Hesekiel 46 - Labrador Inuttitut Heritage Bible

¹ Imak oᴋarpoᴋ Nâlegaᴋ Nâlegaujoᴋ: Avaluliorsimajub ilulliub itertarvinga ununga sângajoᴋ parngnanairsimajuksauvoᴋ uvlut 6 suliaᴋarviosût nâvlugit; sabbatemele upkoêraksauvoᴋ, taᴋᴋêlablo uvlungane upkoêraksauvoᴋ.

² Angajoᴋâᴋsoarlo itertuksauvoᴋ silatânit itertarviub torᴋsukatângagut, nangertuksauvlunelo itertarviub iglernaujangane, ajoᴋertuijullo atuineruterijuksauvut tunergutiksanganik ôtaksamik tunergutiksanginiglo ulapᴋosertaujutiksanik; tâmnale tuksiartuksauvoᴋ itertarviub iglernaujangane, anijuksauvorlo tagva; itertarvigle upkoartaujuksaungilaᴋ unnuᴋârtinago.

³ Inuillo tuksiartuksauvut itertarviub upkoangane Nâlekab sângane sabbatinelo taᴋᴋêlarnelo.

⁴ Tunergutiksarlo ôtaksaᴋ angajoᴋâᴋsub tunergutiksarijanga Nâlekamut sabbatine imaiput: saugâranik 6nik ᴋanoetoᴋangitunik sauᴋamiglo parngnermik ᴋanoetoᴋangitomik;

⁵ Tunergutiksarlo nerᴋiksaᴋ imaituksauvoᴋ: êfamik atausermik saugarmut parngnermut, saugârangnullo tunijungnartanga maliklugo, orᴋsumiglo hinemik êfamut atausermut.

⁶ Taᴋᴋêlablo uvlungane tunitjijuksauvoᴋ tuktuvangmik angusalormik ᴋanoetoᴋangitomik, saugârangniglo 6nik, saugarmiglo parngnermik; tâpkoatauᴋ ᴋanoetoᴋartuksaungilat;

⁷ Atuinaruterijuksauvorlo tunergutiksamik nerᴋiksamik êfamik tuktuvangmut, êfamiglo saugarmut parngnermut, saugârsungnullo pijungnartanga maliklugo, orᴋsumiglo hinemik êfamut atausermut.

⁸ Angajoᴋâᴋsoarlo iterangat itertuksauvoᴋ itertarviub torᴋsukatângagut, tamaunatsainarlo anijuksaugivoᴋ,

⁹ Nunable inungit Nâlekab sânganôrpatta uvloᴋsiorvioᴋojaujune, itertoᴋ itertarvikut taggardlerkut tuksiariartorlune anijuksauvoᴋ itertarvikut seᴋinerdlerkut, itertorlo itertarvikut seᴋinerdlerkut anijuksauvoᴋ itertarvikut taggardlerkut; utertuksaungilaᴋ itertarvingmut itervigijaminut, sivumuatsainarlunele anijuksauvoᴋ.

¹⁰ Angajoᴋâᴋsoarlo iterune, tâpkoa akornganêdlune itertuksauvoᴋ, aniguniglo aniᴋatigijaksarivait.

¹¹ Uvloᴋsiorvingnelo uvloᴋsiorviksoarnelo tunergutiksaᴋ nerᴋiksaᴋ imaituksauvoᴋ: êfamik tuktuvangmut, êfamiglo saugarmut parngnermut, saugârsungnullo pijungnartanga maliklugo, orᴋsumiglo hinemik êfamut atausermut.

¹² Angajoᴋâᴋsoarlo tunergumik ôtaksamik tunergumiglônêt ulapᴋosertaujutiksamik kajungernerminit tunitjijomagune Nâlekamut, upkoêrutjaujuksauvoᴋ itertarvingmik ununga sângajomik, tunergullo ôtaksaᴋ tunergullo ulapᴋosertaujutiksaᴋ atuinarutitaksarivâ sorlo sabbatine pivangmat; anijuksauvorlo tagva; anigêrpallo itertarvik parngnanairsortaujuksauvoᴋ.

¹³ Kaut tamât saugârsungmik jârelingmik atautsimik ᴋanoetoᴋangitomik atuinaruterijuksauvotit tunergutiksamik ôtaksamik Nâlekamut; uvlât tamât tamanna pigiaraksarivat.

¹⁴ Uvlâllo tamât tâpsomunga ilautitsijuksauvotit tunergutiksamik nerᴋiksamik, tagva êfab pingasôjortolimajub pingasôjortoanik, ilaᴋartilugo orᴋsumik hinib pingasôlimajub pingajuanik, senaugatsiab akkûtiksanganik; tamanna tunergut nerᴋiksaᴋ Nâlekamut sorairtuksaungitoᴋ perᴋojaᴋ soᴋosingitoᴋ maliklugo.

¹⁵ Taimak saugârsuk, tunergullo nerᴋiksaᴋ, orᴋsorlo atuinarutitaksarivât uvlât tamât, tunergutiksauᴋovlugo ôtaksamik sorailungitomik.

¹⁶ Imâk oᴋarpoᴋ Nâlegaᴋ Nâlegaujoᴋ: Angajoᴋâᴋsub ernerme ilangit pilitsivigikpagit piliunik, tamakkoa kingormgutivait, erningita piksarivait; kingormgujijôvlutik perᴋutigivait.

¹⁷ Kingormgutijamele ilanga tunikpago kivgame ilanganut, tâpsoma pigijaksarivâ jâre kivgaujungnaiviksaᴋ tikidlugo; taipsomanele utertuksauvoᴋ angajoᴋâᴋsoarmut; tâpsoma kingormgutijanga erningita kissimik perᴋutigijaksarivait.

¹⁸ Angajoᴋâᴋsoarlo inuit kingormgutijanginit tigusijuksaungilaᴋ, pigijanginik aᴋsârlugit; ernine tunitjivigijaksarivait kingormgutijaksanik perᴋutiminit; inuᴋotikka siamarᴋonagit perᴋutimingnit.

¹⁹ Tikiutivânga tagva itervingmut itertarviub senianêtomut, ajoᴋertuijut igloarsunginut ivsornaitunut, avunga sângajunut; ahâglo, iniksaᴋarpoᴋ tunuane.

²⁰ Oᴋautivângalo: Iniksaᴋ tamanna tagva ajoᴋertuijut igavigijaksarijangat tunergutiksamik pasijaksairutiksamik tunergutiksamiglo ajortoêrutiksamik, igavigijaksarijangat tunergutiksamik nerᴋiksamik; âtsijariaᴋarᴋonagit tâpkoninga avaluliorsimajomut silardlermut, inuit ivsornaititauᴋonagit.

²¹ Tikiutilerivânga ama avaluliorsimajomut silardlermut, ingerartilungalo avaluliorsimajub terreᴋunginut sitamanut, ahâglo, avaluliorsimajub terreᴋungine tamaine avaluliorsimajoᴋarivoᴋ.

²² Avaluliorsimajub terreᴋungine sitamane attajunik avaluliorsimajoᴋarpoᴋ, talertut 40tut tukimut, talertullo 30tut senimut: tâpkoa sitamat terreᴋunêtut adsigêktomik ôktûteᴋarput.

²³ Tâpkoalo avatingine senasimajoᴋarpoᴋ, tâpkoa sitamat avatingine, senasimajullo atâne avatâne igaviksat senamavut.

²⁴ Oᴋautivângalo tagva: Tamadja igavit, kivgartortut iglome igavigijaksarijangit inuit tunergutinginik.