Hesekiel 48 - Labrador Inuttitut Heritage Bible

¹ Tamadja kinguvârêt attingit: Kiglinganit taggardlermit Hetlone apᴋutigilugo Hâmatib nelânut, Hâzar-enon, Damaskusib kiglingane, avunga Hâmatib seniane; sângalârput kangimullo kitânullo; Dane, avgoaᴋ atauseᴋ.

² Daniblo kiglingane, kitânit kangianut; Assere, avgoaᴋ atauseᴋ.

³ Asseriblo kiglingane, kitânit kangianut; Naftali, avgoaᴋ atauseᴋ.

⁴ Naftaliblo kiglingane, kitânit kangianut; Efraim, avgoaᴋ atauseᴋ.

⁵ Manassiblo kiglingane, kitânit kangianut; Efraim, avgoaᴋ atauseᴋ.

⁶ Efraimiblo kiglingane, kitânit kangianut; Ruben, avgoaᴋ atauseᴋ.

⁷ Rubeniblo kiglingane, kitânit kangianut; Juda, avgoaᴋ atauseᴋ.

⁸ Judablo kiglingane, kitânit kangianut, ituksauvoᴋ tunergut tunijase, suvloliktut 25,000tut senimortotigijoᴋ, takiningalo avgoat ilangatut, kitânit kangianut; ivsornaitoviglo tâpsoma ᴋerᴋanêtuksauvoᴋ.

⁹ Tunergut tunijaksarijase Nâlekamut suvloliktut 25,000tut tukimortotigijuksauvoᴋ, 10,000tullo senimut.

¹⁰ Makkoalo seniane tunergut ivsornaitoᴋ ajoᴋertuijut piksangat ituksauvoᴋ; avunga sângalune 25,000tut tukimut, kangimut sângalune, 10,000tut senimut, ununga sângalune, 10,000tut senimut, aungalo sângalune, 25,000tut tukimut; Nâlekablo ivsornaitovinga tâpsoma ᴋerᴋanêtuksauvoᴋ.

¹¹ Tamanna ilingajuksauvoᴋ ajoᴋertuijunut ivsornaititaujunut, Zâdokib ᴋitorngangita ilanginut, pairᴋsilauᴋtunut pimnik; tammaᴋataulaungitunut Israêlib ᴋitorngangit tammalaungmatta, sorlo Levitit tammalaungmatta.

¹² Tâpkonungalo tunergusiangolârpoᴋ nunab tunergutaujub ilanga, perᴋut ivsornaitoᴋsôjoᴋ, Levitit pingata seniane.

¹³ Ajoᴋertuijullo pingata seniane Levitit piksaᴋartuksauvut 25,000tut tukimut, 10,000tullo senimut: takininga ilûnane 25,000tut ituksauvoᴋ, senimualo 10,000tut.

¹⁴ Ilangalônêllo aulaijaksaringilât tauᴋsernagolônêt, nunablo perortungita pijariorutingit avamut aulaijaujuksaungilat: ivsornaingmatta Nâlekamut.

¹⁵ Ipkoalo 5,000 amiakojut senimuane, 25,000 sângine, ilûnainut ilingajuksauvut, iglugasaksuit pigijaksarivait igloᴋarviksanut pisugajarviksanullo; iglugasaksuille tapkoa ᴋerᴋanêtuksauvut.

¹⁶ Imâglo ôktûteᴋartuksauvut; taggâne 4,500tut, seᴋerngane 4,500tut, kitâne 4,500tut, kangianelo 4,500tut.

¹⁷ Iglugasaksuillo pisugajarviksaᴋartuksauvut avatâgut; avunga 250tut, aungalo 250tut, unungalo 250tut, paungalo 250tut.

¹⁸ Takiningatalo amiakoa tunergutaumajomut ivsornaitomut aktoajoᴋ ôktûteᴋartuksauvoᴋ 10,000nik ununga sângalune, 10,000niglo paunga sângalune; tunergutaumajomullo ivsornaitomut aktoajuksauvoᴋ; tâpsomalo perortungit nerᴋiksaujuksauvut iglugasaksuit kivgartortinginut.

¹⁹ Iglugasaksuillo kivgartortingita Israêlib kinguvârênginit tamainit pijut suliarijaksarivait.

²⁰ Tunergutaumajoᴋ tagva ilûnane tukimut senimullo 25,000ojuksauvoᴋ; tunergutaumajoᴋ ivsornaitoᴋ iktoᴋeriktuksauvoᴋ, iglugasaksuit pingat ilagilugo.

²¹ Amiakolo tunergutaumajub ivsornaitub iglugasaksuillo pingita senîgingne tamangne, tunergutaumajub 25,000tôrtub ununga sângajub sivorâne, 25,000tôrtublo kangimut sângajub sivorâne, avgoat adsigijangit, angajoᴋâᴋsoarmut ilingajuksauvoᴋ; tunergutaumajorlo ivsornaitoᴋ iglolo ivsornaitoᴋ tapsoma ᴋerᴋanêtuksauvuk.

²² Levitillo pigijanganit, iglugasaksuillo pigijanganit, angajoᴋâᴋsub pigijangata akornganêtoᴋ, Judablo kiglingata Benjamiblo kiglingata akornganêtoᴋ, angajoᴋâᴋsoarmut ilingajuksauvoᴋ.

²³ Kinguvarello amiakôjut pigijaksangit, kitânit kangianut; Benjamin, avgoaᴋ atauseᴋ.

²⁴ Benjamiblo kiglingane, kitânit kangianut; Simeon, avgoaᴋ atauseᴋ.

²⁵ Simeoniblo kiglingane, kitânit kangianut; Isassare, avgoaᴋ atauseᴋ.

²⁶ Isassariblo kiglingane, kitânit kangianut; Sebulone, avgoaᴋ atauseᴋ.

²⁷ Sebuloniblo kiglingane, kitânit kangianut; Gade, avgoaᴋ atauseᴋ.

²⁸ Gadiblo kiglingane, seᴋerngane aunga, kigleᴋartuksauvoᴋ Tâmaremit Meribat-kâdesib imangit tikidlugit, Egiptenib kôngagut, imarbiksoaᴋ tikidlugo.

²⁹ Tamadja nuna avgoraksarijase imeraut atorlugo kingormgutijaksautilugo Israêlib kinguvârênginut, tamadjalo avgoat ingmikôrtut, oᴋarpoᴋ Nâlegaᴋ Nâlegaujoᴋ.

³⁰ Tamadjalo iglugasaksuit anginingit; taggâne suvlortut 4,500tut ôktûtemut;

³¹ Iglugasaksuillo itertarvingit atteᴋartuksauvut Israêlib kinguvârêngit maliklugit; avunga sângajut itertarvit pingasut: Rubenib itertarvinga atauseᴋ; Judab itertarvinga atauseᴋ; Levib itertarvinga atauseᴋ;

³² Kitânelo suvlortut 4,500tut; itertarvillo pingasut; Jôsefib itertarvinga atauseᴋ; Benjamib itertarvinga atauseᴋ; Danib itertarvinga atauseᴋ;

³³ Seᴋernganelo suvlortut 4,500tut ôktûtemut; itertarvillo pingasut; Simeonib itertarvinga atauseᴋ; Isassarib itertarvinga atauseᴋ; Sebulonib itertarvinga atauseᴋ;

³⁴ Kangianelo suvlortut 4,500tut, itertarvingillo pingasut; Gadib itertarvinga atauseᴋ; Asserib itertarvinga atauseᴋ; Naftalib itertarvinga atauseᴋ.

³⁵ Avatâgut suvlortut 18,000tut ituksauvoᴋ; uvlormillo tâpsomangat iglugasaksuit atteᴋartuksauvut: Nalekab najugânik.