Hesekiel 47 - Labrador Inuttitut Heritage Bible

¹ Utertilerivanga ama iglub upkoanganut, ahâglo, imeᴋ iglub iglernaujangata atânit puilavoᴋ ununga kitânut, iglo ununga sangmimat, imerlo kôkpoᴋ kanunga iglub senerangata talerpiub atânit, tunerguserviub seᴋerngane.

² Anitipângalo itertarvikut taggardlerkut, tesiorpângalo avatâgut silatâgut itertarvingmut silardlermut, itertarvingmut ununga sângajomut; ahâglo, imeᴋ puilavoᴋ seniane talerpingme.

³ Angullo tâmna aningmat ununga aklunârmik tigumiarlune, ôktorpait talit 1,000, imakôrtipângalo, imeᴋ kamgamnut tikiutitilugo.

⁴ Ama ôktorivait talit 1,000, imakôrtipângalo, imeᴋ serᴋumnut tikiutitilugo. Amalo ôktorivait talit 1,000, imakôrtipângalo, imeᴋ sibviamnut tikiutitilugo.

⁵ Amalo ôktorpait talit 1,000, sunaubvalo kôk ikârvigijungnangitara: kutjersimangmat, imeᴋ puibjorviojungnarpoᴋ, erᴋangale tutijaujungnangilaᴋ.

⁶ Oᴋautivângalo: Inûb erninga, tamanna takoviûk? Apângalo, utertilungalo kôb sinânut.

⁷ Tagvungalo utersimagama, ahâk, napârtoᴋarpoᴋ unuktovaksoarnik kôb sinîgingne tamangne.

⁸ Oᴋautivângalo: Imeᴋ tamanna kôkpoᴋ ununga kitânut, tikilârporlo naternaᴋsoarmut, imarbingmullo pilârpoᴋ; imarbingmut imeᴋ puilatitaujoᴋ pilârpoᴋ; imerlo atsuililârpoᴋ.

⁹ Omajullo ilûnatik aulajut, nunane tamaine kôk tâpkoa maggûk kôlervigijangine, ômalârput, mingeriaᴋalârporlo unuktovaksoarnik; imeᴋ tamanna tikingmat tamaunga, imarbiublo imanga ajorungnaititaulârpoᴋ; ilûnatiglo kôk tâpkoa maggûk kôlervingine ômalârput.

¹⁰ Mingeriarniartullo nangilârput sinâne; En-gedemit Eneglaimemut âᴋiksoiviᴋalârput nulluanik; mingeriaᴋtaᴋalârporlo ingmikut piusilingnik imarbiub mingeriangititut, unuktovaksôvlutik.

¹¹ Erᴋêgusangille imaᴋsungillo atsuilititaululângilat; tarrioliotsainaromârput.

¹² Kôblo sinâgingne tamangne perortoᴋaromârpoᴋ napârtunik sunatuinarnik paungalingnik nerrijausûnik, millukatangillo ᴋunoleromângilat, paungangillo katararomângilat; taᴋᴋit tamât paungatâlârput nutânik, imit ivsornaitovingmit pingmatta; paungangillo nerᴋiksaulârput, millukatangillo inûlinalârput.

¹³ Imâk oᴋarpoᴋ Nâlegaᴋ Nâlegaujoᴋ: Tamanna kiglilerviksaulârpoᴋ, tamattomunga nuna avilugo kingormgutijaksautilârpase Israêlib kinguvârêngningit 12 maliklugit; Josefe avgoângnik maggûngnik pijuksauvoᴋ.

¹⁴ Kingormgutilârivaselo adsigêktomik, aggakka ᴋongmuartilaurapkit tâmna pivlugo, tunijomagapko atâtagilauᴋtapsingnut: nunalo tamanna kingormgutijaksauvoᴋ ilipsingnut.

¹⁵ Tamadja tagva nunab kiglinga: taggardleᴋ, imarbingmit Hetlonekut Zêdade tikidlugo;

¹⁶ Hâmat, Berôta, Sîbarim, Damaskusib Hâmatib kiglilerviksâkita akornganêtoᴋ, Hâzere ᴋeterdleᴋ, Hauranib kiglinganêtoᴋ.

¹⁷ Imarbingmillo kigligijaksarivâ Hâzer-enon Damaskusib kiglinganêtoᴋ, taggânelo avunga Hâmot kigleᴋarpoᴋ. Tamadja kiglinga taggardleᴋ.

¹⁸ Kiglinga kitdleᴋ, Hauranib Damaskusiblo Gileadiblo, Israêliblo nunanga akorngane, Jordane ituksauvoᴋ; ôktoraksarivase kiglinganit taggardlermit imarbingmut kitânêtomut. Tamanna kiglinga kitdleᴋ.

¹⁹ Kiglingalo seᴋinerdleᴋ pijuksauvoᴋ Tâmaremit Meribotkâdesib imangit tikidlugit, Egiptenib kônganut, imarbiksoarmullo. Tamadja kiglinga seᴋinerdleᴋ aunga.

²⁰ Imarbiksoarlo kigleojuksauvoᴋ kangidleᴋ, kiglemit seᴋinerdlermit Hâmatib nelâ tikidlugo. Tamadja kiglinga kangidleᴋ.

²¹ Taimak nuna avgoaraksarivase ilipsingnut Israêlib kinguvârêngit maliklugit.

²² Imaituksauvorlo: imerautigilugo avgulârpase kingormgutijaksautilugo ilipsingnut takorngartanullo nunaᴋartunut akunapsingne, ᴋitorngatârtunut akunapsingne; tâpkoalo ilingavigilârpase sorlo Israêlib ᴋitorngangititut akunapsingne inûlertutitut; tâpkoa kingormgutijaksaᴋartuksauvut ilagiluse Israêlib kinguvârêngita akorngane.

²³ Imaituksauvorlo: kinguvârêt neliane takorngartaᴋ nunaᴋarune, tagvane tunitjivigilârpase kingormgutijaksanganik, oᴋarpoᴋ Nâlegaᴋ Nâlegaujoᴋ.