Hesekiel 34 - Labrador Inuttitut Heritage Bible

¹ Nalekablo oᴋausingata tikipânga, oᴋarlune:

² Inûb erninga, mianersijut Israêleme nelautaivigikit, nelautailerit, mianersijullo oᴋautikit: Imâk oᴋarpoᴋ Nâlegaᴋ Nâlegaujoᴋ: Kapianarmêk mianersijut Israêleme nangminermingnik nerrititsijut! Mianersijut nerripkaijuksaungilât saukanîk?

³ Tunnoᴋ nerrivase, merᴋunginiglo annorâᴋarpose, ᴋionijut toᴋopase; saukalle nerripkalungilase.

⁴ Sangêtut nakoᴋsitingilase, ᴋanimajullo inûlilungilase, aᴋᴋunaᴋsimajullo mangipsertulungilase, ᴋêmâtisimajullo utertilungilase, tamartullo ᴋenilungilase, aksorornermullo takopsoajuinermullo aulapase.

⁵ Siamarsimavullo mianerijeᴋangimatta: nerᴋiksaulerpullo nergjutinut tamainut naternamêtunut, siamangavlutiglo.

⁶ Saugakka arvertartuinarput ᴋaᴋᴋaᴋsuit akorngane, ᴋaᴋᴋanelo poᴋtojune tamaine: ilâ, saugakka siamangalauᴋput nunaᴋsoarme ilûnâne, apertsortoᴋangilarlo ᴋenertoᴋangilarlo tâpkoninga.

⁷ Tamanna pivlugo Nâlekab oᴋausinga tusarsiuk, ilipse mianersijôjose.

⁸ Sorlo mikseᴋârtomik inôgama, oᴋarpoᴋ Nâlegaᴋ Nâlegaujoᴋ, saugakka pinasuartaungmatta nerᴋiksauᴋovlugit nergjutinut naternamêtunut tamainut mianersijoᴋangimat, mianersijullo saugakka ᴋeningimagit, mianersijullo nangminermingnik nerrititsingmatta saugakkalo nerritinagit;

⁹ Tamanna pivlugo Nâlekab oᴋausinga tusarsiuk, ilipse mianersijôjose;

¹⁰ Imâk oᴋarpoᴋ Nâlegaᴋ Nâlegaujoᴋ: Ahâk, mianersijut sâdlaromârpakka; saugakkalo tâpkoa agganginit tigujomârpakka, nerripkaijungnaititsomârpakkalo saukamnik: mianersijullo nerrititsijungnailârput nangminermingnik; saugakkalo piulijomârpakka tâpkoa ᴋaninginit, nerᴋiᴋsaujungnaiᴋovlugit tâpkonunga.

¹¹ Imâk oᴋarmat Nâlegaᴋ Nâlegaujoᴋ: Ahâk, uvanga nangmineᴋ, ilâ uvanga, saugakka ᴋeneromârpakka mianerijomârlugillo.

¹² Sorlo mianersijub saukane akornganêtub saukane ᴋenermagit uvlorme siamangavigijangine, taimak saugakka ᴋeneromârivakka, piulijomârpakkalo nunanit tamainit siamangavigilauᴋtanginit uvlorme nuvujalingme tâᴋtolingmelo.

¹³ Tikiutijomârpakkalo inôᴋatigêksoarnit, katersoromârlugillo nunanit, tikiutijomârlugillo nunamingnut; nerripkaromârpakkalo Israêlib ᴋaᴋᴋaᴋsoangine, kôngnelo, nunanelo tamaine nunaᴋarviojune.

¹⁴ Nerripkaromârpakka nerrinasugvingne piojune, Israêliblo ᴋaᴋᴋangine poᴋtojune mianerijaujomârput; tagvane aᴋopijomârput mianerijauvingme piodlartome, nerrinasugvingnelo ᴋoiglaunartune nerrijomârput Israêlib ᴋaᴋᴋangine.

¹⁵ Uvanga nangmineᴋ saugakka nerripkaromârpakka, aᴋopititsomârpakkalo, oᴋarpoᴋ Nâlegaᴋ Nalegaujoᴋ.

¹⁶ Assiomalauᴋtoᴋ ᴋeneromârpara, ᴋemâtitaujoᴋ tikiutijomârpara, aᴋᴋunaᴋsimajorlo mangipseromârpara, ᴋanimajorlo nakoᴋsititsomârpara: ᴋoinijullo sôngojullo nungutsomârpakka; nerripkaromârpakka idluartomik.

¹⁷ Ilipselo saugakka, imâk oᴋarpoᴋ Nâlegaᴋ Nâlegaujoᴋ: Ahâk, erᴋartuijomârpunga saugarmut saugauᴋatinullo, sauᴋanut angusalungnut tuktungajunullo angusalungnut.

¹⁸ Suglugivisiûk nerrinasugvik piojok nerrivigivlugo, nerrinasugviub amiakoa tullerarapsiûk? imerluselo imermik issungitomik amiakoa sujugapsiuk itikapsingnût?

¹⁹ Saugakkale nerrivut itikapse tullerartanganit, imerpullo itikapse sujuktanginit.

²⁰ Tamanna pivlugo imâk Nâlekab Nâlegaujub oᴋautivait: Uvanga, ilâ uvanga, erᴋartuijomârpunga nergjutinik ᴋoinijunik nergjutiniglo sallôjunik.

²¹ Senerarmikapse tuingmiluselo, sangêtullo nakjungmigarlugit siamartigapsigik;

²² Tamanna pivlugo saugakka piulijomârpakka, pinasuartaujungnaiᴋovlugit; erᴋartuijomârpungalo saugarmut saugauᴋatinullo.

²³ Mianersijuksarlo atausiojoᴋ tâpkonunga makititsomârpara, tâpsomalo nerripkalârpait, tagva kivgara Davide; tâpsoma nerripkalârpait, mianersijuksauvorlo tâpkoninga.

²⁴ Uvangalo Nâlegaujunga Gudeojomavunga tâpkonunga, kivgaralo Davide angajoᴋaulârpoᴋ tâpkonunga, uvanga Nâlegaujunga taimak oᴋarpunga.

²⁵ Angeᴋatigêngnermiglo ulapirᴋsautelingmik angeᴋatigijomavakka, ômajullo erᴋsinartut nunamit pêjaromavakka; terliklutiglo nunaᴋaromârput sunaᴋajuitome, siniktarlutiglo napârtolingme.

²⁶ Saimauseromârpakkalo tâpkoalo ᴋaᴋᴋamalo avatânêtut; silaluᴋojijomârpungalo neliuningine; suarutseraromârpok saimanartolingnik.

²⁷ Napârtorlo naternamêtoᴋ paungatâlârpoᴋ, nunalo saᴋᴋêlârpoᴋ perortuminik, inuillo nunatik nunagilârpait terliklutik; ᴋaujijuksaulârpullo uvangaugama Nâlegaᴋ, nangmautât navgorêrupko, piulilugillo kipalotitingita agganginit.

²⁸ Pinasuaraksaujungnairomârpullo kingorngane nelojunut, nunablo nergjungita nerrijaksaringilait; terliklutigle nunaᴋaromârput, kinamullônêllo erᴋsititaujomângilat.

²⁹ Nuilertitsijomârpungalo tâpkonunga perortomik nertortaujutiksamik, kângnartoᴋsoarmullo nuname nungutaujungnairomârput, nangmariaᴋarungnairomârpullo nelojut mitauteᴋarninginik kingorngane.

³⁰ Kaujijuksaulârpullo uvanga Nâlegaujunga Gudigijangat tâpkonanêgama, tâpkoalo, Israêlib ᴋitorngangit, inuᴋotigigapkit, oᴋarpoᴋ Nâlegaᴋ Nâlegaujoᴋ.

³¹ Ilipselo saugakka, nerrinasugvima saugangit, inôvose, uvangalo Gudigivapsinga, oᴋarpoᴋ Nâlegaᴋ Nâlegaujoᴋ.