Hesekiel 6 - Labrador Inuttitut Heritage Bible

¹ Nalekablo oᴋausingata tikipânga, oᴋarlune.

² Inûb erninga, kênait sâtiuk Israêlib ᴋaᴋᴋanginut, nelautaivigikillo, oᴋarlutit;

³ Ilipse, Israêlib ᴋaᴋᴋangit, Nâlekab Nâlegaujûb oᴋausinga tusarsiuk; imâk oᴋarpoᴋ Nâlegaᴋ Nâlegaujoᴋ ᴋaᴋᴋaᴋsoarnut ᴋaᴋᴋanullo, kôrunullo naᴋsanullo: Ahâk, uvanga, ila uvanga nangmineᴋ, tikiutjijomavunga saviksoarmik ilipsingnut, poᴋtoniselo asseroromavakka.

⁴ Tunerguserviksaselo ᴋemaktaujomârput, seᴋinermullo napartitase naplortaujomârput: toᴋotaselo egijomârpakka gudingoaliarimajapse sânginut.

⁵ Israêliblo ᴋitorngangita timingit toᴋungajut ilijomârpakka gudingoaliarimajapse sânginut: sauniselo katararomârpakka tunerguservipse avatânut.

⁶ Nunagijapsingne tamaine iglugasaksuit asserortaujomârput, poᴋtoniselo ᴋemaktaujomârput; tunerguserviksase asserortauᴋovlugit ᴋemaktauᴋovlugillo, gudingoaliarimajaselo serᴋomitauᴋovlugit pijungnaiᴋovlugillo, seᴋinermullo napartitase nakkatauᴋovlugit, suliarimajaselo nungutauᴋovlugit.

⁷ Toᴋotaujullo oggojomârput akunapsingne, missigijuksauvoselo uvanga Nâlegaugama.

⁸ Kissiane ilapsingnik amiakoᴋartitsomârpapse, saviksoarmit anigoijoᴋarᴋovluse inôᴋatigêksuit akorngane, siamarsimalerupse nunanut.

⁹ Tâpkoalo anigoijigijapse erᴋaumajomârpânga inôᴋatigêksuit aularutijauvigilârtangita akorngane, allaigama ômatinginik ajortulilauᴋtunik ᴋemaijuniglo uvamnik, ijinginiglo ajortuligosuktunik gudingoaliarimajanginik: ingmingniglo maᴋojugilârput idluitulinitik piniarnerijatik maᴋojungnartulinermingne tamiane pivlugit.

¹⁰ Missigijuksaulârpullo uvanga Nâlegaugama; sulinanga oᴋalungilanga idluitoᴋ tamanna piniaromârapko tâpkonunga.

¹¹ Imâk oᴋarpoᴋ Nâlegaᴋ Nâlegaujoᴋ: Aggaktit pattaktorkit, ittigarnullo tukkartorit, oᴋarlutillo: Kappê, Israêlib ᴋitorngangita idluituliningit maᴋojungnartut tamaita pivlugit; toᴋoraromârmatta saviksoarmut, kângnartoᴋsoarmullo, nûsilingnartomullo.

¹² Ungasiktoᴋ toᴋojomârpoᴋ nûsilingnartomut; ᴋanitoᴋ toᴋojomârpoᴋ saviksoarmut; amiakôjorlo piulimajaujoᴋ toᴋojomârpoᴋ perlernermut; taimak ningaumajârnera nâmaksititsomârpara tâpkonunga.

¹³ Kaujijuksaulârposelo uvanga Nâlegaugama, toᴋotaujungit gudingoaliarimajatik akornganêkpatta tunerguservingita avatâne, ᴋaᴋᴋane tamaine, ᴋaᴋᴋaᴋsuillo ᴋângine tamaine, napârtullo tungujortat tamaita atâne, napârtullo taggalinelit tamaita atâne, tunerguservigilauᴋtangine tipitsiariksaunik gudingoamingnut tamainut.

¹⁴ Aggakkalo issagomârpakka tâpkonunga, nunalo sunaᴋarungnaitungortitsomârpara asserornilukungortilugolo, inuᴋajuitomit Dibla tikidlugo, inigijangine tamaine; ᴋaujijuksauvullo uvanga Nâlegaugama.