Hesekiel 45 - Labrador Inuttitut Heritage Bible

¹ Nuna imerautigigupsiuk avigomavlugo kingormgutijaksautitsomavlugo, nunab ilanga tunergutautitaujuksauvoᴋ ivsornaitoᴋ Nâlekamut, suvloliktitut 25,000titut tukimortotigijuksauvoᴋ, suvloliktitullo 10,000titut senimut, ivsornaituksauvoᴋ kiglinga ilûnât tikidlugo avamut.

² Tamattomangat 500 tukimut 500lo senimut ilingajuksauvoᴋ ivsornaitovingmut iktoᴋeriktoᴋ; talertullo 50tut avatâne ilûnâne erᴋâᴋartuksauvoᴋ.

³ Oktûtillo tamanna maliklugo ôktoraksarivat tukimut 25,000nik, senimullo 10,000nik: tâpsomanêtuksauvorlo ivsornaitovik, ivsornainerpaungmat.

⁴ Nunab ilanga tamanna ivsornaipoᴋ; ilingajuksauvoᴋ ajoᴋertuijunut, ivsornaitovingme kivgartortunut, najorniktut Nâlegaᴋ kivgartoromavlugo; tamanna iglungita inigijaksarijangit, ivsornaitoviub inigijanga ivsornaitoᴋ.

⁵ Tukimullo 25,000, senimullo 10,000 Levitinut ilingalârpoᴋ, iglome kivgartortunut, tâpkoa nangmineriniarpât, igloarsungnut 20nut.

⁶ Iglugasaksuillo piksanganik ilingatitsijuksauvose senimut 5,000nik tukimullo 25,000nik, ingmikôrtitab ivsornaitovingmut seniane: tamanna Israêlikunut tamainut ilingajuksauvoᴋ.

⁷ Angajoᴋâᴋsoarlo piksarsijaksarivase ingmikôrtitab ivsornaitub iglugasaksuillo pingita senerâgingne tamangne, ingmikôrtitablo ivsornaitub iglugasaksuillo pingata sivorâgingne, kangiata tungâne, kangimut, kitâtalo tungâne, kitâmut, tukimuarningalo adseᴋartuksauvoᴋ tâpkoa aipangata tukimuarninganik, kiglinganit kangianêtomit kiglinganut kitâmêtomut.

⁸ Nuna tamanna pigijaksarivâ Israêleme, angajoᴋângortitama inuit oᴋumaiksartitaksaringilait kingorngane; nunale tunijaksarivâ Israêlib ᴋitornganginut kinguvârêngit maliklugit.

⁹ Imâk oᴋarpoᴋ Nâlegaᴋ Nâlegaujoᴋ: Tamanna nâmagisiuk, ilipse angajoᴋaujose Israêleme; oᴋumaiksartitsineᴋ aksorotjinerlo pêjarsigik, idluartomiglo ajungitomiglo piniaritse; aᴋsârningniselo inuᴋotimnit sorairtisigik, oᴋarpoᴋ Nâlegaᴋ Nâlegaujoᴋ.

¹⁰ Nelautsijunik kiktitauteᴋartuksauvose, êfamiglo nelautsijomik, bâtimiglo nelautsijomik ôktortuksauvose.

¹¹ Efa bâtelo adsigêktuksauvuk, bâte hômerib tellimaujortolimajub tellimaujuatut ilutortigijuksauvoᴋ, êfalo hômerib tellimaujortolimajub tellimaujuatut; hômere ôktugaujuksauvoᴋ.

¹² Sêkeliblo adsigijaksarivait gêrat 20; sêkelit 20, sêkelillo 25, sêkelillo 15 katilugit mânni adsigijaksarivât ilipsingne.

¹³ Tamadja tunergutit tunijaksarijase: senaugaksamit hômeremit êfab pingasôjortolimajub pingasojortuanik, senaugâluksamillo hômeremit tunitjijuksauvose êfab pingasôjortolimajub pingasôjortuanik;

¹⁴ Orᴋsorlo tunijaksauᴋojaujoᴋ imaipoᴋ: orᴋsumit bâtemik, bâtib tellimaujortolimajub tellimaujuanik kôremit, kôrib bâtit 10 adsigingmagit; bâtillo 10 hômeretun-iput.

¹⁵ Sauᴋanillo katimgajunit 200nit atauseᴋ tunijaksauvoᴋ Israêlib naᴋsanginit imeᴋatsiartunit, tagva tunergutiksaᴋ nerᴋiksaᴋ, tunergutiksarlo ôtaksaᴋ, tunergutiksarlo ulapᴋosertaujutiksaᴋ, ulapᴋosertauᴋovlugit, oᴋarpoᴋ Nâlegaᴋ Nâlegaujoᴋ.

¹⁶ Inuit nunamêtut ilûnatik tunitjiᴋataujuksauvut tunergutimut tamattomunga angajoᴋâᴋsoangojomut Israêleme.

¹⁷ Angajoᴋâᴋsublo tunijaksarivait tunergutiksat ôtaksat, tunergutiksallo nerᴋiksat, tunergutiksallo imiksat uvloᴋsiorvingne, taᴋᴋêlarnelo, sabbatinelo, Israêlib ᴋitorngangita uvloᴋsiorvioᴋojangine tamaine, tâpsoma atuinarutitaksarivait tunergutiksat ajortoêrutiksat, tunergutiksallo nerᴋiksat, tunergutiksallo ôtaksat, tunergutiksallo ulapᴋosertaujutiksat, Israêlib ᴋitorngangita ulapᴋosertaujutiksangat.

¹⁸ Imâk oᴋarpoᴋ Nâlegaᴋ Nâlegaujoᴋ: Taᴋᴋiub sivorlerpâb uvlungita sivorlerpângane, tuktuvangmik piaravinermik ᴋanoetoᴋangitomik tigusijuksauvotit; ivsornaitoviglo sujungaitilugo.

¹⁹ Ajoᴋertuijorlo tigusijuksauvoᴋ tunergutib ajortoêrutiub aungata ilanganik, pitilugolo upkoab napajûgingnut, tunerguserviublo iglernaujangata terreᴋunginut sitamanut, avaluliorsimajublo ilulliub itertarvingata napajûgingnut.

²⁰ Taimailiortuksaugivotillo taᴋᴋiub uvlungita 7ingane tamartut opaluijaumajullo ilûnaita pivlugit; taimak iglo ulapᴋosertautitaksarivase.

²¹ Taᴋᴋerme sivorlerpâme, taᴋᴋiub uvlungita 14ingane ᴋângerviksiortuksauvose, uvlut 7 nâvlugit uvloᴋsiorviovoᴋ; ᴋaᴋᴋôjat pubjusauteᴋangitut nerᴋiksaujuksauvut.

²² Uvlorme tâpsomane angajoᴋâᴋsub tuktuvak atuinarutitaksarivâ tunergutiksaᴋ ajortoêrutiksaᴋ nangmineᴋ pivlune nunablo inungit tamaita pivlugit.

²³ Uvloᴋsiorviublo uvlungine 7ne atuinarutitaksarivâ tunergutiksaᴋ ôtaksaᴋ Nâlekamut, tuktuvait 7 sauᴋallo parngnit 7 ᴋanoetoᴋangitut ᴋaut tamât uvlut 7 nâvlugit; tuktungajorlo parngneᴋ ᴋaut tamât tunergutiksaᴋ ajortoêrutiksaᴋ.

²⁴ Tunergutiksarlo nerᴋiksaᴋ atuinarutitaksarivâ, êfa atauseᴋ tuktuvangmut atautsimut, êfalo atauseᴋ saugarmut atautsimut, orᴋsorlo hine atauseᴋ êfamut atautsimut.

²⁵ Taᴋᴋit 7ingane, uvlungita 15ingane uvloᴋsiorvingme, taimailiortuksauvoᴋ uvlut 7 nâvlugit, tunergutiksat ajortoêrutiksat, tunergutiksallo ôtaksat, tunergutiksallo nerᴋiksat orᴋsorlo taimailiorlugit.