Hesekiel 36 - Labrador Inuttitut Heritage Bible

¹ Igvillo, inûb erninga, Israêlib ᴋaᴋᴋangit nelautaivigikit, oᴋarlutillo: Ilipse, Israêlib ᴋaᴋᴋangit, Nâlekab oᴋausinga tusarsiuk.

² Imâk oᴋarpoᴋ Nâlegaᴋ Nâlegaujoᴋ: Omisukte pivluse oᴋarmat: Anerpanarmêk! ᴋaᴋᴋaᴋsuit issoᴋangitomit itut uvagut piksarilerpavut:

³ Tamanna pivlugo nelautailerit, oᴋarlutillo: Imâk oᴋarpoᴋ Nâlegaᴋ Nâlegaujoᴋ: Sunairutilaungmasse, ilâ, sunairutilaungmase keta, êngmaselo avatipsingne tamaine, perᴋutauᴋovluse inôᴋatigêksuit amiakunginut, ᴋaneᴋadlartullo ᴋangasinângmiutaringmase, oᴋarnerlutigijaugapselo inôᴋatigêksoarnut;

⁴ Tamanna pivlugo, ilipse, Israêlib ᴋaᴋᴋangit, Nâlekab Nâlegaujub oᴋausinga tusarsiuk: Imâk Nâlegaᴋ Nâlegaujoᴋ oᴋarpoᴋ ᴋaᴋᴋaᴋsoarnut ᴋaᴋᴋanullo, kôngnut naᴋsarnullo, sunairutijauviojunut iglugasaksoarnullo ᴋemaktaujunut, pinasuaraksangortisimajut mitautiksangortisimajullo inôᴋatigêksuit amiakunginut avatipsingnêtunut:

⁵ Tamanna pivlugo imâk oᴋarpoᴋ Nâlegaᴋ Nâlegaujoᴋ: Ilungertudlarnimne ningaumajârlunga oᴋalauᴋpunga inôᴋatigêksuit amiakungit Edomelo ilûnât pivlugit, ômatingita ilûnatik ᴋuviasungninganut tarnemiglo kassêninganut nunamnik kingormgutijaksautitsilauᴋtut nangminermingnut piksauᴋovlugo;

⁶ Tamanna pivlugo nelautailerit Israêlib nunanga pivlugo, ᴋaᴋᴋaᴋsuillo ᴋaᴋᴋallo, kôllo naᴋsallo oᴋautikit, Imâk oᴋarpoᴋ Nâlegaᴋ Nâlegaujoᴋ: Ahâk, ilungertornimne ningaumajârnimnelo oᴋarpunga, nangmalaurapse kangusuktitaunermik inôᴋatigêksoarnut;

⁷ Tamanna pivlugo imâk oᴋarpoᴋ Nâlegaᴋ Nâlegaujoᴋ: Aggakka ᴋongmuartipakka, oᴋarlunga: nelojut avatipsingnêtut nangmartuksaulârput kangusuktitaunermingnik.

⁸ Ilipsele, Israêlib ᴋaᴋᴋangit, nuititsijuksauvose akkerᴋupsingnik, tunitjijuksauvoselo paungapsingnik inuᴋotimnut Israêlikunut, neliutijaraklilermatta.

⁹ Ahâk, ilipsingnêpunga, sâvigijomavapselo, poagijartaujomârapse karngaviolârluselo:

¹⁰ Inuillo unuksititsomârpakka ilipsingne, Israêlib ᴋitorngangit ilûnaita, ila, ilûnaita: iglugasaksuillo inuktaᴋaromârput, sunataᴋarungnaitullo igloliorviolârput;

¹¹ Inuillo nergjutillo unuksititsomârpakka ilipsingne, unuksijomârput kinguvâksatârlutiglo; inigijaujomârposelo sorlo sivornganetut, ajungituliviginersarijomârpapse sivornganenit; ᴋaujijuksaulârposelo uvangaugama Nâlegaᴋ.

¹² Ilâ, inuit arvertartitsomârpakka ilipsingne, tagva inuᴋotikka Israêlikut; pigijomârpâtillo, perᴋutaujomârpotillo tâpkonunga, kingornganelo ᴋitorngairutijungnailârpotit.

¹³ Imâk oᴋarpoᴋ Nâlegaᴋ Nâlegaujoᴋ: Oᴋautingmatit: Igvit nuna nerrivotit inungnik, ilangaivotit inôᴋatigêksoarnik;

¹⁴ Tamanna pivlugo inungnik nerrijuksaungilatit kingorngane, inôᴋatigêksoarnik ilangaijuksaungilatit kingorngane, oᴋarpoᴋ Nâlegaᴋ Nâlegaujoᴋ.

¹⁵ Kingornganelo tusartitsomângilagit nelojut kangusuktitsininginik, nangmariaᴋaromângilatillo inôᴋatigêksuit mitauteᴋarninginik kingorngane, inôᴋatigêksoaᴋotitillo kingormgujijoêrutijaksarilungilatit kingorngane, oᴋarpoᴋ Nâlegaᴋ Nâlegaujoᴋ.

¹⁶ Sullelo Nâlekab oᴋausingata tikipânga, oᴋarlune:

¹⁷ Inûb erninga, Israêlib ᴋitorngangit nunamingne nunaᴋalaungmatta, nuna ivsornartipât iluserijamingnut piniarnerijamingnullo; iluserijangit sâmne ilingalauᴋput arnab ivsornarningatut neliuneᴋarnermine.

¹⁸ Taimaimat ᴋaningaumajârnera kovilauᴋpara tâpkonunga, auk pivlugo tâpkoa kovijangat nunamut, nunalo ivsornartilaungmatsuk gudingoamingnut:

¹⁹ Siamartilauᴋpakkalo inôᴋatigêksuit akornganut, siamartilauᴋpullo nunanut: apᴋutingit piniarningillo maliklugit erᴋartulauᴋpakka.

²⁰ Tikiutingmatta inôᴋatigêksoarnut aivigijamingnut, atera ivsornaitoᴋ ivsornartipât, pivlugit oᴋartoᴋalermat: Ukkua inuᴋotauvut Nâlekamut, ᴋenugijauvut tâpsoma nunanganit.

²¹ Uvangale atera ivsornaitoᴋ Israêlib ᴋitorngangita ivsornartitangat inôᴋatigêksuit aivigijangita akorngane annajagivara.

²² Tamanna pivlugo Israêlib ᴋitorngangit oᴋautikit: Imâk oᴋarpoᴋ Nâlegaᴋ Nâlegaujoᴋ: Ilipse pivluse, Israêlib ᴋitorngangit, tamanna pinialungilara, aterale ivsornaitoᴋ pivlugo, ivsornartitase inôᴋatigêksuit aivigijapse akorngane.

²³ Ivsornaititsomârparalo atera angijoᴋ, inôᴋatigêksoarne ivsornartitaulauᴋtoᴋ, ilipse ivsornartilauᴋtase tâpkoa akorngane; inôᴋatigêksuillo ᴋaujijuksaulârput uvangaugama Nâlegaᴋ, oᴋarpoᴋ Nâlegaᴋ Nâlegaujoᴋ, ivsornaititauguma ilipsingne tâpkoa ijingita sângine.

²⁴ Tigujomârapse inôᴋatigêksuit akornganit, katersoromârluselo nunanit ilûnainit, tikiutiluselo nunaᴋotipsingnut.

²⁵ Serparsarvigijomârpapselo imermik ivsornaitomik ivsornailârpose tagva; salumainipsingnit tamainit, gudingoapsingnillo tamainit epᴋêjaromârpapse.

²⁶ Tunitjivigijomârpapselo ômamik nutâmik, anernermiglo nutâmik pititsijomârpunga ilipsingnut: ômatelo ujaraujârtoᴋ pêjaromârpara uvinipsingnit, ômamiglo uviniojomik tunitjivigijomârpapse.

²⁷ Anerneralo pititsomârpara ilupsingnut, arvertartiluselo ilusioᴋojamne, idluarijakkalo malilârpase piniarlugillo.

²⁸ Nunaᴋalârposelo nuname tunilauᴋtamne atâtapsingnut; inuᴋutaujomârposelo uvamnut, Gudeojomavungalo ilipsingnut.

²⁹ Piulijomârpapselo salumainerijapsingnit tamainit, ᴋaᴋᴋôjaksallo perorᴋojomârpakka unuksitilugillo, tikitauᴋojomângilapselo kângnartomut.

³⁰ Napârtublo paungangit unuksititsomârpakka, perorsêviublo perortungit, kingorngane mitautaujungnaiᴋovluse kângneᴋ pivlugo inôᴋatigêksoarnut.

³¹ Tagva erᴋaumalârpose apᴋotipsingnik idluitunik, piniarnipsingniglo idluangitunik; maᴋojugilârposelo ilipsingnik takojapsingne idluitulinerilauᴋtase maᴋojungnartulinerilauᴋtaselo pivlugit.

³² Ilipse pivluse taimailiolungilanga, oᴋarpoᴋ Nâlegaᴋ Nâlegaujoᴋ, tamanna ᴋaujijaksarivase; iktôdlaritse kangusukluselo iluserijase pivlugit, ilipse Israêlib ᴋitorngangit.

³³ Imâk oᴋarpoᴋ Nâlegaᴋ Nâlegaujoᴋ: uvlorme tâpsomane epᴋêjarupse idluinipsingnit, iglugasaksuit inuktaᴋartitsomârpakka, sunaᴋarungnaitullo igloliorviolârput.

³⁴ Nunalo ᴋemaktaujoᴋ poagijartaujomârpoᴋ, ᴋemaktaumajôgaloartilugo ᴋângertut takoane.

³⁵ Oᴋaromârpullo: Nuna tâmna ᴋemaktaumajovineᴋ perorsêviktut Edenetut ipoᴋ; iglugasaksuillo inuᴋarungnaitovinit ᴋemaktavinillo serᴋomitavinillo avalutârput inuktaᴋarlutiglo.

³⁶ Inôᴋatigêksuillo amiakôjut avatipsingnêtut ᴋaujijuksaulârput uvanga Nâlegaujunga serᴋimisimajut âᴋiksorapkit, perortoᴋartingmilugillo ᴋemaktaumalauᴋtut; uvanga Nâlegaujunga taimak oᴋarpunga, taimailioromârpungalo.

³⁷ Imâk oᴋarpoᴋ Nâlegaᴋ Nâlegaujoᴋ: Mattominga sulle ᴋenuviojomârpunga Israêlib ᴋitornganginut, taimailiorvigivlugit piᴋovlunga; inungit unuksititsomârpakka sorlo saukat.

³⁸ Sorlo saukat tunergutiksat, sorlo saukat Jerusaleme uvloᴋsiorveᴋarningane; taimak iglugasaksuit ᴋemaktaujut tatalârput inungnik katimgajunik; ᴋaujijuksaulârpullo uvangaugama Nâlegaᴋ.