Hesekiel 39 - Labrador Inuttitut Heritage Bible

¹ Igvillo, inûb erninga, Goge nelautaivigiuk, oᴋarlutillo: Imâk oᴋarpoᴋ Nâlegaᴋ Nâlegaujoᴋ: Ahâk, sâvigivagit, Mesekib Tubaliblo angajoᴋâᴋsoangak:

² Sangutitsomârpagillo, kajungersâromârlutillo, majorartitsomârpagillo avanedlerpânit, tikiutijomârlutillo Israêlib ᴋaᴋᴋanginut;

³ Pitiksîllo tigujomârpara aggangnit saumingnit, ᴋargjutillo kataktitsomârlugit aggangnit talerpingnit.

⁴ Oggojomârpotit Israêlib ᴋaᴋᴋangine, igvit, siaktitatillo, inugiartoᴋsuillo ilagijatit; tunijomârpagit tingmianut uningârtunut sunatuinarnut naternaublo nergjutinginut, nerrijauᴋovlutit.

⁵ Oggojomârpotit naternaub ᴋângane; uvanga taimak oᴋarpunga, oᴋarpoᴋ Nâlegaᴋ Nâlegaujoᴋ.

⁶ Ikomamiglo tilikleromârpunga Magogemut, tâpkonungalo terliktulik nunaᴋartunut ᴋikkertane, ᴋaujijuksauvullo uvangaugama Nâlegaᴋ.

⁷ Ateralo ivlernartoᴋ nelonairomârpara inuᴋotima Israêlekut akorngane; ateralo ivlernartoᴋ oᴋarnerlutigijautailititsomârpara kingorngane; inôᴋatigêksuillo ᴋaujujuksaulârput uvangaugama Nâlegaᴋ, Israêlib ivsornaitoᴋsôjunga.

⁸ Ahâk, neliutilerpoᴋ, nelautsijomârporlo, oᴋarpoᴋ Nâlegaᴋ Nâlegaujoᴋ; tamadja uvloᴋ oᴋautigijara.

⁹ Israêliblo iglugasaksoangine nunaᴋartut anijomârput sakkullo unatautit ikilugit nungulugillo, sapûlutat sagvingmiutallo, pitiksit ᴋargjullo, annautat ᴋalugiallo, jârit 7it nâvlugit ᴋejuksarilârpait.

¹⁰ Kejuktariaᴋarᴋonagit naternamit, nakatsigiaᴋarᴋonagillônêt napârtolingme; sakkut unatautit ᴋejuksarilârmagit; kongmarutjimariklutik kongmarutijimingnik, arᴋtailârput arᴋtaijimingnik, oᴋarpoᴋ Nâlegaᴋ Nâlegaujoᴋ.

¹¹ Pijokalârporlo uvlorme tâpsomane Goge tunitjivigijomârapko iluverviksamik Israêleme, tagva naᴋsarmik apᴋutausômik imarbiub kitânêtomik, tamattomale tamaunârtut noᴋᴋartilârpait; tagvanelo Gogelo inugiartoᴋsoangillo iluveromârpait, taijomârpâllo Hamon-gogib naᴋsanganik.

¹² Taᴋᴋillo 7it nâvlugit Israêlib ᴋitorngangit suliaᴋalârput iluversigiamik, nuna ivsornaititauᴋovlugo.

¹³ Nunablo inungit ilûnatik ilijijomârput tâpkoninga, nertornautigilârpâllo uvlorme ânanausijauvimne, oᴋarpoᴋ Nâlegaᴋ Nâlegaujoᴋ.

¹⁴ Ingmikôrtitsijomârpullo angutinik suliaᴋatsainartunik arvertatsainartunik nuname iluversilutik tamaunârtunik, nunab ᴋângane simnikunik, nuna ivsornaititauᴋovlugo: taᴋᴋit 7it nâkpatta ᴋeneriartoromârput.

¹⁵ Kenertullo nunakôromârput, inûblo sauninginik takojoᴋarpat nelunaikuseromârpât iluversijut iluversiᴋârtinagit tâpsominga Hamon-gogib naᴋsangane.

¹⁶ Iglugasaksoaᴋalârporlo Hâmônamik attelingmik. Taimaglo nuna ivsornaititaujomârpoᴋ.

¹⁷ Igvillo, inûb erninga, imâk oᴋarpoᴋ Nâlegaᴋ Nâlegaujoᴋ: Tingmiat adsigêngitut ilûnaita nergjutillo naternamêtut ilûnaita oᴋautikit: Katimaleritse maungarluselo, avatânit ilûnainit katersoritse tunergutimnut tunerguserijamnut ilipsingnut, tunergutiksoarmut Israêlib ᴋaᴋᴋangine, nerᴋetorᴋovluse auktorᴋovluselo.

¹⁸ Pitsartujut nerᴋingit nerrijomârpase, nunablo angajoᴋâᴋsoangita aungit imeromârpase, saukat angusalungita, saugâraillo, tuktungajullo, tuktuvaillo, ilunatik ᴋoinijut Basanemit pijut.

¹⁹ Tunnoᴋtoromârposelo aᴋᴋeartorᴋârtinase, auktolârluselo talaᴋârtinase, tunergutimnit tunergutigijamnit ilipsingnut.

²⁰ Nerrimârvimnelo aᴋᴋeartulârpose horsinik ᴋemuksertuniglo, pitsartudlartuniglo sakkolijartuniglo tamainik, oᴋarpoᴋ Nâlegaᴋ Nâlegaujoᴋ.

²¹ Ananauneralo nelonaijaromârpara inôᴋatigêksoarnut, inôkatigêksuillo ilûnatik takojomârput erᴋartuinimnik piniartamnik, aggamniglo issaktamnik tâpkonunga.

²² Taimaglo Israêlib ᴋitorngangit ᴋaujilârput uvanga Nâlegaᴋ Gudeogama tâpkonunga uvlormit taipsomangat kingorngagullo.

²³ Inôᴋatigêksuillo ᴋaujilârput Israêlib ᴋitorngangit aularutijaulaungmatta idluitulinitik pivlugit; idluitulivigilaungmanga, kênaralo ijerpara tâpkonangat; tamanna pivlugo tunilauᴋpakka ômigijingita agganginut, oggolauᴋpullo ilûnatik saviksoarmut.

²⁴ Ivsornarningit tapaningillo maliklugit piniarvigilauᴋpakka, ᴋênaralo ijerpara tâpkonangat.

²⁵ Tamanna pivlugo imâk oᴋarpoᴋ Nâlegaᴋ Nâlegaujoᴋ: Mâna Jâkob aularutijauninga utertitsomârpara, Israêliblo ᴋitorngangit ilûnaita nâpkigijomarpakka; ateralo ivsornaitoᴋ ilungertûtigijomârpara.

²⁶ Kangusungnermingniglo idluitulinermingniglo idluitulijutigijamingnik uvamnut nangmalârput, terliklutik nunaᴋalerpatta nunamingne kimullônêt kapiasuktitaugatik,

²⁷ Tikiutisimagupkit nunaᴋatigêksoarnit, katersorêrupkillo ômigijimik nunanganit, ivsornaititaugumalo tâpkonane inôᴋatigêksuit unuktut takoane.

²⁸ Kaujijuksaulârpullo uvanga Nâlegaᴋ Gudeogama tapkonunga, aularutijautilaurapkit inôᴋatigêksoarnut, katersormigapkillo nunanganut; tâpkonangallo atautsimiglônêt ᴋemaijomângilanga tagvane.

²⁹ Kênaralônêt ijeromângilara tâpkonangat kingorngane; anernera ilimagapko Israêlib kitornganginut, oᴋarpoᴋ Nâlegaᴋ Nâlegaujoᴋ.