Hesekiel 44 - Labrador Inuttitut Heritage Bible

¹ Utertipanga tagva katimaviub itertarvingata silardliub, ununga sângajub, apᴋutingagut, parngnanairsimavorle.

² Nâlekablo oᴋautivânga: Itertarvik una parngnanairsimajuksauvoᴋ, upkoêrtaujuksaungilarlo, tamaunalônêt itertoᴋartuksaungilaᴋ, Nâlegaᴋ, Israêlib Gudinga, tamauna itermat; tamanna pivlugo parngnanairsimajuksauvoᴋ.

³ Angajoᴋâᴋsoarle, angajoᴋâᴋsoangogame iksivajuksauvoᴋ tagvane nerᴋiksaᴋ nerrilugo Nâlekab sângane; itertuksauvoᴋ itertarviub torᴋsukatângagut, tagvûnatsainarlo anijuksauvoᴋ.

⁴ Tikiutilerivânga ama iglub sânganut itertarviub avunga sângajub apᴋutâgut; takosarpungalo, ahâglo, iglub Nâlekab ânanauninga ilumigivâ; pâmangalerpungalo.

⁵ Nâlekablo oᴋautivânga: Inûb erninga, kamatsiarit, ijîngnullo takotsiarit, siutîngnullo tusatsiarit tamainik oᴋautigijamnik ilingnut Nâlekab iglungane ilusioᴋojaujut perᴋojaujullo tamaita pivlugit; kamatsiarillo iglub itervinginik, ivsornaitoviublo anivinginik tamainik.

⁶ Tapatojullo, Israêlib ᴋitorngangit, oᴋautijaksarivatit: Imâk oᴋarpoᴋ Nâlegaᴋ Nâlegaujoᴋ: Ilipse, Israêlib ᴋitorngangit, maᴋojungnartulinernut tamainut sugalulualilauᴋpose.

⁷ Takorngartat, ômatikut kipimangitut, uvinikullo kipimangitut, itertigapsigik ivsornaitovimnut, igluga ivsornaijungnaitilugo, tunergusertiluse nerᴋiksamnik, orᴋsumiglo aungmiglo; tagva serᴋomitsineᴋ angerutigilauᴋtamnik ilautipase maᴋojungnartulinipsingnut tamainut.

⁸ Pairᴋsitsialungilaselo pimnik ivsornaitunik, ilijivosele simmertiksapsingnik pairᴋsijuksanik pimnik ivsornaitovimne.

⁹ Imâk oᴋarpoᴋ Nâlegaᴋ Nâlegaujoᴋ: Takorngartaᴋ, kipimangitoᴋ ômatikut kipimangitorlo uvinikut, itertuksaungilaᴋ ivsornaitovimnut, takorngartaᴋ, Israêlib ᴋitorngangita akornganêtut neliallônêt.

¹⁰ Levitille, uvamnik allalauᴋtut, Israêlikut tamarmatta uvamnit, uvamnit tamarlutik gudingoaᴋotitik maligomavlugit, tâpkoa idluinitik nangmaraksarivait.

¹¹ Kivgartortuksauvulle ivsornaitovimne, iglub itertarvingit udjertorlugit, kivgartorlutiglo iglome, toᴋotsijuksauvut tunergutiksanik ôtaksanik tunergutiksaniglo inuit pivlugit, nangertuksauvullo inuit sângine kivgartorlugillo.

¹² Kivgartulaungmatta gudingoangita sângine, oggoviksangordlutik idluitulinitik pivlugit Israêlib ᴋitornganginut, tamanna pivlugo aggakka isakpakka tâpkonunga, oᴋarpoᴋ Nâlegaᴋ Nâlegaujoᴋ, idluinitiglo nangmaraksarivait.

¹³ Najorniktuksaungilallo uvamnut, ajoᴋertuijub piniaraksarijanginik piniaromavlutik, najorniktuksaungilallônêt ivsornaitoᴋotima nelianik, pimnik ivsornainerpaujunik; nangmartuksauvulle naggonarnermingnik maᴋojungnartulinermingniglo piniartamingnik.

¹⁴ Pairᴋsijuksangortitsomavakkale iglumnik, kivgartortauningine tamaine, tamainelo piniartaujariaᴋartune takamane.

¹⁵ Ajokertuijulle Levitit, Zâdokib erningit, pairᴋsilauᴋtut ivsornaitovimnik Israêlib ᴋitorngangit tamarmatta uvamnit, tâpkoa najorniktuksauvut uvamnik kivgartorlunga, tâpkoa nangertuksauvut sâmne tunerguserlutik orᴋsumiglo aungmiglo uvamnut, oᴋarpoᴋ Nâlegaᴋ Nâlegaujoᴋ:

¹⁶ Tâpkoa itertuksauvut ivsornaitovimnut, sâmniglo najorniktuksauvlutik, kivgartorlunga, pairᴋsilutiglo pimnik.

¹⁷ Imaituksauvorlo: avaluliorsimajub ilulliub itertarvingagut iterunik, annorâlijartuksauvut ilupâksajanik; merᴋolingnik sumiglônêt atisimajuksaungilat kivgartortilugit avaluliorsimajub ilulliub itertarviata iluane iglomelônêt.

¹⁸ Niaᴋomingne ilupâksajanik nessaᴋsimajuksauvut, ᴋetermingnelo ilupâksajanik ᴋarlilijartuksauvut; kiaksiornartunik atisijuksaungilat.

¹⁹ Anijarangamiglo avaluliorsimajomut silardlermut, tagva avaluliorsimajomut silardlermut inungnut, annorâtik kivgartûtitik pêjaraksarivait ililugillo igloarsungnut ivsornaitunut, annorângniglo tâpkoa assinginik atisijuksauvut, ivsornaititsiᴋonagit inungnik annorângmingnut.

²⁰ Umgijartuksaungilat niaᴋomingnik, nujatiglônêt salijaunatik perortitaksaringilait, niaᴋungille nâmatuinartomik salijaujuksauvut.

²¹ Ajoᴋertuijullo neliat vainetortuksaungilaᴋ iteromalerune avaluliorsimajomut ilullermut.

²² Nulianiktuksaungilallo uigarnernik avitaniglônêt; uigasungnigle Israêlib ᴋitorngangita kinguvânginit, uigarnerniglônêt ajoᴋertuijôlauᴋtub uigarninganik.

²³ Inuᴋotikkalo ajoᴋertoraksarivait hailigiojut hailigiungitullo adsigênginîgingnik, ilitarᴋsitilugillo ivsornaitut ivsornaingitullo adsigênginîgingnik.

²⁴ Akkerartûtijoᴋarpallo nangertuksauvut idluarsaivlutiglo, idluarsainikka maliklugit idluarsaraksarivât, uvloᴋsiorᴋojamne tamaine perᴋojakka maligaksauᴋojakkalo piniaraksarivait; sabbateᴋotikkalo opigijaksarivait.

²⁵ Itertuksaungilallo toᴋungajomut ivsornartitsiᴋonagit nangminermingnik; kissiane atâtamut anânamullônêt, ernermut paningmullônêt, ᴋatangutimut angutimut ᴋatangutimullônêt arnarmut uiᴋalauᴋsimangitomut sulle, ivsornartitsijungnarput nangminermingnik.

²⁶ Ivsornarungnaititauninganillo kititsijuksauvut uvlunik 7nik tâpsomunga.

²⁷ Uvlormelo itervigijangane ivsornaitovingmut, avaluliorsimajomut ilordlermut, kivgartoromavlune ivsornaitovingme, tunergusertuksauvoᴋ tunergutiksaminik ajortoêrutiksamik, oᴋarpoᴋ Nâlegaᴋ Nâlegaujoᴋ.

²⁸ Kingormgutijaksaᴋartuksauvullo; uvanga kingormgutijaksauvunga tâpkonunga; taimaimat tunitjivigijaksaringilase perᴋutiksaujomik Israêleme; uvanga perᴋutiksauvunga tâpkonunga.

²⁹ Nerᴋiksaᴋartuksauvut tunergutinik nerᴋiksanik, tunergutiniglo ajortoêrutiksanik, tunergutiniglo passijaksairutiksanik; ama pigijaksarivait tamaita (Nâlekamut) tunijautitaujut Israêleme.

³⁰ Sunatuinaillo pijariorutingita sivorlerpângit, tunijaujullo ilûnatik sunatuinaujut, tunergutise ilûnatik, ajoᴋertuijut pigijaksarivait; senaugapselo pijariorutingit tunijaksarivase ajoᴋertuijunut, saimanartoᴋ iniᴋatsainarᴋovlugo iglupsingne.

³¹ Ajoᴋertuijut nerrijuksaungilat ingminik toᴋojomik, aliktortamiglônêt, tingmiangogaloarpat nergjuteokpallônêt.