Hesekiel 5 - Labrador Inuttitut Heritage Bible

¹ Igvillo, inûb erninga, tigusigit saviksoarmik ipiktomik, umêjautitut atoraksarivat ilingnut, tâpsomungalo nujaᴋtit umitillo salikit; kiktitautiniglo tigusigit nujaᴋtillo avilugit.

² Tâpkoa pingajuangit ikomamut ikitaksarivatit iglugasaksuit ᴋerᴋane, ilumajauningita uvlungit nâmaksikpatta: ama pingajuangit tigulârpatit serᴋalilugillo saviksoarmut; pingajuangillo tiktautilârpatit anoremut, uvangalo tâpkoa udlalugit saviksoaᴋ amujomavara.

³ Ikitunigle tagvangat tigusijuksauvotit ᴋelaklugillo ulikpit sinânut.

⁴ Tâpkoalo ilangit ama tigujaksarivatit egilugillo ikomamut, ikomamut nungulugit; tagvangat ikoma anijomârpoᴋ Israêlib ᴋitornganginut tamainut.

⁵ Imâk Nâlegaᴋ Nâlegaujoᴋ oᴋarmat: Tamadja Jerusalem; inôᴋatigêksuit akornganut ilimavara, nunanullo ilumajauvoᴋ.

⁶ Inatsinikkale mumilauᴋpait idluitulinersauvlune inôᴋatigêksoarnit, perᴋojakkalo angiluartomik nunaᴋatigêksoarnit avatânêtunit; tâpkoa inatsinikka ajaktormagit, arvertalungimattalo perᴋojakka maliklugit.

⁷ Taimaimat imâk oᴋarpoᴋ Nâlegaᴋ Nâlegaujoᴋ: Perajaluluadlarapse anginersaudlartomik inôᴋatigêksoarnit avatipsingnêtunit, arvertalunginapselo perᴋojakka maliklugit, inatsinikkalo pinialunginapsigik, pinialunginapselônêt inôᴋatigêksuit avatipsingnêtut ilusingit maliklugit;

⁸ Taimaimat imâk oᴋarpoᴋ Nâlegaᴋ Nâlegaujoᴋ: Ahâk, uvanga, ila, uvanga nangmineᴋ sâpagit; erᴋartuinikkalo piniaromavaᴋᴋa ilingnut inôᴋatigêksuit takoane.

⁹ Ilingnullo piniaromavunga piniarnerilauᴋsimangitamnik, kingornganelo taimaitunik piniaromângitamnik, maᴋojungnartulinivit unurningit pivlugit.

¹⁰ Taimaimat angajoᴋât nerrijomârput ᴋitorngamingnik ilingne, ᴋitorngallo nerrijomârput angajoᴋâmingnik; erᴋartuinikkalo piniaromavakka ilingne, amiakotillo tamaita siamartitsomârpakka anorinut tamainut.

¹¹ Tamanna pivlugo, sorlo nelâgut inôgama, oᴋarpoᴋ Nâlegaᴋ Nâlegaujoᴋ, sujuilauravit ivsornaitoviᴋotimnik maᴋojungnartulinernut tamainut, naggonartulinernullo tamainut, uvanga allaromagivagit; ijîkkalo napkigosungniangilâk, uvangalo naiperᴋutigosungniangilanga.

¹² Aviksimajavit pingajuangit toᴋojuksaulârput nûsilingnartomut, perlernermullo nungulârput ilingne; pingajuangillo amatoᴋolârput avatingne; amalo pingajuangit siamartilârpakka anorenut tamainut, kingorninginelo saviksoaᴋ amujomavara.

¹³ Taimak ningaumajârnera nâmaksititaujomârpoᴋ, ᴋaningaumajârneralo ilijomârpara tâpkonunga, merngoerseromârpungalo; ᴋaujijuksauvullo uvanga Nâlegaujunga oᴋalaurama ilungertornimne, ningaumajârnera nâmaksititsomagapko tâpkonunga.

¹⁴ Nungunikungortitsomârpagit naggonartungortilutillo inôᴋatigêksuit avatingnêtut akorngane, tamaunârtut ilûnatik takoane.

¹⁵ Taimaglo naggonautiksaulârpoᴋ, mitautiksaulârlunelo, annusingorsautiksaulârpoᴋ, tataminiarutiksaulârlarmelo inôᴋatigêksoarnut avatingnêtunut, erᴋartuinikka piniarupkit ilingne ningaumajârnerme ilungertornermelo suadlarnernelo ilungertortune: uvanga Nâlegaujunga taimak oᴋarpunga:

¹⁶ Kângnartoᴋsûb ᴋargjungit piungitoᴋsuit tiligupkit tâpkonunga, asserorsainermut ilingajut, tilijomavakka asserorsaiᴋovlugit ilipsingnik; kângnartoᴋsoarlo angijorortitsomavara ilipsingnut, nerᴋiksase ᴋematulivipsingnêtut asserorupkit;

¹⁷ Kângnerlo ômajullo erᴋsinartut tilijomavakka ilipsingnut, tâpkoalo ᴋitorngairutilârpâse; toᴋolo auglo apᴋusârlârpûk ilingnut; saviksoarlo tikiutilârpara ilingnut: uvanga Nâlegaujunga taimak oᴋarpunga.