Hesekiel 9 - Labrador Inuttitut Heritage Bible

¹ Nippersoarmut tagva nipliavoᴋ tusâtilunga, oᴋarune: Kaglileritse ilipse iglugasaksoarnik udjertorteojose, atunit asserortautise tigumiarlugit.

² Ahâglo, angutit pingasojortut tikilerput itertarviub timerdliub avunga sangmijub apᴋutâgut, atunit tigumiarlutik sakkomingnik toᴋotsijûtinik; angulle atauseᴋ akuliovoᴋ tâpkonane ᴋaᴋortamik annorâlik, aglaktub pôᴋtanganik ᴋeterumiutalik. Iterpullo nangerlutiglo tunerguserviub ᴋaᴋorliub seniane.

³ Israêliblo Gudingata ânanauninga ᴋangatarpoᴋ kerubib ᴋânganêvigijangata ᴋânganit, iglub sânganut nûlune; inuglo imna ᴋaᴋortamik annorâlik, aglaktublo pôᴋtanganik ᴋeterumiutalik, ᴋaiᴋovâ.

⁴ Nâlekablo oᴋautivâ: Iglugasaksoatigôrit Jerusalemekut, ᴋaungitigullo nelunaikuserkit inuit anersaumijut ogguartullo maᴋojungnartut tamaita tagvane piniarutaujut pivlugit.

⁵ Tâpsomalo assingit oᴋautivait tusâtilunga: Iglugasaksuit ingerarvigisigik tâmna maliklugo, annaunileritselo: ijiselo nâpkigosungniaratik, naiperᴋutigosungniaraselo.

⁶ Inuᴋoartut, nukapiat, uigasuit, sorutsit, arnallo toᴋosigik nungulugit: Kissimik nelunaikusertaumajut aktorniarasigik; iglumnelo pigialeritse. Pigiarput tagva angajoᴋângojune iglub sânganêtune.

⁷ Oᴋautivaillo: Iglo ivsornartisiuk; avaluliorsimajut tatasigik toᴋotaumajunik; anisâritse. Anivut tagva, annauniklutik iglugasaksoarne.

⁸ Annaunilertilugillo, uvangalo inutôtilunga, kênara pulugo pâmakpunga, nipliarlungalo oᴋarpunga: Kappê, Nâlegaᴋ Nâlegaujotit, Israêlemit amiakôjut tamaita asseroromavigît, ningaumajârnît pitikangne Jerusalemût?

⁹ Oᴋautivângalo: Israêlib Judablo ᴋitorngangita idluituliningit angijoᴋsôvut, nunalo ulipkidlarpoᴋ aungmik, iglugasaksuillo tatadlarput mumiksinermik idluarsainermik; oᴋarmatta: Nâlekab nuna ᴋemakpâ, Nâlegaᴋ takolungilaᴋ.

¹⁰ Taimaimat ijîkkatauᴋ nâpkigosungniangilâk, naiperᴋutigosungniangilangalo, piniarnerijangille tikiutijomavakka niaᴋunginut.

¹¹ Ahâglo, angut imna ᴋaᴋortamik annorâlik, aglaktub pôᴋtanganik ᴋeterumiutalik, kigligiksariartorpoᴋ oᴋarlune: Taimailiorpunga sorlo perᴋogamga.