Hesekiel 8 - Labrador Inuttitut Heritage Bible

¹ Pivorlo jârit 6ingane, taᴋᴋit 6ingane, taᴋᴋiub uvlungita tellimangane, iksivatilunga iglumne, Judablo angajoᴋaujungit iksivatilugit sâmne, Nâlekab aggangita tupvigingmanga tagvane.

² Takosarpungalo, sunaubvalo saᴋᴋertoᴋarpoᴋ ikomaujârtomik; ikomaujârtoᴋ ᴋerᴋanêᴋôpoᴋ angmut, ᴋerᴋanêᴋôlarmelo ᴋongmut ᴋaumaridlartoᴋ sorlo ᴋaᴋorleᴋ ᴋingarnartoᴋ.

³ Issakpaillo aggaujârtut, tiguvângalo niaᴋuma nujangitigut; anernerublo ᴋangatartipânga nunab ᴋilaublo akorngangnut, takotitjutikullo Gudemit pijokut âpânga Jerusalemut, avaluliorsimajub iluliub itertarvingata upkoanganut avunga sangmijomut; idluigosungnerub adsingoangata inigijanganut, tâmna idluigosuktitsivoᴋ.

⁴ Ahâglo, Israêlib Gudingata ânanauninga tagvanêpoᴋ, sorlo saᴋᴋertoᴋ takolaurapko natername.

⁵ Oᴋautivângalo: Inûb erninga, ijîkik ᴋongmuangatikik apᴋomut avunga sangmijomut. Ijîkka tagva ᴋongmuartipâkka apᴋomut avunga sangmijomut, ahâglo, tunerguserviub itertarvingata taggâne idluigosungnerub adsingoanga upkoarme.

⁶ Oᴋautivângalo: Inûb erninga, takovêt ukkoa sulianginik? maᴋojungnartulinersuit Israêlib ᴋitorngangita piniarnerijangit tamânê, uvanga ivsornaitoviᴋotimnit ungasidlarᴋovlungâ? Sangulermîlle, takolârpotillo maᴋojungnartulinernik anginersanik sulle.

⁷ Avaluliorsimajublo upkoanganut tikiutivânga; takosaramalo, ahâk, putto ᴋarmarme.

⁸ Oᴋautivângalo: Inûb erninga, aggarit mâna ᴋarmarme; aggaramalo ᴋarmarme, ahâk, apkoaᴋ takovara.

⁹ Oᴋautivângalo: Iterit takolutillo maᴋojungnartulinerijanginik ajortunik tamâne.

¹⁰ Iterpunga tagva takolungalo; sunaubvalo pâmgortut adsigêngitut unuktut, nergjutillo ᴋuinangnartut, Israêliblo ᴋitorngangita gudingoangit ilûnatik, adsiliortauvut ᴋarmarme ilûnâne.

¹¹ Tâpkoalo sângane nangerput angutit 70, Israêlib ᴋitorngangita angajoᴋânginit, tâpkoalo ᴋerᴋane nangerpoᴋ Jâsanîa, Sâfanib erninga, ilûnatiglo aggangmingnut tigumiarput pujôrtitsivingnik; isserluanerutiksablo issingata tippinga ᴋongmuarpoᴋ.

¹² Oᴋautivângalo: Inûb erninga, takovêt Israêlib ᴋitorngangita angajoᴋângita piniarnerijanginik tâᴋtomê, ilûnatik atunit inimingne adsingoatalingmê? oᴋarmatta, Nâlekab tautulungilâtigut; Nâlekab nuna ᴋemakpâ.

¹³ Oᴋautivângalo sulle: Takojuksaulerivotit maᴋojungnartulinernik angijunik makkoa assinginik piniarnerijanginik.

¹⁴ Tikiutivânga tagva Nâlekab iglungata itertarvingata upkoanganut avunga sangmijomut; ahâglo, arnat iksivavut tagvane ᴋeavlutik Tammuzemut.

¹⁵ Oᴋautivângalo: Tamanna takoviûk, inûb erningâ? Sulle maᴋojungnartulinernik anginersanik makkonangat takojuksauvotit.

¹⁶ Tikiutivângalo Nâlekab iglungata avaluliorsimajunganut ilulerpâmut, ahâglo, Nâlekab iglungata upkoangane angutit 25, pâblo tunerguserviublo akorngangnêput, Nâlekab iglunga tunulugo, kênangillo sângatilugit ununga, seᴋᴋinerlo tuksiarvigivât nuivinga sâdlugo.

¹⁷ Oᴋautivânga tagva: Tamanna takoviûk, inûb erningâ? Judab ᴋitorngangita oᴋigivatsûk maᴋojungnartuligamik tamânê? nuna tatangmatsuk idluitulinernik, sangulerivullo ningarsâromavlunga; ahâglo, ᴋessertutit ᴋingarmik sânginut aklairautigivait.

¹⁸ Tamanna pivlugo uvangatauᴋ ningaumajârnerme piniaromavunga: ijîkka nâpkigosungniangilâk, uvangalo naiperᴋutigosungniangilanga; ᴋaigarsugaloaruniglo siutimnut nippenut angijunut, sulle tusaromangilakka.