Hesekiel 43 - Labrador Inuttitut Heritage Bible

¹ Kingorngane tikiutivânga itertarvingmut, itertarvingmut ununga sângajomut;

² Ahâglo, Israêlib Gudingata ânanauninga tikilerpoᴋ unangat: iktulijângalo ingiulît nunamut ᴋarrâjut iktulijârningititut ipoᴋ, nunalo ᴋeblerpoᴋ tâpsoma ânanauninganut.

³ Ilingavoᴋ takotitjutib takolauᴋtama tautungatut, ilâ, takotitjutitut takojaptut tikinama iglugasaksuit asseroromavlugit; takotitjutillo ipoᴋ takotitjutitut takojaptut kôngme Kêbareme: pâmangalerpungalo.

⁴ Nâlekablo ânanauninga iterpoᴋ iglomut upkoakut ununga sângajokut.

⁵ Anernerublo ᴋangatarpânga pitilungalo avaluliorsimajomut ilullermut, ahâglo, iglub Nâlekab ânanauninga ilumigivâ.

⁶ Tusarpungalo uvamnut oᴋartomik iglomit; angullo nangerpoᴋ senimne.

⁷ Oᴋautivângalo: Inûb erninga, tamanna tagga iksivautaᴋsoarma ininga, itikamalo alungita iningat, inigitsainaromârtara Israêlib ᴋitorngangita akorngane issoᴋangitomut; Israêliblo ᴋitorngangita attera ivsornaitoᴋ ivsornartitsungnairomârpât kingorngane, tâpkoalônêt ataningitalônêt, assiniarnermingnut atanermiglônêt timevininginut poᴋtonermingne;

⁸ Mannoatik ilingmatigik mannoamnut, upkoangitalo ᴋoakjulingit upkoama ᴋoakjulingata senianut, ᴋarmaᴋ kissime akulioᴋovlugo uvamnullo tâpkonungalo; atteralo ivsornaitoᴋ ivsornartipât maᴋojungnartulinermingnut piniarnerijamingnut; tamanna pivlugo nungupakka ningaumajârnimne.

⁹ Mânale ungasiktitsilerlit assiniarnermingnik atanermiglo timevininginik uvamnit, akornganelo iniᴋatsainaromârpunga issoᴋangitomut.

¹⁰ Igvit, inûb erninga, Israêlib ᴋitorngangit nelonaijaivigikit iglomik ominga, kangusudlarᴋovlugit idluitulinitik pivlugit; ivsornainingalo igjarlitsuk.

¹¹ Piniarnitiglo tamaita kangusûtigigunigit, tagva iglub mattoma ilutsingit ilinganingillo, anivingit itervingillo, piusiksangillo tamaita, maligaksauᴋojangillo ilusioᴋojangillo, perᴋojangillo tamaita nelonaijarkit tâpkonunga, aglakillo tâpkoa takoane, ilusioᴋojanginik maligaksauᴋojanginiglo tamainik maliᴋovlugit piniarᴋovlugillo.

¹² Tamanna tagva perᴋojaᴋ iglo pivlugo: Kaᴋᴋab ᴋânga avatâ ilûnane ivsornaitoᴋsôdlartuksauvoᴋ. Ahâk tagga, tamanna perᴋojauvoᴋ iglo pivlugo.

¹³ Tunerguserviub angininga talit maliklugit imaipoᴋ: (taleᴋ aggait silingninginik tappeᴋartuksauvoᴋ:) tungavinga talertut atausertut, senimualo talertut atausertut, siningatalo avaliarutanga avatâgut aggait issangningit atautsit; tamanna tunerguserviub tungavinga.

¹⁴ Tungavinganillo nunamêtomit iglernaujarmut allermut talîk maggôjuksauvuk, silingningalo talertut atausertut; iglernaujarmillo mikinersamit iglernaujarmut anginersamut talit sitamaujuksauvut, silingningalo talertut atausertut.

¹⁵ Ikomaᴋarviglo poᴋtonersaᴋ talertut sitamatut ituksauvoᴋ, ikomaᴋarvingmillo ᴋongmut nakjuᴋartuksauvoᴋ sitamanik.

¹⁶ Ikomaᴋarviglo talertut 12tut takitigijuksauvoᴋ talertullo 12tut senimut, iktoᴋeriklune senerangine sitamane.

¹⁷ Iglernaujarlo talertut 14tut takitigijuksauvoᴋ talertullo 14tut senimut senerangine sitamane, avaliarutangalo avatâne taliub abvangatut ituksauvoᴋ; allerangallo talertut ituksauvoᴋ avatâgut; majutingillo ununga sângajuksauvut.

¹⁸ Okautivângalo: Inûb erninga, imâk oᴋarpoᴋ Nâlegaᴋ Nâlegaujoᴋ: Tamadja maligaksat tunerguservik pivlugo uvlorme senajauvigijangane, tunergutit ikoâlajaksat ilijomavlugit tagvunga, aungmiglo serparsarvigijomavlugo.

¹⁹ Ajoᴋertuijut Levitit Zadokib kinguvângit sâmnêtuksat kivgartoromavlunga, oᴋarpoᴋ Nâlegaᴋ Nâlegaujoᴋ, tunitjivigijaksarivatit tuktuvârarmik tunergutiksamik ajortoêrutiksamik.

²⁰ Tigusijuksauvotillo aungata ilanganik, pitilugolo tunerguserviub nakjunginut sitamanut iglernaujablo terrekunginut sitamanut avaliarutangata avatânut; taimak sujungaititaksarivat ulapirᴋsarlugolo.

²¹ Tuktuvârarlo tunergutiksaᴋ ajortoêrutiksaᴋ tigujaksarivat, tâpsomalo ikitaksarivâ iglub ilangane tamattomunga ilingatitaujome, ivsornaitoviub silatâne.

²² Uvlublo aipangane tuktungajomik angusalungmik ᴋanoetoᴋangitomik tunergusertuksauvotit ajortoêrutiksauᴋovlugo; tunerguserviglo sujungaititaksarivât sorlo sujungaitingmatsuk tuktuvârarmut.

²³ Sujungaitijarêrungne tunergusertuksauvotit tuktuvârarmik ᴋanoetoᴋangitomik saugarmiglo angusalungmik saugaᴋotinit.

²⁴ Nâlekablo sânganut tikiutijaksarivakik, ajoᴋertuijullo karngasoivigijaksarivakit sioraujanik, tunergutigijaksarivakillo tunergutiksâk ôtaksâk Nâlekamut.

²⁵ Uvlune 7ne ᴋaut tamât atuinaruterijuksauvotit tuktungajomik tunergutiksamik ajortoêrutiksamik; atuinaruterijuksauvotittauᴋ tuktuvârarmik saugarmiglo angusalungmik saugaᴋotinit, ᴋanoetoᴋangitunik.

²⁶ Uvlut 7it nâvlugit tunerguservik ulapᴋoseraksarivât sujungaitilugolo, taimaglo ivsornaitilârpât.

²⁷ Uvlullo tâpkoa nâgêrpatta, uvlut 8ingane kingornganelo ajoᴋertuijut tunergutise ôtaksat tunergutigijaksarivait tunerguservingme, tunergutiselo ulapirᴋsartaujutiksat; uvangalo ilalioromavapse, oᴋarpoᴋ Nâlegaᴋ Nâlegaujoᴋ.