Hesekiel 38 - Labrador Inuttitut Heritage Bible

¹ Nalekablo oᴋausingata tikipânga, oᴋarlune:

² Inûb erninga, kênait sâtiuk Gogemut, Magogib nunanganêtomut, Mesekib Tubaliblo angajoᴋâᴋsoangangnut, nelautaivigiuglo,

³ Oᴋarlutillo: Imâk oᴋarpoᴋ Nâlegaᴋ Nâlegaujoᴋ; Ahâk, sâdlaromârpagit, Goge, Mesekib Tubaliblo angajoᴋâᴋsoangak:

⁴ Sangutitsomârpagillo, ᴋargjusâniglo erᴋiaktitsijomârpunga aglerungnut, anititsomârpagillo sorᴋsuktuksarsoaᴋotitit ilûnaita, horsitillo, horsinullo ablângajoᴋotitit, ilûnatik annorâlijarlutik unatartut annorânginik, katimgajoᴋsuit sapûlutalijartut sagvingmiutalijartullo, saviksoarniglo tigumiartut:

⁵ Persiamiullo, Kussemiullo, Puttimiullo ilagilârivait; ilûnatik sapûlutalijarlutik niaᴋogêkutilijarlutiglo:

⁶ Gomerelo tâpsomalo siaktitangit tamaita, Togârmablo ᴋitorngangit avanepasiktomit, tâpsomalo siaktitangit: ilagijauvlutit ilâ inugiartoᴋsoarnut.

⁷ Opalungaisârit, ilâ opalungaijarit ilingnik, igvit katersortaᴋsoatillo ilûnaita ilingnut katersortut, igvillo aulatsijôlerit tâpkonunga.

⁸ Uvlut unuktut ᴋângerpatta nelipsartaulârpotit; jârine kingorliojune tikitsomârpotit nunamut saviksoarmit utertitaujomut, inôᴋatigêksoarnit unuktunit katersortaumajunut, Israêlib ᴋaᴋᴋanginut, akunêrtomik inuᴋalaungitunut: inôᴋatigêksoarnille anititauvut, ilûnatiglo terliklutik nunaᴋalerput.

⁹ Igvillo takpaungalârpotit, aᴋᴋunaᴋsoatut tikiaᴋilutit, nuvujatut ilingajomârpotit nuna mattujomavlugo, igvit siaktitatillo ilûnatik, inôᴋatigêksuillo unuktut ilagilutit.

¹⁰ Imâk oᴋarpoᴋ Nâlegaᴋ Nâlegaujoᴋ: Pijomârpoᴋ uvlorme tâpsomane, ômatingne issumaliornerit ᴋagveromârmatta, âᴋiksoilârpotillo issumâlungnik:

¹¹ Oᴋaromârpotillo: Takpaungaromavunga nunamut iglugasaktalingmut ᴋarmaᴋangitunut; aivigijomavakka uimajângitut, terliklutik nunaᴋartut, ᴋarmaᴋaratik seneroaᴋaratiglo upkoaᴋaratiglo inôjut:

¹² Aᴋsârnigomavlutit arᴋtaijomavlutillo; aggaktillo issagomavlugit inuêrutilauᴋtunut mânale inuᴋarmijunut, inungnullo katersortaujunut inôᴋatigêksoarnit, nergjuteᴋalertunut perᴋuteᴋalertunullo, nunab ᴋerᴋane nunaᴋartunut.

¹³ Sibab, Dedaniblo, Tarsisiblo niuverniartingita, loevearaillo tâpkonanêtut ilûnatik, oᴋautilârpâtit: Tamaungarᴋêt aᴋsârnigomavlutît? Katimgajoᴋsoatit katitivigît arᴋtaijomavlutît? Silbere goldelo aularutijomavlugit, nergjutillo perᴋutillo tigujomavlugit, unuktut aᴋsârnigarijomavlugît?

¹⁴ Tamanna pivlugo, inûb erninga, nelautailerit, Gogelo oᴋautilugo: Imâk oᴋarpoᴋ Nâlegaᴋ Nâlegaujoᴋ: Neliutome ipsomane inuᴋotikka Israêlikut terliklutik nunaᴋalerpatta, ᴋaujimaniangilatît tamattomingâ?

¹⁵ Kaijomârpotillo inigijarnit taggapasiktomit, igvit, inugiartoᴋsuillo ilagijatit, ilûnatik ikimavlutik horsinut, katimgajoᴋsuit, sorᴋsuktoᴋsuillo sôngojut;

¹⁶ Tikitsomârpotillo inuᴋotimnut Israêlikunut, nuvujatut nuna mattuvlugo; uvluksane kingorliojune tikiutijomârpagit nunamnut, inôᴋatigêksuit ᴋaujimaᴋovlugit ivsornaititaugama ilingne, Goge, tâpkoa ijingita sângine.

¹⁷ Imâk oᴋarpoᴋ Nâlegaᴋ Nâlegaujoᴋ: Tâmnauvêt oᴋautigilauᴋtara itsarsoarme kivgapkut Israêlib nelautaijungitigut, nelautailauᴋtut uvlune tâpkonane jârit unuktut nâvlugit, tikiutijomârapkit tâpkonungâ?

¹⁸ Pijoᴋalârporlo uvlorme tâpsomane Goge tikigomârpat Israêlib nunanganut, oᴋarpoᴋ Nâlegaᴋ Nâlegaujoᴋ, ᴋaningaumajârnera ᴋagveromârmat ᴋingamnut.

¹⁹ Ilungertornimne ningaumajârnimalo neliuningane oᴋarsimagama, ahamarik, uvlorme tâpsomane sajukpiludlartoᴋaromârmat Israêlib nunangane;

²⁰ Mingeriat imânêtut, tingmiat ᴋilaub ikianganêtut, nergjutillo naternamêtut, pâmgortullo ilûnatik pâmgorpaktut nunab ᴋângane, inuillo ilûnatik nunab ᴋânganêtut, sajugomârmatta kênama sângane, ᴋaᴋᴋallo oggotitaujomârput, imnallo katararomârput, ᴋarmallo ilûnatik nunamut oggojomârput.

²¹ Saviksoarlo tikiᴋojomârpara tâpsomunga ᴋaᴋᴋamne tamaine, oᴋarpoᴋ Nâlegaᴋ Nâlegaujoᴋ: ilûnatik atunit saviksoatik sâtitsomârpait inôᴋatiminut.

²² Erᴋartoromârparalo nûsilingnartomullo aungmullo: tâpsomungalo siaktitanginullo inugiartoᴋsoanullo ilagijanginut silaluᴋojijomârpunga silaluksoarmik supojijomik, nattarᴋonâniglo angijunik, ikomamiglo orᴋsorutemiglo.

²³ Angijôtidlaromârpungalo ivsornaitilungalo, uvamniglo ᴋaujijautitsomârpunga inôᴋatigêksuit unuktut ijingita sângine; ᴋaujijuksaulârpullo uvangaugama Nâlegaᴋ.