Hesekiel 35 - Labrador Inuttitut Heritage Bible

¹ Nalekablo oᴋausingata tikipânga sulle, oᴋarlune:

² Inûb erninga, kênait sâtiuk ᴋaᴋᴋamut Sîaremut, nelautaivigiuglo,

³ Oᴋautiuglo: Imâk oᴋarpoᴋ Nâlegaᴋ Nâlegaujoᴋ: Ahâk, sâvigivagit, ᴋaᴋᴋaᴋ Sîare, aggakkalo issagomârpakka ilingnut, sunaᴋarungnaititsomavagit tataminiarutiksangortilutillo.

⁴ Iglugasaksoaᴋotitit asseroromavakka, sunaᴋarungnairomârpotillo; ᴋaujijuksauvotillo uvangaugama Nâlegaᴋ.

⁵ Soraijuitomik ômisungneᴋatsainaravit, Israêliblo ᴋitorngangit tunilaurangne saviksûb pitsartuninganut kapiasungningita neliuningane, idluinerub naggatiksangata neliuningane.

⁶ Tamanna pivlugo, sorlo mikseᴋârtomik inôgama, oᴋarpoᴋ Nâlegaᴋ Nâlegaujoᴋ, aungînangortitsomavagit, aublo udlalârpâtit: auk maᴋojugilaunginangne, aub udlalârpâtit.

⁷ Taimak ᴋaᴋᴋaᴋ Sîare, tataminiarutiksangortitsomârpara sunaᴋarungnairtungordlugolo, maunârtullo utertullo kipiniaromârpakka.

⁸ Kaᴋᴋangillo tatatsomârpakka toᴋungajunik: ᴋaᴋᴋangne naᴋsarnelo kôngnelo tamaine saviksoarmut toᴋotaumajut oggojomârput.

⁹ Sunaᴋarungnairtitsomavagit soraijuitomik, iglugasaksoaᴋotitillo inuktaᴋarungnairomârput: ᴋaujijuksaulârposelo uvangaugama Nâlegaᴋ.

¹⁰ Oᴋalauravit: Inôᴋatigêksuit ukkua magguit nunâksoaglo ukkua maggûk perᴋutigijomavakka, inigijomavavullo: Nâlegaᴋ tagvanêgaloartilugo:

¹¹ Tamanna pivlugo, sorlo mikseᴋârtomik inôgama, oᴋarpoᴋ Nâlegaᴋ Nâlegaujoᴋ, ningârnît maliklugo, anerudjinîllo ômisungnivit tâpkoninga saᴋᴋertanga maliklugo, piniaromârpunga; uvamniglo ᴋaujijautitsomârpunga tâpkonunga, igvit erᴋartorupkit.

¹² Missigijuksaulârpotillo uvangaujunga Nâlegaᴋ tusalaurama oᴋarnerlutigilauᴋtarnik tamainik oᴋautigijarnik Israêlib ᴋaᴋᴋangit pivlugit, oᴋarlutit: sunaᴋarungnaiput, tunijauvut uvaptingnut aᴋsârnigauᴋovlugit.

¹³ Uvamnullo angijorortipose ilipsingnik ᴋanipsingnut, uvamnullo oᴋausise unuksitipase: uvanga tamanna tusarpara.

¹⁴ Imâk oᴋarpoᴋ Nâlegaᴋ Nâlegaujoᴋ: nunaᴋsoaᴋ tamât ᴋuviasukpat, sunairutijomârpagit.

¹⁵ Sorlo igvit ᴋuviasulauravit Israêlib ᴋitorngangita kingormgutijanga pivlugo, sunataᴋarungnairmat, taimak piniarvigijomârpagit; igvit, ᴋaᴋᴋaᴋ Sîare, Edomelo tamât, ila, ilûnarsoanga, sunaᴋarungnairomârpoᴋ: ᴋaujijuksaulârpullo uvangaugama Nâlegaᴋ.