Hesekiel 37 - Labrador Inuttitut Heritage Bible

¹ Nalekab aggangit uvamnêput, âpângalo Nâlekab Anerningagut ilivlungalo naᴋsamut sauneliksoarmut;

² Kolâtigôrtipângalo avamut, ahâglo, unuktoᴋsôvut naᴋsarme nunab ᴋângane; ahâglo, panertuinaudlarput.

³ Oᴋautivângalo: Inûb erninga, saunit tamakkoa ômarungnarivât? Kiovaralo: Nâlegaᴋ Nâlegaujotit igvit ᴋaujimavotit.

⁴ Oᴋautilerivângalo: Saunit tâpkoa nelautaivigikit, oᴋautikillo: Ilipse sauniojose panertut, Nâlekab oᴋausinga tusarsiuk.

⁵ Imâk Nâlekab Nâlegaujub saunit makkoa oᴋautivait: Anerneᴋ ilipsingnut pulatitsomârpara ômartiluselo.

⁶ Mamertitsomârpapselo, uvineᴋartiluselo, amertârtiluselo, anernermiglo ilumeromârpapse, ômatil selo; ᴋaujijuksaulârposelo uvangaugama Nâlegaᴋ.

⁷ Nelautaivunga tagva sorlo perᴋojaugama, nelautailertilungalo pervaludlartoᴋarpoᴋ, nunalo sajukpilukpoᴋ, saunillo katilerput, inimingnut aivlutik.

⁸ Takosarpungalo, ahâglo, mamivalialerput, uviniktâlerlutiglo, amiublo ulikpait ᴋângitigut; kissianele anerneᴋalungilat sulle.

⁹ Oᴋautivângalo: Anerneᴋ nelautaivigiuk, nelautailerit, inûb erninga, anernerlo oᴋautiuk: Imâk oᴋarpoᴋ Nâlegaᴋ Nâlegaujoᴋ: Anordlervingnit sittamanit ᴋaigit, anerneᴋ, ukkoalo toᴋungajut suporkit ômarᴋovlugit.

¹⁰ Nelautaivunga tagva sorlo perᴋongmanga, anernerublo pulavait ômarpullo nikovilutiglo itikamingnut, katimgajoᴋsôvlutik unuktoᴋsuit.

¹¹ Oᴋautivânga tagva: Inûb erninga, saunit ukkua, tagva Israêlib ᴋitorngangit ilûnaita: ahâk, oᴋarput, saunivut panerput, neriungnivullo assiomavoᴋ; kipijaumarikpogut.

¹² Tamanna pivlugo nelautailerit, oᴋautilugillo: Imâk oᴋarpoᴋ Nâlegaᴋ Nâlegaujoᴋ: Ahâk, iluvise angmaromârpakka, anititsomârpapselo iluvipsingnit, inuᴋotikka; tikiutijomârpapselo Israêlib nunanganut.

¹³ Kaujijuksaulârposelo uvangaugama Nâlegaᴋ, iluvise angmarupkit, anitikupselo iluvipsingnit, ilipse inuᴋotikka.

¹⁴ Anerneralo pititsomârpara ilipsingnut, ômaromârposelo, pititsomârpapselo nunaᴋotipsingnut: ᴋaujijomârposelo uvanga Nâlegaᴋ tamanna oᴋautigigapko piniarapkolo, oᴋarpoᴋ Nâlegaᴋ.

¹⁵ Nâlekab oᴋausingata tikipânga ama, oᴋarlune:

¹⁶ Igvillo, inûb erninga, ajaupiamik atautsimik tigusilerit, aglagvigilugolo: Judab pinga, Israêliblo ᴋitorngangita tâpsoma ilagijangita pingat, ajaupiamiglo tâpsoma assianik tigusigit aglagvigilugolo: Josefib pinga, Efraimib ajaupianga, Israêliblo ᴋitorngangita ilûnatik tapsoma ilagijangita pingat:

¹⁷ Pivlutillo katitikik aipâ aipanganut atausioᴋovlugik, aggangne atausingorᴋovlugik.

¹⁸ Inôᴋativillo ᴋitorngangita aperikpatit, oᴋarlutik: Nelonailivigijomangilaptigût ᴋanoᴋ ukkua tukkeᴋarmangângnîk?

¹⁹ Oᴋautikit: Imâk oᴋarpoᴋ Nâlegaᴋ Nâlegaujoᴋ: Ahâk, Josefib ajaupianga, Efraimib agganginêtoᴋ, Israêliblo kinguvârêngita tâpsoma ilagijangita pingat, tigujomavara, katititsomârparalo tâpsomunga, Judab ajaupianganut, atausingortilugiglo, atausiojomârpuglo aggamne.

²⁰ Ajaupiâglo aglagvigijâkik aggangnêtsomârpuk tâpkoa ijingita sângine.

²¹ Oᴋautikillo: Imâk oᴋarpoᴋ Nâlegaᴋ Nâlegajuoᴋ: Ahâk, Israêlib ᴋitorngangit tigujomârpakka inôᴋatigêksuit aivigijangita akornganit, avamillo katersoromarpakka, tikiutilugillo nunamingnut;

²² Inôᴋatigêksoangortitsomârpakkalo atausiojut nuname, Israêlib ᴋaᴋᴋangine; atanerlo atauseᴋ ataniojomârpoᴋ tâpkonunga tamainut; kingornganelo inôᴋatigêksoangojungnairomârput magguinik, avitauniatsangilallo ataniovingnut maggungnut:

²³ Ivsornartitsomângilallo nangminermingnik kingorngane gudingoaᴋotimingnut, piniarnernullônêt maᴋojungnartunut, tapanerijamiglônêt nelianut; piulijomârpakkale inigijanginit tamainit idluitulivigilauᴋtanginit, ivsornaititsomârpakkalo: taimaglo inuᴋutaujomârput uvamnut, Gudeojomârpungalo tâpkonunga.

²⁴ Kivgaralo Davide ataniojomârpoᴋ tâpkonunga, tâpkoalo ilûnatik mianerijetuaᴋaromârput; arvertaromârpullo idluarijamne, perᴋojakkalo kamagilugit piniarlugillo.

²⁵ Nunaᴋaromârpullo nuname tunilauᴋtamne kivgamnut Jâkomut, atâtapse nunagilauᴋtangane; nunagilârpâllo tâpkoa, ᴋitorngangitalo, erngutangitalo, issoᴋangitomut; kivgaralo Davide angajoᴋârilârpât issoᴋangitomut.

²⁶ Uvangalo angeᴋatigijomârpakka ulapirᴋsauteᴋaᴋatigêngnermik: angeᴋatigêngneolârpoᴋ soraijuitoᴋ: ineᴋartitsomârpakkalo unuksitilugillo, ivsornaitoviᴋotigalo tâpkonanêtsainartitsomârpara soraijuitomik.

²⁷ Ineᴋarvigalo tâpkonanêtsomârivoᴋ; Gudigijomârpângalo, tâpkoalo inuᴋotigijomârpakka.

²⁸ Inôᴋatigêksuillo ᴋaujijomârput uvanga Nâlegaujunga ivsornaititsigama Israêlemik, ivsornaitoviᴋotiga sorairane tâpkonanêkpat.