Hesekiel 32 - Labrador Inuttitut Heritage Bible

¹ Pijokarporlo jârit 12ingane, taᴋᴋit 12ingata uvlungita sivorlerpângane, Nâlekab oᴋausingata tikingmanga, oᴋarlune:

² Inûb erninga, Farao, Egiptenib ataninga, pivlugo ogguarit, oᴋautiuglo; Adsiutitaulauᴋpotit loevemut inôtsumut inôᴋatigêksoarne: ᴋuglugiaᴋsoangojârtotulle imarbiksoarmêtotut ilingavotit; aulajadlalauᴋpotit kôksoarne, ittigangnullo imeᴋ issortipat, kôngit salumaitidlarlugit.

³ Imâk oᴋarpoᴋ Nâlegaᴋ Nâlegaujoᴋ: Nulluakka issipteromârpakka ᴋolingnut inugiartoᴋsoaᴋatigêksoarnut, tâpkoalo pititsomârpâtit nulluanut.

⁴ Kemagomârpagillo nuname, egitsomârpagillo nunab ᴋânganutuinaᴋ, tingmiallo ilûnatik ᴋilaub ikkianganêtut mititsomârpakka ilingnut, nunaᴋsûblo nergjutingit ilûnaita aᴋᴋeartortitsomârpakka ilingnik.

⁵ Uvinîllo egitsomârpara ᴋaᴋᴋanut, naᴋsallo tatatsomârpakka ᴋopergungnut.

⁶ Nunalo arvertarvigilauᴋtat koverijomârpara aungnut, ᴋaᴋᴋat tikidlugit aglât, kôllo tatadlaromârput ilingnik.

⁷ Kamikupkillo ᴋilak uligomârpara, uvloriangillo tâᴋtungorlugit; seᴋineᴋ uligomârpara nuvujanut, taᴋᴋiublo ᴋaumanine saᴋᴋijârtiniangilâ.

⁸ Kilangme ᴋaumaᴋutaujut ilûnaita taᴋtungortitsomârpakka ᴋolingne, tâᴋtublo nuna uligomârpâ; oᴋarpoᴋ Nâlegaᴋ Nâlegaujoᴋ.

⁹ Inôᴋatigêksuillo unuktut ômatingit nakêlititsomârpakka asserortauᴋatautikupkit inôᴋatigêksuit nunanêtut ilitaringitatillônêt ilagivlugit.

¹⁰ Ilâ, inôᴋatigêksuit unuktut kakilârtitsomârpakka pivlutit, ataningillo angijomik sivôradlaromârput pitjutigivlutit, saviksoara senervartartigupko sângine; sajukpâdlaromârpullo ilûnamaritik inôsitik pivlugit uvlorme oggovigijarne.

¹¹ Imâk oᴋarmat Nâlegaᴋ Nâlegaujoᴋ: Babilonib ataningata saviksoangata nelaudlaraksarivâtit.

¹² Pitsartudlartut saviksoanginut inugiartoᴋsoatit oggotitautitsomârpakka; tâpkoa inôᴋatigêksuit sivôranarnerpârivait; sujuktitsijomârpullo Egiptenib piojorininganik, inugiartoᴋsoangillo ilûnaita nungutaujomârput.

¹³ Nergjutingillo ilûnaita nungutsomârpakka imaᴋsuit senianit; inûblo ittigangita nergjutiblônêt itigangita issortitsomângilait kingorngane.

¹⁴ Tagva imangit issungititsomârpakka, kôngillo kôktilârpakka orᴋsutut, oᴋarpoᴋ Nâlegaᴋ Nâlegaujoᴋ.

¹⁵ Nuna Egipten asserornerlukungortigupko sunairutilugolo, nuna pitaᴋarungnaimariktoᴋ tatautigilauᴋtaminik, tagvane nunaᴋartut tamaita annaulerupkit, ᴋaujijuksaulârput tagva uvangaugama Nâlegaᴋ.

¹⁶ Tamadja ogguarut ogguarutigilârtangat; inôᴋatigêksuit paningita ogguaᴋatigilârpait; Egipten pivlugo, inugiartoᴋsoangillo pivlugit ogguarutigilârpât tamanna, oᴋarpoᴋ Nâlegaᴋ Nâlegaujoᴋ.

¹⁷ Pijokarporlo ama jârit 12ingane, taᴋᴋiub uvlungita 15ingane, Nâlekab oᴋausingata tikingmanga, oᴋarlune:

¹⁸ Inûb erninga, Egiptenib inugiartoᴋsoangit ᴋeagikit ijukartilugillo nunab allerpânginut, ilâ, tâmna inôᴋatigêksuillo piluangojut paningit ilaliudlugit, tâpkoa itersâlungmut atersârtut ilagivlugit.

¹⁹ Kina ânanauᴋijariviûk? Kanungarit, inariartorlutillo kipimangitut akornganut.

²⁰ Oggolârput saviksoarmut toᴋotaumajut akorngane; saviksoarmut tunijaulerêrpoᴋ; tiguguk, inugiartoᴋsoangillo ilûnamasiatik.

²¹ Sangijut pitsartujut akorngane kapianartoviub iluanit oᴋaᴋatigilârpât, tâmnalo ikajortingillo ilaliudlugit; kanungarêrput, nelangavut aulajâratik, kipimangitut, saviksoarmut toᴋotaujut.

²² Tagvanêput Assur inugiartoᴋsoangillo ilûnatik, iluvingit avatânêput: ilûnatik toᴋotauvlutik, oggotitauvlulik saviksoarmut:

²³ Itersâlub ᴋinguanemarik iluveᴋartitauvut, inugiartoᴋsoangillo iluvingata avatânêput; ilûnatik toᴋotauvlutik, oggotitauvlutik saviksoarmut, kapiasungneᴋartitsilauᴋtut inôjut nunangane.

²⁴ Tagvanêpoᴋ Elam inugiartoᴋsoangillo ilûnatik iluvingata avatâne; ilûnatik toᴋotauvlutik, oggotitauvlutik saviksoarmut, kipimanatik kanungarsimavut nunab allerpânganut, kapiasungneᴋartitsilauᴋtut inôjut nunangane, nangmarlutiglo kangusungnermingnik itersâlungmut atersârtut ilagivlugit.

²⁵ Toᴋotaujut akorngane inangaviliorsimavât inugiartoᴋsoangillo ilûnatik; iluvingit avatânêput; ilûnatik kipimangitut, saviksoarmut toᴋotauvlutik; kapiasungneᴋartitsilaungmatta inôjut nunangane, nangmarpulle kangusungnermingnik itersâlungmut atersârtut ilagivlugit; tâmna toᴋotaujut akornganêtitauvoᴋ.

²⁶ Tagvanêpoᴋ Mesek Tubalelo inugiartoᴋsoangillo ilûnatik; iluvingit avatânêput; ilûnatik kipimangitut, saviksoarmut toᴋotauvlutik; kapiasungneᴋartitsilaungmatta inôjut nunangane.

²⁷ Nelangajuksaungilâllô pitsartujut, kipimangitut oggotitaumajungit, ilagivlugit, kapianartovingmut atersârsimajut sakkolijarlutik unatautinik, saviksoangillo ilijaumavlutik niaᴋotik atânut, idluituliningillo sauninginut nipingavlutik, kapiasûtaulauraloarmatta inôjut nunanganê?

²⁸ Igville navgortaulârpotit kipimangitut akorngane, nelangalârpotillo tâpkoa ilagivlugit saviksoarmut toᴋotaumajut.

²⁹ Tagvanêpoᴋ Edome, ataningillo angajoᴋâᴋsoangillo ilûnatik, pitsartudlalauraloarmatta nelangatitauvut saviksoarmut toᴋotaumajut akornganut; nelajuksauvullo kipimangitut akorngane, tâpkoalo itersâlungmut atersârtut akorngane.

³⁰ Tagvânêputtauᴋ angajoᴋâᴋsuit avanemiut ilûnatik, Zidonemiullo ilûnatik, kanungartut toᴋotaumajut ilagivlugit; kapiasungneᴋ senalauᴋtatik pitsartunermingnut pivlugo kangusudlarput; nelangavullo kipimanatik saviksoarmut toᴋotaumajut akorngane, nangmarpullo kangusuktitaunermingnik itersâlungmut atersârtut ilagivlugit.

³¹ Faraob takojamârpait, inugiartoᴋsoaᴋotinelo pivlugit manigortaujomârpoᴋ; ilâ, Farao sorᴋsuktuksasoaᴋotingillo, saviksoarmut toᴋotaumajut, oᴋarpoᴋ Nâlegaᴋ Nâlegaujoᴋ.

³² Kapianarnera pitipara inôjut nunanganut, tâmnalo nelatitaulârpoᴋ kipimangitut akornganut saviksoarmut toᴋotaumajut ilagivlugit, ilâ, Farao inugiartoᴋsoangillo, oᴋarpoᴋ Nâlegaᴋ Nâlegaujoᴋ.