kinalônêt pallangairutjarijungnangilak.

¹⁵ Ahâk, tâmna imeᴋartailititsileraikpat, tagva pannilerpok; tâpsomalo tamanna anitileraikpago tagva nuna mumiktipâ.

¹⁶ Tâmna pitsartôvok pinniarpâlo. Tammartok uivêriklertorlo pigivak.

¹⁷ Tâpsoma sillatôjut tessiorpait, aksârnigaujotut, erᴋartuijullo ᴋaujimangojârtipait.

¹⁸ Tâpsoma atannît ajoringosausêningit ᴋellarutjarpait, makkitingillo tapseruserpait tapserumik.

¹⁹ Ajuᴋertuijut tessiorpait aksârnigaujotut, sôngojullo mumiktipait.

²⁰ Tâpsoma mikseᴋârtut kângasinângit allartipait inutoᴋaujullo tukkisiningit pêrpâ.

²¹ Atanît koverivait nachogijaunermik, sôngojullo angerᴋattigêngningit kassungatipâ.

²² Tâpsoma ittersat tâktut mattoêrpait, târnerlo sakᴋerpâ ᴋaumajomut.

²³ Tâpsoma inuᴋattigêksuit unnuksivalliatipait inôseᴋarungnaitilaitalo; inuᴋattigêksuit siamartipait aulartinivaillo.

²⁴ Inugasaksuit nuname angajoᴋângit maksoasuêrtipait, tammartipaillo inuᴋajuitune apᴋosineᴋangitune;

²⁵ Tapsikârᴋovlugit tâktome ᴋaumajoᴋaratik, tammartipaillo tallatutitut.