Hiobe 10 - Labrador Inuttitut Heritage Bible

Hiobe ârusuganerpok.

¹ Tarnima inôsera sinaungajutigivâ; ârusungnera annikojomavara uvamnit, oᴋauteᴋaromalungalo tarnima kiksarninganik,

² Gûdemullo oᴋaromavunga: Ominarnerartaililaunga; ᴋaujitilaunga suna pivlugo aivajarimangamga?

³ ᴋuviagiviûk aksorotjigavit, egigamgalo, aggakpit sanalauktangit, Gûdeᴋangitullo kajusimaningit opinartilugit?

⁴ Ijeᴋarivêt uviniojunik, takkovîllônêt inûb takkoningatut?

⁵ Ubvalo nelliunît inûb nelliuningatut îka? Jâritillônet angutib jâringititut?

⁶ Idluitullinikka apperᴋutigigangne, ajornikkalo ᴋenerangne?

⁷ ᴋaujimagalloarlutit Gûdeᴋangitôlunginama; Kinaᴋangitillugo piuliklerungnartomik aggangnit.

⁸ Aggakpit pinialaukpânga, sanalauklugolo înera tamât, avatimne illûnane; kivitiparmalo taimamarik.

⁹ Erᴋailerittôk machaktut adsiliulauramga, saningortitsomârmingmangalo.

¹⁰ Imuktut makêtilaungipinga, igjortilungalo punniojârtotut?

¹¹ Igvit ameᴋartilaukparma uvineᴋartilungalo, saunernullo taᴋarnullo uigornerêktilaukpânga.

¹² Inôseartilaukpânga ajungitullivigilungalo, kamatsiarnivîllo anernera sapputilaukpâ.

¹³ Tamannalo ijerlaukpet ômattingne; Missigijariaᴋarpungalo tamanna illingnêlaungmat!

¹⁴ Idluitûllijarangama, tagva igvit ᴋaujisarparma tamattominga, idluitullinikkalo pitlartautailitilungilettit.

¹⁵ Passijaksauguma: kappianamêk uvanga! Idluartôguma, tagva sulle niaᴋora kagvartitaksaringilara, tattatôjungatut kangusungnermik, takkojungatullo ajulernimnik.

¹⁶ Kagvarajarpallo: Loevetut aijalikparma, pinniarvigivarmalo ama kappianadlartomik.

¹⁷ Kigligiudsijoᴋotitit akkerartortiksakka assetârtipattit, ningarnît pivlunga angijôtipet, kappianartut unnuktut nellekârlutik pagvisarpânga.

¹⁸ Sôg anânab timinganit tessiulaukpinga? ᴋanoktôk inôjungnairajalauruma, takkojaunajalautsengikumalo ijimut atautsemullonêt!

¹⁹ Tagva inajarpunga taipkotitunak îlautsengitutitut, anânab timinganit illuvermut âtaulunga.

²⁰ Uvlukka sivikitôlungilât? Nokᴋarletok, ᴋemaklungalo, kêtamik nekkoksijauᴋovlunga;

²¹ Aularᴋârnanga utternangalo; tâktub tâksinerublo nunangangnut;

²² Nunamut niptainelingmut târnelingmullo, tachalingmullo, ipperigutineᴋalungitomullo, keblernelingmut tâktotut.