Hesekiel 40 - Labrador Inuttitut Heritage Bible

¹ Aularutijaunipta jâringita 25ingane, jârib pigiarningane, taᴋᴋiub uvlungita 10ingane, iglugasaksuit sugiartautainarningita jâringita 14ingane, uvlorme tâpsomaneluatsiaᴋ Nâlekab aggangita ᴋolangiarpânga, tamaungautivângalo.

² Takotitjutikut Gudemit pijokut tikiutivânga Israêlib nunanganut, ilivlungalo ᴋaᴋᴋamut poᴋtojomaringmut, tâpsomalo ᴋaᴋᴋaub seᴋerngane iglugasaksoangojârtut senajaulertut takovakka.

³ Tagvungautingmangalo, nutte angut, ᴋaᴋorlertut tautulik, aggangminut tigumiartoᴋ noᴋaᴋserpalautimik ivaluksajarmik, suvlulingmiglo ôktutemik; nangerporlo itertarvingme.

⁴ Angutiblo oᴋautivânga: Inûb erninga, ijîngnut takolerit, siutîngnut tusalerit, ômatillo kamatsiartiuk tamainik takotitjutigijomajamnik ilingnut, takotijomagapkit tamakkoninga tamaungautijauvotit: takojatit tamaita oᴋautigikit Israêlib ᴋitornganginut.

⁵ Ahâglo, ᴋarmaᴋsoaᴋarpoᴋ iglub silatâne avatâne ilûnâne; angullo suvlolingmik ôktutemik tigumiartoᴋ aggangminut talertut pingasojortotut takitigijomik, taleᴋ agait silingninganik tappeᴋarpoᴋ; ᴋarmangatalo ibjuninga ôktorpâ, suvlulik atausiardlugo; poᴋtoningalo, suvlolik atausiardlugo.

⁶ Tikiporlo tagva itertarvingmut ununga sangmijomut, majorarlunelo majutigut: ôktorpâlo itertarviub iglernaujanga, suvlolik atausiardlugo siliktigijoᴋ, tagva iglernaujaᴋ atauseᴋ suvlolik atausiardlugo siliktigivoᴋ.

⁷ Inillo ilûnatik (tagva itertarviub udjertortingita inigijangit) atunit suvlolik atausiardlugo takitigivut, suvloliglo atausiardlugo senimutortigivut; inillo akuningit talertut telimatut, itertarviublo iglernaujanga itertarviub torᴋsukatângata seniane, iglo sângalugo, suvlolik atausiardlugo.

⁸ Oktorpâtauᴋ itertarviub torᴋsukatânga, iglo sângalugo, suvlolik atausiardlugo.

⁹ Ama ôktorivâ itertarviub torᴋsukatânga, talertut sitamaujortotut; iglernaujangalo, talertut maggotut, itertarviublo torᴋsukatângata iglo sângavâ.

¹⁰ Itertarviublo iningit pingasôvut seniane omane, pingasullo seniane tâpsomane, tâpkoa pingasut ilûnatik adsigêktomik angineᴋarput; iglernaujangillo senerâgingne tamangne adsigêktunik angineᴋarput.

¹¹ Oktorivâtauᴋ upkoab itertarvingmêtub silingninga, talertut telimaujortotut; majorarviglo itertarvingmut, talertut 13tut.

¹² Inillo sivorângata seniane iksivaviᴋarput iglotut, iksivavik talertut atausertut seniane tamattomane, iksivaviglo talertut atausertut seniane tâpsomane; init nangmineᴋ atunit iglotut talertut pingasojortotut angitigivut.

¹³ Taimaktauᴋ itertarvik ôktorivâ iniub ilangata ᴋolânit iniub aipangata ᴋolânut, talerut 25tut senimortotigivoᴋ; upkoaᴋarpoᴋ silaligêngnik.

¹⁴ Napajoliorporlo, talertut 60tut poᴋtotigijomik, napajullo ilumavât itertarviub avaluliorsimaninga.

¹⁵ Itertarviublo silaliub upkoanganit itertarviub torᴋsukatânganut ilulermut ilingajoᴋ, takininga talertut 50tut takitigivoᴋ.

¹⁶ Inillo torᴋsukatâllo igalâᴋarput killapatâlingnik iglernaujaniglo upkoat avatâne, iglernaujaᴋarivorlo torᴋsukatât igalâllo avatâne, iglernaujallo avatâgut napârtungoaᴋarpoᴋ palmingoanik.

¹⁷ Tikiutilerivângalo avaluliorsimajomut silalermut, sunaubvalo igloarsuᴋarpoᴋ, natsiteᴋarporlo ujarᴋanik senasimajunik silalerme ilûnâne; natsitelingme tâpsomane igloarsuᴋarpoᴋ 30nik.

¹⁸ Natsitiliglo itertarvit senianêpoᴋ, itertarvit silingningititut siliktigivoᴋ; tamadja natsitelik alleᴋ.

¹⁹ Oktorpâlo nerrotoninga itertarviub alliub sânganit avaluliorsimajub ilulerub sânganut silatâgut talertut 100tut, kitânelo taggânelo.

²⁰ Avaluliorsimajublo silalerub itertarvinga taggamut sangmijoᴋ ôktorpâ tukimullo senimullo.

²¹ Tâpsomalo iningit pingasôvut seniane omane pingasullo seniane tâpsomane, iglernaujangillo igloarsungillo taimak angitigivut sorlo itertarvingme sivorlerme; takiningit talertut 50tut, silingningillo talertut 25tut.

²² Igalângillo, igloarsungillo, napârtungoangillo palmingoat itertarviub kitânut sangmijub pingititut angitigivut; majutikullo tungmeralikut 7nik tagvunga majorarput; igloarsungillo sivorânêput.

²³ Avaluliorsimajorlo iluleᴋ itertarveᴋarpoᴋ itertarviub aipangata akiane, taggânelo kitânelo; itertarvingmillo itertarvingmut ôktorpâ talertut 100tut.

²⁴ Tesiorpânga tagva aunga, ahâglo, itertarveᴋarpoᴋ aunga sangmijomik; ôktorpaillo torᴋsukatângit igloarsungillo ôktûtit makkoa maliklugit.

²⁵ Tagvanelo igalâᴋarpoᴋ igloarsungita avatâne, igalâᴋtitut ipkotitunaᴋ, takiningit, talertut 50tut, silingningillo talertut 25tut.

²⁶ Majutillo tungmeraᴋarput 7nik, igloarsungillo sivorânêput; napârtungoaᴋarporlo palmingoanik, aipâ seniane tamattomane, aipangalo seniane tâpsomane iglernaujangine.

²⁷ Avaluliorsimajorlo iluleᴋ itertarveᴋarpoᴋ aunga sangmijomik; ôktorpâlo itertarvingmit itertarvingmut aunga sangmijomut talertut 100tut.

²⁸ Tikiutilerivângalo avaluliorsimajomut ilulermut itertarvikut aunga sangmijokut; ôktorpâlo itertarvik aunga sangmijoᴋ ôktûtit tâpkoa maliklugit.

²⁹ Iningillo iglernaujangillo igloarsungillo ôktûtit tâpkoa maliklugit; igalâᴋarporlo igloarsungita avatâne; talertut 50tut takitigivoᴋ, talertullo 25tut siliktigivoᴋ.

³⁰ Igloarsuᴋarporlo avatâne, talertut 25tut takitigilutik, talertullo tellimatut siliktigilutik.

³¹ Igloarsungillo avaluliorsimajomut silalermut sangmivut; palmingoaᴋarporlo iglernaujangine; majutillo tungmeraᴋarput sitamaujortunik.

³² Tikiutivângalo avaluliorsimajomut ilulermut unanêtokut; itertarviglo ôktorpâ ôktûtit makkoa maliklugit.

³³ Iningillo iglernaujangillo igloarsungillo ôktûtit makkoa maliklugit: igalâᴋarporlo igloarsungita avatâne; talertut 50tut takitigivoᴋ, talertullo 25tut siliktigivoᴋ.

³⁴ Igloarsungillo sangmivut avaluliorsimajomut silalermut; palmingoaᴋarporlo iglernaujangita seniane omane senianelo tâpsomane; majutillo tungmeraᴋarput sitamaujortunik.

³⁵ Tikiutivângalo itertarvingmut aunga sangmijomut; ôktorpâlo ôktûtit makkoa maliklugit;

³⁶ Iningillo iglernaujangillo igloarsungillo; igalâᴋarporlo avatâne: takininga, talertut 50tut, silingningalo talertut 25tut.

³⁷ Iglernaujangillo sangmivut avaluliorsimajomut silalermut; palmingoaᴋarporlo iglernaujangita seniane omane senianelo tâpsomane; majutingillo tungmeraᴋarput sitamaujortunik.

³⁸ Igloarsuᴋarivok ama upkoalingmik iglernaujat seningine itertarvit seninginêtune; tagvane tunergutiksat ôtaksat ergortortauvut.

³⁹ Itertarviublo torᴋsukatângata iluane sâᴋarpoᴋ maggungnik seniane tamattomane, sâglo magguk seniane tâpsomane, toᴋotsiviksanik tunergutiksanik ôtaksanik, tunergutiksaniglo ajortoêrutiksanik, tunergutiksaniglo pasijaksairutiksanik.

⁴⁰ Senianelo silatâne itertarviub avunga sangmijub pângata majutingine, sâᴋarpoᴋ maggungnik, ama igluane, itertarviub torᴋsukatângata seniane sâᴋarivoᴋ maggungnik.

⁴¹ Sâᴋarpoᴋ sitamanik seniane tamattomane, sâᴋarporlo sitamanik seniane tâpsomane, itertarviub seniane sât sitamaujortut toᴋotsiviksat tunergutiksanik.

⁴² Tunergutinullo ôtaksanut ilingajunik sâᴋarivoᴋ sitamanik, ujarᴋanit senamajunik, talertut abvatullo takitigivut, talertullo abvatullo senimortotigivut, talertullo atausertut poᴋtotigivut; tâpkoa ᴋânginut sakkut toᴋotsitiksat tunergutiksanik ôtaksanik ajortoêrutiksaniglo ilijauvut.

⁴³ Iglublo iluane ᴋolerutsiviᴋarpoᴋ ivertisimajunik avatâne aggait silingningititut: sâllo ᴋânginut nerᴋit tunergutiksat ilijauvut.

⁴⁴ Avaluliorsimajublo ilulerub silatâne igloarsuᴋarpoᴋ imgertinut avaluliorsimajome ilulerme, itertarviub avatânêtub seniane; tâpkoa aunga sangmivut; itertarviublo unanêtub senianêtoᴋ sangmivoᴋ avunga.

⁴⁵ Oᴋautivângalo: Igloarsuk una aunga sangmijoᴋ ajoᴋertuijunut udjertortunut piksanginik ilingavoᴋ.

⁴⁶ Igloarsuglo avunga sangmijoᴋ ajoᴋertuijunut tunerguserviub piksanginik udjertortunut ilingavoᴋ; tâpkoa Zâdokib kinguvârivait, tâpkoa kissimik Levib kinguvânginit najorniktuksauvut Nâlekamik, tâmna kivgartorlugo.

⁴⁷ Avaluliorsimajorlo ôktorpâ, talertut 100tut tukimut, talertullo 100tut senimut, iktoᴋeriktoᴋ; tunerguserviglo iglub sânganêpoᴋ.

⁴⁸ Tikiutilerivângalo iglub torᴋsukatânganut, torᴋsukatâblo iglernaujangit ilûnaita ôktorpait, talertut tellimatut seniane omane, talertullo tellimatut seniane tâpsomane; itertarviglo talertut pingasutut siliktigivoᴋ seniane omane, talertullo pingasutut seniane tâpsomane.

⁴⁹ Torᴋsukatâglo talertut 20tut takitigivoᴋ, talertullo 11tut siliktigivoᴋ; tungmeratigullo majorarvigivât: napajoᴋarporlo iglernaujane, atauseᴋ seniane tamattomane, atauserlo seniane tâpsomane.