Hesekiel 41 - Labrador Inuttitut Heritage Bible

¹ Tikiutilerivangalo katimaviksoarmut, iglernaujangillo ôktorpait, talertut pingasojortotut siliktigivut seniane omane, talertullo pingasojortotut seniane igluane, tamanna tupiolauᴋtub silingnerijanga.

² Pâlo talertut tellimaujortotut siliktigivoᴋ, pâblo senîgik iglotut talertut tellimatut; tukimorningalo ôktorpâ, talertut 40tut, senimorningalo talertut 20tut.

³ Ilullermullo iterlune, pâb iglernaujangit ilûnatik ôktorpait, talertut maggotut; pâlo, talertut pingasojortotut, pâblo senimortoninga talertut 7tut.

⁴ Tukimortoninga ôktorpâ, talertut 20tut, senimortoningalo talertut 20tut, katimaviub sângane; oᴋautivângalo: Tamanna ivsornainerpângovoᴋ.

⁵ Iglublo ᴋarmanga ôktorpâ, talertut pingasojortotut; igloarsuillo ᴋarmardlit iglub avatâne ilûnâne ilûnatik talertut sittamatut senimortotigivut.

⁶ Igloarsuillo ᴋarmarnerdlit ᴋollerêngovut pingasunik, atilulugit 30ovut; atavigivâllo ᴋarmaᴋ igloarsunut ᴋarmarnerdlernut iglub seniane senasimajoᴋ avatâne, ilûnâne, tâpsomunga aulajuititauᴋovlugit; igluble ᴋarmanganut atalungilat.

⁷ Igloarsuillo ᴋarmarnerdlit ᴋollerêngningine senimortosivaliavut; pisugviksat iglub seneranginêtut ᴋollerêngmatta ilûnâne: taimaimat iglo senimortosivaliavoᴋ ᴋongmut; taimaglo majoartoᴋarpoᴋ allerpâmit ᴋollerpâmut ᴋerᴋanêtokut.

⁸ Takogivunga iglo poᴋtojôngmat avatâne ilûnâne; igloarsuit ᴋarmarnerdlit tungavingit ôktûtemarik atausiarmatsuk talertitut angijotitut pingasojortutitut.

⁹ Karmaᴋ, igloarsungnut ᴋarmarnerdlernut ilingajoᴋ, silatâne, talertut tellimatut ibjutigivoᴋ; tâpkoalo seneranginit akuliojoᴋ iglub seneranganut, ilingavoᴋ igloarsungnut ᴋarmarnerdlernut.

¹⁰ Igloarsuillo akoningit talertut 20tut senimortotigivoᴋ iglub avatâne ilûnâne.

¹¹ Igloarsuillo ᴋarmarnerdlit upkoâgik sângavuk akornganêtomut, upkoaᴋ avunga sângajoᴋ atauseᴋ, upkoarlo seᴋinermut sângajoᴋ atauseᴋ: akuliojorlo avatâne ilûnâne talertut tellimatut senimortotigivoᴋ.

¹² Iglo nunaujub ingmikôrtub nellâne kangimut sângajoᴋ talertut 70tut senimortotigivoᴋ; iglublo ᴋarmanga avatâne ilûnâne talertut tellimatut ibjutigivoᴋ, talertullo 90tut tukimortotigivoᴋ.

¹³ Iglolo ôktorpâ talertut 100tut tukimortotigivoᴋ; nunaujorlo ingmikôrtoᴋ, iglolo, ᴋarmangit ilagivlugit, talertut 100tut tukimortotigivoᴋ.

¹⁴ Iglublo sânga, nunaujorlo ingmikôrtoᴋ, taununga sângajoᴋ, talertut 100tut senimortotigivoᴋ.

¹⁵ Oktorpatauk iglub tukimortoninga nunaujub ingmikôrtub tâpsoma tunuanêtub sângane, senamajullo tâpsomungalo ilingajut ilagivlugit, iglutut talertut igloenartut 100tut; katimaviglo ilulleᴋ torᴋsukatângillo:

¹⁶ Iglernaujangillo, igalâllo killapatâlit, senamajullo tâpsoma avatâne ᴋollerêngne pingasune, iglernaujab akiane, avakut ilupiarutsertaujoᴋ ᴋejungmik, nunamillo igalât tikidlugit; igalâllo taimaitomik kalineᴋarput,

¹⁷ Paungalo upkoab ᴋollâ tikidlugo, iglo ilordleᴋ tikidlugo, silatanelo, ᴋarmarnelo ilûnâne avatâgut iluanelo silatânelo, ôktût maliklugo.

¹⁸ Kerubingoaliorsimavorlo palmingoaniglo, kerubingoaglo magguk akuleᴋarpuk napârtungoarmik palmimik, kerubingoallo ilûnatik kênaᴋarput maggungnik;

¹⁹ Igluane inûb kênangoanga palmemut sangmivoᴋ, igluanelo loevearaub kênangoanga palmemut sangmivoᴋ iglo ilûnâne taimailiortaumavoᴋ avatâgut.

²⁰ Nunamit paunga upkoab ᴋollânut kerubingoat napârtungoallo palmit senajaumavut; taimailingavoᴋ katimaviub ᴋarmanga.

²¹ Katimaviublo upkoangita napajungit iktoᴋerikput, ivsornaitoviublo sânga tautuᴋarpoᴋ katimaviub tautuatut.

²² Tunerguservik ᴋejungmit senamavoᴋ, talertut pingasutut poᴋtotigivoᴋ, talertullo magguktut tukimortotigivoᴋ; terreᴋungillo ᴋângalo senerangillo ᴋejungmit senamavut; oᴋautivângalo: Sâ tamanna Nâlekab sânganêtuksauvoᴋ.

²³ Katimaviglo ivsornaitoviglo tamarmik upkoaᴋarpuk maggungnik.

²⁴ Upkoallo atunit makpertigaᴋarput maggungnik ᴋebvêtautelingnik; makpertigak magguk upkoarmut atausermut, makpertigaglo magguk assianut.

²⁵ Tâpkonanelo senamajoᴋarpoᴋ kerubingoarnik napârtungoarniglo palminik, ᴋarmarne senamajut adsinginik. Kejuᴋarporlo ᴋoakjulingnik siliktunik torᴋsukatâb sângane silatâne.

²⁶ Igalâᴋarporlo killapatâlingnik napârtungoarniglo palminik torᴋsukatâb senerâgingne tamangne; taimailingavullo iglub igloarsungit ᴋarmarnerdlit ᴋoakjulillo siliktut.