Hesekiel 4 - Labrador Inuttitut Heritage Bible

¹ Igvillo, inûb erninga, igaliksamik maggarmik (aglagviksamik) tigusigit, ililugolo sângnut, tagvungalo iglugasaksoangoaliorit Jerusalemik:

² Ilumavlugolo sorᴋsuktoᴋatigêksoangoanut, talungoaliorillo avatâne, avaluᴋsoangoaliorillo avatâne; tangmarvingoaliorittauᴋ avatâne, ilijilutillo kautaksoangoanik avatâgut ilumavlugo.

³ Ilingnullo tigusigit kikiangmik sâpatâmik, makperlugolo ᴋarmangoangoᴋovlugo kikiangojoᴋ igvit iglugasaksoangoallo akorngane; kenaillo sâtiuk tâpkonunga, ilumajaungoarniarput tagva sorᴋsuktoᴋatigêksoarnut, avatâgut ilumajaungoarlutik. Tamanna nelunaikutaksauniarpoᴋ Israêlib ᴋitornganginut.

⁴ Inariartortukauvotillo saumingnut, Israêliblo ᴋitorngangita idluituliningit ililugit tâpsomunga; inangerpit tâpsomunga uvlungita unurningit maliklugit, nangmalârpotit idluininginik.

⁵ Uvanga tâpkoa idluituliningita jâringit adsiotitsomavakka uvlunut ilingnut, tagva uvlut 390; taimak akunertigijomik nangmartuksaulârpotit Israêlib ᴋitorngangita idluininginik.

⁶ Tamakkoalo nâmaksitijarêrungne, inartuksauvotit talerpingnut, nangmarlutillo Judab ᴋitorngangita idluininginik: uvlut 40, tagva uvloᴋ atauseᴋ jâremut atausermut, ilingatipakka ilingnut.

⁷ Kênaillo sâtilârᴋat Jerusalemut ilumajaujomut, tallit ussingatilugo; nelautaivigilugillo.

⁸ Ahâglo, ᴋelarutinik pititsivigivagit, nelianullônêt mumiᴋattarungnarᴋonaᴋ, ilumajaunivit uvlunginik nâmaksititsiᴋârtinak.

⁹ Tigusilerillo senaugaksanik perortuniglo nerrijausônik sunatuinarnik, tamaitalo pôlugit atautsemut, tagvangallo niaᴋôjaliorit; uvlut igluanut inangavikpit unurningit maliklugit, tagva uvlut 390 nâvlugit, nerrijuksaulârpotit tagvangat.

¹⁰ Nerrijat uvlorme atautseme sêkeletut 20tut oᴋumaitigijuksauvoᴋ: neliunermit neliunermut nerrijaksarivat.

¹¹ Imermiglo imertuksauvotit ôktût maliklugo, tagva kinib pingasûjortoanik; neliunermit neliunermut imertuksauvotit.

¹² Ama ᴋaᴋᴋôjârsôtilugit sâtut nerrijaksarivatit, igajaksarivatillo tâpkoa takoane inûb annanga ikomaksarilugo.

¹³ Nâlegarlo oᴋarpoᴋ: Taimak ivsornartitaujomik Israêlib ᴋitorngangita nerᴋiksatik nerrijaksarivait, inôᴋatigêksuit uvanga ajaktortauviotitama tâpkoninga akorngane.

¹⁴ Uvangale oᴋarpunga: Eᴋ, Nâlegaᴋ Nâlegaujotit, takolaurit, tarniga ivsornartitaulauᴋsimangilaᴋ: sorusionimnit mâna tikidlugo ᴋiᴋlovinermik kêsuktublônêt aliktortavininganik nerrilauᴋsimangilanga; nerᴋemiglônêt maᴋojungnartomik oᴋomisilauᴋsimangilanga.

¹⁵ Oᴋautivângale: Takuit, tuktuvait annanginik perᴋovagit inuit annangita tauᴋtiksanginik, tâpkonunga nerᴋiksat igalârᴋat.

¹⁶ Oᴋautivângale sulle: Inûb erninga, ahâk, ᴋaᴋᴋôjat pitsartunartut Jerusaleme asseroromavakka, ᴋaᴋᴋôjaᴋtolârpullo ôktût atorlugo pilloriksârlutiglo; imilarpullo imermik ôktût atorlugo issumajârlutiglo;

¹⁷ Amigaksilârmatta ᴋaᴋᴋôjaniglo imermiglo, issumajâᴋatigêgomârmatta, perleromârlutiglo idluitulinermingne.