Hesekiel 31 - Labrador Inuttitut Heritage Bible

¹ Pijokarporlo jârit 11ingane, taᴋᴋit pingajuata uvlungita sivorlerpângane, Nâlekab oᴋausingata tikingmanga, oᴋarlune:

² Inûb erninga, Farao, Egiptenib ataninga, inugiartoᴋsoangillo oᴋautikit: Kina adsigivisiuk angijônipsingnê?

³ Takuit, Assure napârtolauᴋpoᴋ sîdere Libanoneme, piojunik akkerolik, taggalineᴋortôᴋ atâne, poᴋtojorlo, pappingalo nuvujat akornganêpoᴋ.

⁴ Imiub aglisitipâ, itinerub perutsiartipâ; kôksoangit kôkput perorsêvingata avatâgut, kôgarsungillo perorsêviub napârtunginut tamainut kôkput.

⁵ Tamanna pivlugo perorsêviub napârtunginit tamainit poᴋtonerpaulerpoᴋ; akkeroarsungillo unuksivut, akkerungillo takijororput imaᴋatsiarningata nuitingmagit.

⁶ Tingmiat ilûnatik ᴋilaub ikianganêtut ubloᴋarput akkerungita akorngane, naternaublo nergjutingit ilûnatik piaratârput akkerungita atâne, taggalininganelo inôᴋatigêksuit ilûnatik nunaᴋarput.

⁷ Taimak takoranidlarpoᴋ angijônermine, akkerome takiningine, amângit imersoarnêngmatta.

⁸ Sîderit Gudib perorsêvinganêtut ijerungnangilât: ᴋeblariktut tâpsoma akkerungit adsigilaungilait, napârtullo millukattalit adsiutitaujungangilat tâpsoma akkerunginut; napârtullo Gudib perorsêvinganêtut neliallônêt tâpsotunaᴋ takoranidlartigilungilat.

⁹ Takoranidlartilauᴋpara akkerᴋume unurninginut, Edeniblo napârtungita ilûnatik, Gudib perorsêvinganêtut, adsigingilait.

¹⁰ Tamanna pivlugo imâk oᴋarpoᴋ Nâlegaᴋ Nâlegaujoᴋ: Taimak poᴋtotigingmat, pappingalo nuvujat akornganêngmat, ômatingalo piojoringmat poᴋtoninga pivlugo;

¹¹ Tunijomârpara inôᴋatigêksuit pitsartunerpângata agganginut; tâpsoma ila piniarvigilârpâ; idluitoᴋsôning apivlugo ajaktorpara.

¹² Takorngartallo, erᴋsinarnerpât inôᴋatigêksoarnit, toᴋopât egilugolo; akkerungillo kataksimavut ᴋaᴋᴋane naᴋsarnelo tamaine, akkeroarsungillo serᴋomitauvut nunab kôngine tamaine; inôᴋatigêllo ilûnatik nuname atersârput taggalininganit, ᴋemaklugolo.

¹³ Tingmiallo ilûnatik ᴋilaub ikkianganêtut milârput tungaviviningane, nergjutillo ilûnatik naternamêtut inneᴋalârput akkerungine:

¹⁴ Imaitoᴋ pivlugo: napârtut imît senianêtut neliallônêt poᴋtonermingnik piojorijuteᴋarᴋonagit, pititsiᴋonagillônêt pappingmingnik nuvujat akornganut, pitsartujungillônêt, miluartut imermik, angijorortiᴋonagit poᴋtojoᴋsônitik pivlugit; ilûnatik tunijaungmatta toᴋomut, nunamut allerpâmut, inûb ᴋitorngangit ilagivlugit, tâpkoa ilagivlugit itersamut atersârtut.

¹⁵ Imâk oᴋarpoᴋ Nâlegaᴋ Nâlegaujoᴋ: Uvlorme tâpsomane tâmna kanungarmat kapianartovingmut ogguartoᴋartitsilauᴋpunga; tâmna pivlugo itinersoaᴋ matulauᴋpara, kôksoangillo noᴋᴋartilaita, imaksuillo palangairlugit; Libanonelo ogguartilauᴋpara tâmna pivlugo, napârtullo naternamêtut ilûnatik ᴋunolerput tâmna pivlugo.

¹⁶ Oggoningata pervalungninganut inôᴋatigêksuit sajuktilauᴋpakka, egigapko kapianartovingmut tâpkoa ilagivlugit itersamut atersârtut; Edeniblo napârtungit ilûnatik, Libanonib pioluarningit ânanauningillo, ilûnatik imermik miluartut, manigortauvut nunane allerpâne.

¹⁷ Tâpkoatauᴋ tâmna ilagivlugo kanungalauᴋput kapianartovingmut, tâpkonunga saviksoarmut toᴋotaujunut; ila, taipkoa tâpsoma taligilauᴋtangit, inneᴋartut tâpsoma taggaliningane inôᴋatigêksuit akorngane.

¹⁸ Kina tagva adsigiviûk ânanaunerme anginermelo Edenib napârtungita akornganê? Igvittauᴋ kanungartuksauvotit Edenib napârtungit ilagivlugit nunab allerpângane; nelangalârpotit kipisimangitut akorngane, saviksoarmut toᴋotaumajut ilagivlugit. Tamadja tagva Farao inugiartoᴋsoangillo ilûnatik, oᴋarpoᴋ Nâlegaᴋ Nâlegaujoᴋ.