Hesekiel 33 - Labrador Inuttitut Heritage Bible

¹ Nalekablo oᴋausingata tikipânga, oᴋarlune:

² Inûb erninga, inôᴋativit ᴋitorngangit oᴋarvigikit, oᴋautikillo: Saviksoaᴋ tikiutikupko nunat ilanganut, nunablo inungita angutit ilangat tigupatsuk udjertortingortilugolo:

³ Tâpsomalo saviksoaᴋ tikilertoᴋ nunamut takoguniuk tiptulausijarune, inuit kamasârlugit;

⁴ Tagva neliat tusarune tiptulautib nipinganik, kamananelo, saviksoarlo tikipat pêjarlugolo, tagva tâpsoma aunga niaᴋominêtsomârpoᴋ.

⁵ Tiptulautib nipinga tusaraloarpâ kamatsangilarle, tâpsoma aunga tâpsomanêlârpoᴋ tagva; kamalaurunele tarnine piulinajarpâ.

⁶ Udjertortible saviksoaᴋ tikilertoᴋ takopago, tiptulausijaranelo, inuillo kamasârtaungikunik, saviksoarlo tikilerpat innuillo ilangat pêjarlugo; tâmna pêjartauvoᴋ idluitulinermine, aungale akkilertauᴋojomârpara udjertortib agganginut.

⁷ Mânale, inûb erninga, udjertortingortipagit Israêlib ᴋitornganginut; taimaimat oᴋauseᴋ ᴋanimnit pijoᴋ tusaruk, kamasârkillo uvamnit.

⁸ Idluitomut oᴋaruma: Idluitotit toᴋojuksauvotit, igvillo oᴋangikuvit idluitulijoᴋ alingisâromavlugo apᴋotiminit; idluitoᴋ tâmna toᴋolârpoᴋ idluinermine, aungale akkilertauᴋojomârpara aggangnut.

⁹ Idluitorle alingisârungne sanguᴋovlugo apᴋotiminit, sangungipallo; tâmna toᴋolârpoᴋ idluinermine, igville tarnît piulivat.

¹⁰ Igvillo, inûb erninga, Israêlib ᴋitorngangit oᴋautikit: Oᴋarpakpose imâk: Tappanivut idluinivullo uvaptingnêput, iluludlarpogut tâpkonane; ᴋanoelingaluta inôjuksauvitâ?

¹¹ Oᴋautikit: Sorlo mikseᴋârtomik inôgama, oᴋarpoᴋ Nâlegaᴋ Nâlegaujoᴋ, idluitulijub toᴋunga ᴋuviagingilara; idluitulijorle sâgiangârune apᴋotigijaminit inôvlunelo: sâgiaritse, sâgiaritse apᴋotigijapsingnit idluitunit: sôᴋ toᴋojomavisê, ilipse Israelib ᴋitorngangît?

¹² Igvillo, inûb erninga, inôᴋativit ᴋitorngangit oᴋautikit: Idluartûb idluarningata piulinialungilâ uvlorme idluitulivigijangane, idluitûblo idluinine katagutiginialungilâ uvlorme sâgiarvigijangane idluitulinerminit: idluartûblônêt inôjutiginialungilâ uvlorme idluitulivigijangane.

¹³ Idluartoᴋ oᴋautigupko inôjuksaugame: idluarnine sungertutigiguniuk idluitulilunelo, idluartulinerijangita neliallônêt erᴋaumajaunialungilaᴋ, idluitulinerijanganele piniarnerijangane toᴋojuksauvoᴋ.

¹⁴ Amalo, idluitoᴋ oᴋautigupko: Toᴋojuksauvotit taima; sâgiarune idluinerminit, piniarlunelo perᴋojaujomik idluartomiglo;

¹⁵ Idluitûb akkêngaivigijime ᴋailauᴋtanga utertikuniuk, aᴋsârnigarijane tunilermiguniuk, arvertarune inôgutaujut maligaksauᴋojangine, idluitulitailivlune; inôjuksauvoᴋ toᴋojuksaunanelo.

¹⁶ Idluituliningita piniarnerijangita neliallônêt erᴋaumajauniangilaᴋ; piniarpoᴋ perᴋojaujomik idluartomiglo; inôjuksauvoᴋ ilâ.

¹⁷ Inôᴋativille ᴋitorngangit oᴋarpaᴋput: Nâlekab apᴋotinga naggolungilaᴋ: tâpkoale apᴋotingit naggolungilat.

¹⁸ Idluartûb idluarnine allarpargo idluitulilunelo, toᴋojuksauvoᴋ taimailiornermine.

¹⁹ Idluitûblo idluinine allarpago piniarlunelo perᴋojaujomik idluartomiglo, inôjutigijaksarivâ ila.

²⁰ Sullele oᴋarpakpose: Nâlekab apkotinga naggolungilaᴋ. Ilipse, ᴋitorngaujose Israêlimut, idluarsaromavapse ilûnase atunit apᴋotise maliklugit.

²¹ Pijokarporlo aularutijaunipta jâringita 12ingane, taᴋᴋit 10ingata uvlungita tellimangane, anigoijub Jerusalemit tikingmanga, oᴋarlune: Iglugasaksuit piluktauvut.

²² Nâlekable aggangita ᴋolangialauᴋpânga unnungme anigoijub tikiningata sivorngane, ᴋaneralo angmarpâ, tikiᴋârtinago uvamnut uvlâkut; ᴋaneralo angmarpoᴋ oᴋâlajungnairomangilangalo.

²³ Nâlekablo oᴋausingata tikipânga, oᴋarlune:

²⁴ Inûb erninga, ipkua nunaᴋartut Israêlib nunangata sunaᴋarungnaitungane oᴋarpakput: Abraha atausiolauᴋpoᴋ, nunalo kingormgutilauᴋpâ: uvagulle unuktôvogut; nunalo tunijauvoᴋ uvaptingnut kingormgutijaksautilugo.

²⁵ Tamanna pivlugo oᴋautikit: Imâk oᴋarpoᴋ Nâlegaᴋ Nâlegaujoᴋ: Aulingnik nerrisôngovose, ijiselo arlortipase gudingoapsingnut, kovisiluselo aungmik: nunalo kingormgutijo mavisiûk?

²⁶ Saviksoase tatigivase, maᴋojungnartulivose, ilûnaselo ivsornartitsivose inôᴋatipse nulianginik: nunalo kingormgutijomavisiûk?

²⁷ Imâk oᴋautijaksarivatit: Imâk oᴋarpoᴋ Nâlegaᴋ Nâlegaujoᴋ: Sorlo mikseᴋârtomik oᴋarama, sunaᴋarungnaitunêtut oggotitaulârput saviksoarmut, naternamêtorlo tunijomalârpara nergjutinut nerrijaksauᴋovlugo, ungaluksoanêtullo ᴋairosungnêtullo toᴋotaujuksauvut nûsilingnartomut.

²⁸ Nunalo asserornerlukungortitsomavara tataminiarutiksangortilugolo, piojorijuteᴋarningalo pitsartunerminik sorairtuksauvoᴋ; Israêliblo ᴋaᴋᴋangit inuêrutjaulârput, tagvûna ingerartoᴋarungnaitilugo.

²⁹ Kaujijuksaulârpullo uvangaugama Nâlegaᴋ, nuna sunaᴋarungnaitigupko tataminiarutiksangortilugolo, maᴋojungnartuliningit piniarnerijangit tamaita pivlugit.

³⁰ Igvillo, inûb erninga, inôᴋativit ᴋitorngangita oᴋautigivâtit ᴋarmait seniane iglullo pângine, oᴋaᴋatigêklutik neliaᴋ inôᴋatiminut, oᴋarlutik: Attê, tusariartolerta oᴋauseᴋ Nâlekamit anijoᴋ ᴋanoelingamangât.

³¹ Ilingnôrpullô inugiartoᴋsuit iluserijangat maliklugo, ingipullo sângne sorlo inuᴋotikka, tusarpullo oᴋauserijarnik, piniarnagille; ᴋanermingnut saᴋᴋêgamik unganersoarmik, ômatingille pijomatudlarnermut torârput.

³² Igvillo, ahâk, nipitsiariktub imgerusersoangatut tusarnidlartotut ipotit tâpkonunga, nipliajolijatsiartotut; tusarmatta oᴋausernik piniarnagille.

³³ Tamannalo neliutilerpat, (ahâk, tikilerpoᴋ,) ᴋaujilârput tagva nelautaijoᴋ akunermingnêlaungmat.