Hesekiel 30 - Labrador Inuttitut Heritage Bible

¹ Nalekab oᴋausingata tikilerivânga, oᴋarlune:

² Inûb erninga, nelautailerit oᴋarlutillo: Imâk oᴋarpoᴋ Nâlegaᴋ Nâlegaujoᴋ: Ogguaritse, kapianarmêk uvloᴋ!

³ Uvloᴋ ᴋanipoᴋ, Nâlekab uvlunga ᴋanipoᴋ, uvloᴋ nuvujalik: nelojut uvluksangat neliutilerpoᴋ.

⁴ Saviksoaᴋ tikilârpoᴋ Egiptenemut, kapiasungneᴋalârpoᴋ Etiopiame, toᴋotaujut oggodlalârmatta Egipteneme; inugiartoᴋsoangit aularutijaujomârmatta, tungavingillo serᴋomitauvlutik.

⁵ Etiopiamiut, Putimiullo, Ludemiullo, inuillo sunatuinait, Kubemiullo, nunablo angeᴋatigijangita inungit oggotitaulârput saviksoarmut.

⁶ Imâk oᴋarpoᴋ Nâlegaᴋ: Tâpkoatauᴋ ikajortut Egiptenemik oggolârput, pitsartuningatalo piojorininga oggolârivoᴋ: Migdolemit Sevenne tikidlugo oggotitaulârput saviksoarmut, oᴋarpoᴋ Nâlegaᴋ Nâlegaujoᴋ.

⁷ Inuêrutilârpullo nunat inuêrutisimajut ilagilugit, iglugasaksoangillo iglugasaksuit asserortaumajut ilagilârpait.

⁸ Kaujijuksauvullo uvangaugama Nâlegaᴋ, ikomamik ikitsijoᴋ Egipteneme, ikajortingillo ilûnatik serᴋomilauᴋpakka.

⁹ Uvlorme tâpsomane aᴋpârtut aulalârput uvamnit umiaᴋsoatigut Etiopiamiut erᴋasungitut ᴋoaᴋsârtitsartorlugit; kapiasungneᴋadlalârporlo tâpkonane, sorlo Egiptenib uvlungane; ahâk, tikilerpoᴋ.

¹⁰ Imak oᴋarpoᴋ Nâlegaᴋ Nâlegaujoᴋ: Egiptenib inugiartoᴋsoangit sorairtitsomârivakka Nebukadnezarib, Babilonib ataningata, agganginut.

¹¹ Tâmnalo, inôᴋatigêksoangillo tâmna ilagilugo, erᴋsinarnerpât inôᴋatigêksoarnit, tagvungautijaujomârput asseroiᴋovlugit nunamik; saviksoatiglo atoromârpait Egiptenemiunut nunalo tatalârpât toᴋotanik.

¹² Kôksoangillo imairutitsomârpakka, nunalo aulaijomavlugo inuit idluitut agganginut: nunalo tâpsomanêtullo asserortauᴋojomârpakka takorngartat agganginut; uvanga Nâlegaujunga taimak oᴋarpunga.

¹³ Imâk oᴋarpoᴋ Nâlegaᴋ Nâlegaujoᴋ: gudingoattauᴋ asseroromârpakka, gudingoaliarimajullo Nôfemetut sorairtitsomârlugit; kingorngane angajoᴋâᴋsoaᴋarungnairtuksauvoᴋ Egiptenemit pijomik; nunamelo Egipteneme sivôraneᴋaromârpoᴋ.

¹⁴ Patroselo inuᴋarungnairtitsomârpara, ikomaᴋartitsijomârlungalo Zoaneme, idluarsaijomârlungalo Nôme.

¹⁵ Kaningaumajârneralo kovijomârpara Sinemut, Egiptenib sôngojoᴋautinganut; Nôblo inugiartoᴋsoangit kipijomârpakka.

¹⁶ Ikomaᴋartitsijomârpungalo Egipteneme; kapiaktoadlarneᴋaromârpoᴋ Sineme, Nôlo serᴋomitaujomârpoᴋ, Nôfemelo akkerartortoᴋaromârpoᴋ uvloᴋ nâvlugo.

¹⁷ Inôsuktut angutit Avenemêtut Pi-bastemêtullo saviksoarmut oggotitaujomârput, aularutijaujomârpullo kipalovingmut.

¹⁸ Takpanêsemelo uvloᴋ tâᴋsilârpoᴋ, Egiptenib nangmautinga tagvane nakagupko, pitsartuningatalo piojorininga sorairomârpoᴋ tâpsomane: nuvujab tâmna uligomârpâ, paningillo aularutijaujomârput.

¹⁹ Egipteneme idluarsaijomârpunga tagva; ᴋaujijuksauvullo uvangaugama Nâlegaᴋ.

²⁰ Pijokarporlo jârit 11ingane, taᴋᴋit sivorlerpângita uvlungita 7ingane, Nâlekab oᴋausingata tikingmanga, oᴋarlune:

²¹ Inûb erninga, Faraob, Egiptenib ataningata, talinga napivara, ahâglo, âniasiutsertaulungilaᴋ âᴋiᴋovlugo, nimmertaulungilarlônêt nukkeᴋarᴋovlugo, saviksoarmik tigumiarungnarᴋovlugo,

²² Tamanna pivlugo imâk oᴋarpoᴋ Nâlegaᴋ Nâlegaujoᴋ: Ahâk, Farao, Egiptenib ataninga, akkerartorpara; talîgiglo nakagomârpâka, tamarmik, nukkeliglo naviktaumajorlo; saviksoarlo kataᴋovlugo agganginit.

²³ Egiptenemiullo siamartitsomârpakka inôᴋatigêksuit akornganut, ᴋemâtitsomârlugillo nunanut.

²⁴ Babiloniblo ataningata talîgik pitsartutitsomârpâka, saviksoarlo ililugo agganginut: Faraoblo talîgik nakagomârpâka, âlaᴋovlugo tâpsoma sângane toᴋomut ikilertaujub âlaningatut.

²⁵ Babilonible ataningata talîgik najumijomârpâka, Faraoble talîgik ᴋassulârpuk; ᴋaujijuksauvullo uvangaugama Nâlegaᴋ, saviksoara iligapko Babilonib ataningata agganginut, tâpsomalo issautikpago nunab Egiptenib ᴋolâgut.

²⁶ Egiptenemiullo siamartitsomârpakka inôᴋatigêksuit akornganut, ᴋemâtitsomârlugillo nunanut; ᴋaujijuksauvullo uvangaugama Nâlegaᴋ.